އިގިރޭސި ޕްރިމިއާ ލީގުގައި މިއަދު ހަވީރު ކުޅެވުނު މެޗުގައި ލިވަޕޫލްއިން ލަނޑެއްޖަހައި ކުރި ހޯދައިފައިވަނިކޮށް ފަހަތުން އަރާ މޮޅުވެ މެންޗެސްޓާ ސިޓީ އިން އެއްވަނައިގައި އޮތް އާސެނަލް އާއި ދެމެދުގައި އޮތް ފަރަގު 5 ޕޮއިންޓަށް ކުޑަކޮށްފި އެވެ.

މެންޗެސްޓާ ސިޓީގެ ދަނޑުގައި ކުޅުނު މި މެޗު އެޓީމުން ކާމިޔާބުކުރީ 4-1 ގެ ނަތީޖާއަކުންނެވެ. މި މެޗުގައި ފުރަތަަމަ ލަނޑުޖަހައި ކުރިހޯދީ ލިވަޕޫލުން އެވެ.

ފުރަތަަމަ ހާފުގެ 17 ވަނަ މިނެޓުގައި ލިވަޕޫލަށް ލީޑު ނަގައިދިނީ އެޓީމުގެ މިސްރުގެ ފޯވާޑް މުހައްމަދު ސަލާހް އެވެ. މިއީ އެޓީމުގެ ޕޯޗުގަލް ފޯވާޑް ޑިއެގޯ ޖޯޓާ ތަނަވަސްކޮށްދިން ފުރުސަތެއްގައި އޭނާ ކާމިޔާބުކޮށްދިން ލަނޑެކެވެ.

ފުރަތަަމަ ހާފު ނިމުމުގެ ކުރިން ސިޓީއަށް މެޗުގެ ނަތީޖާ އެއްވަރުކޮށްދިނީ އެޓީމުގެ އާޖެންޓީނާ ފޯވާޑް ޖޫލިއަން އަލްވަރޭޒް އެވެ. މިއީ އެޓީމުގެ އިގިރޭސި މިޑްފީލްޑަރު ޖެކް ގްރީލިޝް ތަނަވަސްކޮށްދިން ފުރުސަތެއްގައި އޭނާ ކާމިޔާބުކޮށްދިން ލަނޑެކެވެ.

ދެވަަނަ ހާފު ފެށިގެން ފުރަތަަމަ މިނެޓުގައި މެންޗެސްޓާ ސިޓީ އިން ލަނޑެއް ކާމިޔާބުކޮށް މި މެޗުގައި ފުރަތަަމަ ފަހަރަށް ލީޑުނެގިއެވެ. މި ލަނޑު އެޓީމަށް ކާމިޔާބުކޮށްދިނީ އެޓީމުގެ ބެލްޖިއަމް މިޑްފީލްޑަރު ކެވިން ޑިބްރޭނާ އެވެ. މިއީ އެޓީމުގެ އަލްޖީރިއާގެ ފޯވާޑް ރިޔާދު މަހްރޭޒް ތަނަވަސްކޮށްދިން ފުރުސަތެއްގައި އޭނާ ކާމިޔާބުކޮށްދިން ލަނޑެކެވެ.

ސިޓީގެ ތިންވަނަ ލަނޑު ދެވަނަ ހާފުގެ 53 ވަނަ މިނެޓުގައި ކާމިޔާބުކޮށްދިނީ އެޓީމުގެ ޖަރުމަނު މިޑްފީލްޑަރު ގުންޑޮގަން އެވެ. އަދި އެޓީމުގެ ހަތަރުވަނަ ލަނޑު 74 ވަނަ މިނެޓުގައި ކެވިން ޑިބްރޭނާ ތަނަވަސްކޮށްދިން ފުރުސަތެއްގައި  ކާމިޔާބުކޮށްދިނީ ޖެކް ގްރިލިޝް އެވެ.

މި މެޗުން ލިބުނު ތިން ޕޮއިންޓާއެކު 28 މެޗުން 64 ޕޮއިންޓް ހަމަކޮށް މެންޗެސްޓާ ސިޓީ އިން ވަނީ އެއްވަނައިގައި އޮތް އާސެނަލް އާއި ދެމެދުގައި އޮތް ފަރަގު 5 ޕޮއިންޓަށް ކުޑަކޮށްފި އެވެ. މި މެޗުން ބަލިވި ލިވަޕޫލަށް 27 މެޗު ކުޅެގެން ލިބިފައިވަނީ 42 ޕޮއިންޓާއެކު ތާވަލުގެ 8 ވަނަ އެވެ.