ކުރިއަށް އޮތް ރިޔާސީ އިންތިޚާބު ކާމިޔާބުކުރުމަށް ގިނަ ސިޔާސީ ޕާޓީތައް ކޯލިޝަން ހަދަނީ އެމީހުންނަށް ސަރުކާރުން ލިބެން އޮތް ޕަސެންޓުގެ ކުޑަ ބޮޑުމިނަށް ބަލާފައި ކަމަށާއި، އެއިން އެއްވެސް ލީޑަރަކު ރައްޔިތަކާއި ދޭތެރޭ ނުވިސްނަވާކަމަށް އިދިކޮޅު ކޯލިޝަންގެ އެކްޝަން ޑިޕާޓުމަންޓުގެ ޗެއާ އަދި މަޖިލީހުގެ ހޯރަފުށީ ދާއިރާގެ ކުރީގެ މެމްބަރު މުޙައްމަދު އިސްމާއިލް ވިދާޅުވެއްޖެ އެވެ.
މުޙައްމަދު އިސްމާއިލް މިފަދައިން ވިދާޅުވެފައިވަނީ ރިޔާސީ އިންތިޚާބަށް ނިކުންނަ ފަރާތްތައް ކޯލިޝަން ހެދުމަށް އެކި ސިޔާސީ ޕާޓީތަކާއެކު މަޝްވަރާތައް ކުރަމުންދާ ދަނޑިވަޅުގައި ކުރެއްވި ޓްވީޓެއްގައެވެ.
އެގޮތުން މުޙައްމަދު އިސްމާއިލް ވިދާޅުވީ ރިޔާސީ ރޭހަށް ނިކުމެވަޑައިގެން ތިއްބެވި ގިނަ ސިޔާސީ ފަރާތްތައް ބައްލަވަނީ ކޯލިޝަން ހަދައިގެން އެމީހުންނަށް ސަރުކާރުން ލިބެން އޮތީ ކިތައް އިންސައްތަ ތޯ ނުވަތަ ކިތައް މަގާމުތޯ ކަމަށެވެ. ކޯލިޝަން ހަދަނީ ސަރުކާރުން އެންމެ ބޮޑު ޕަސެންޓެއް ދޭނެކަމަށް ބުނާ ފަރާތަކާއި އެކުގައިކަމަށް އޭނާ ވިދާޅުވި އެވެ. އަދި އެ ޑީލް ހެދުމުގައި ދީނީ މީހެއް ސިޔާސީ މީހެއް ތަފާތު ނުވާކަމަށް އޭނާ ވިދާޅުވި އެވެ.
މިއިން އެއްވެސް ސިޔާސީ ފަރާތެއް ރައްޔިތަކަށް އޮތީ ކޮން އެއްޗެއްތޯ ނުބައްލަވާ ކަމަށާއިި އެފަދަ ސިޔާސީ ލީޑަރުންގެ ފަރާތުން ޤައުމާއި ރައްޔިތުންނަށް ވާނެ އެއްވެސް ފައިދާއެއް ނޯންނާނެކަމަށް މުޙައްމަދު އިސްމާއިލް ވިދާޅުވި އެވެ.
އޭނާގެ އެ ޓްވީޓުގައި ވަނީ 2018 ވަނަ އަހަރު ވެރިކަމަށް އައުމަށް އެމްޑީޕީއާއެކު ކޯލިޝަން ހެދި ހުރިހާ ސިޔާސީ ލީޑަރުންނާއި އަދި ރައީސް އިބްރާހިމް މުޙައްމަދު ޞާލިހަށް ދެވަނަ ދައުރެއް ހޯދާދިނުމަށް ކޯލިޝަން ހެއްދެވި ސިޔާސީ ޕާޓީތަކުގެ ލީޑަރުންގެ ފޮޓޯއެއް ހިއްސާކޮށްފަ އެވެ.
ޕީޕީއެމް ޕީއެންސީ ނޫން އެހެން ހުރިހާ ސިޔާސީ ޕާޓީތަކުގެ ލީޑަރުން އެ ފޮޓޯގައި ތިއްބެވިކަން ފާހަގަކޮށްލެވެ އެވެ.
އިދިކޮޅު ކޯލިޝަންގެ އެކްޝަން ޑިޕާޓުމަންޓުގެ ޗެއާ މުޙައްމަދު އިސްމާއިލް
"މި މީހުންގެ (2018 ވަރަ އަހަރު ހެދި ކޯލިޝަންގެ ލީޑަރުންގެ) ފަރާތުން ގައުމަށް ރައްޔިތަކަށް ލިބޭނެ އެއްވެސް ފައިދާއެއް ނެތެވެ. ސިޔާސީ މީހުން ބަލަނީ %10 ނޫނީ %30 ދޭނެ މީހަކަށް ހަށި ވިއްކާލާށެވެ. ދީނީ މީހެއް ސިޔާސީ މީހެއް މިއަދަކު ނެތެވެ"
އިދިކޮޅު ކޯލިޝަންގެ އެކްޝަން ޑިޕާޓުމަންޓުގެ ޗެއާ މުޙައްމަދު އިސްމާއިލް
މުޙައްމަދު އިސްމާއިލްގެ އެ ޓްވީޓާއި ގުޅޭގޮތުން "ވޮއިސް" އަށް އިތުރަށް ވިދާޅުވީ މިއަދު ބައެއް ސިޔާސީ ލީޑަރުންނާއި ޕާޓީތައް ސަރުކާރާއި ފެޔަށް ޖެހުނީ އިޚްލާސްތެރިކަމެއް އޮވެގެން ނޫން ކަމަށެވެ.
އެގޮތުން އެމްޑީޕީގެ ރައީސް މުޙައްމަދު ނަޝީދާއި ޖުމްހޫރީ ޕާޓީގެ ލީޑަރު ޤާސިމް އިބްރާހިމަކީ ސަރުކާރުން މިހާތަނަށް ހިންގި ހުރިހާ ޖަރީމާއެއްގެ ހިއްސާދާރުންކަމަށް އޭނާ ވިދާޅުވި އެވެ. އަދި ރިޔާސީ އިންތިޚާބު ބޯމަތިވުމުން ސަރުކާރުން ނިކުންނަން މަސައްކަތް ކުރި ނަމަވެސް ސަރުކާރުން ހިންގި ޖަރީމާތަކުގެ ޒިންމާ އެ ބޭފުޅުންވެސް ނަންގަވަން ޖެހޭނެކަމަށް މުޙައްމަދު އިސްމާއިލް ވިދާޅުވި އެވެ.
އެއާއެކު އޭނާ ވިދާޅުވީ ރައްޔިތުންނާއި މި ޤައުމުގެ ހައްޤުގައި ކެނޑިނޭޅި މަސައްކަތްޕުޅު ކުރެއްވި ހަމައެކަނި ސިޔާސީ ލީޑަރަކީ ޕީޕީއެމްގެ ރިޔާސީ ކެންޑިޑޭޓު ރައީސް އަބްދުﷲ ޔާމީން އަބްދުލްގައްޔޫމު ކަމަށެވެ.
އެމަނިކުފާނަށް ނުހައްގުން ޖަލުގައި އަނިޔާދެމުންދާއިރު ވެސް ކެތްތެރިކަމާއެކު ހުންނެވީ ރައްޔިތުންގެ ހައްގުގައި ކަމަށާއި އެކަން މިއަދު ރައްޔިތުން ބަލައިގަންނަކަމަށް އޭނާ ވިދާޅުވި އެވެ.
Advertisement
This content is created and paid for by advertisers and does not involve Voice Journalists
