މާލޭ ސިޓީ ކައުންސިލްގެ މުވައްޒަފުން ރޭ ހުސްކުރަން ފެށީ ޔޫތު މިނިސްޓްރީގެ ގުދަނެއް ނޫން ކަމަށާއި، އެއީ މާލޭ ސިޓީގެ ބިމެއްގައި ހަދާފައިވާ ވެރިފަރާތާއި ބެހޭ އެއްވެސް މައުލޫމާތެއް ސިޓީ ކައުންސިލާއި ހިއްސާކޮށްފައި ނުވާ ގުދަނެއްކަމަށް އެ ކައުންސިލުން ހާމަކޮށްފި އެވެ. 

އެކަން ސިޓީ ކައުންސިލުން ހާމަކޮށްފައިވަނީ މާލޭގެ 353 ނަންބަރު ކޮށީގެ ދެކުނުފަރާތު ކުރީގެ ރުމާލު ޖަގަހަ އާއި ޓޯޔާޑު އާއި ދެމެދު ހަދާފައިވާ ގުދަން ހުސްކުރުމާ ގުޅޭގޮތުން ކަންހިންގާފައިވާގޮތް ވާހަކަތައް ދެކެވެމުންދާކަން ފާހަގަކޮށް، އެކަން ސާފުކޮށްދިނުމަށް ނެރުނު ނޫސް ބަޔާނެއްގަ އެވެ. 

މާލޭ ސިޓީ ކައުންސިލުން ބުނީ މާލޭގެ 353 ނަންބަރު ކޮށީގައި ހިމެނޭ ބިންތަކަކީ މާލޭ ސިޓީ ކައުންސިލްގެ ނަމުގައި ރަޖިސްޓްރީ ކޮށްފައިވާ ބިމަކަށްވެފައި އެ ބިމުގެ ދެކުނަށް ހުރި ކުރީގެ ރުމާލު ޖަގަހަ އާއި ޓޯޔާޑާ ދެމެދު ހަދާފައިވާ ގުދަނަކީ ވެސް މާލޭ ސިޓީ ކައުންސިލްގެ ނަމުގައި ރަޖިސްޓްރީ ހަދާފައިވާ ބިމެއްގައި ހަދާފައިވާ ގުދަނެއް ކަމަށެވެ. އަދި އެގުދަން ހަދާފައިވަނީ މާލޭ ސިޓީ ކައުންސިލުން ހުއްދަ ދީގެން ނޫން ކަމަށެވެ.

Advertisement

އަދި މާލޭ ސިޓީ ކައުންސިލުން އެ ބިމުގައި ގުދަނެއް ހެދުމަށް ނުވަތަ އެ ބިމުގެ ބައެއް ކުއްޔަށް ދިނުމަށް އެއްވެސް ފަރާތަކާ އެއްބަސްވުމެއް ހަދާފައި އޮތްކަން މާލޭ ސިޓީ ކައުންސިލްގައި ހުރި ލިޔުންތަކުން އެނގެން ނެތްކަމަށް މާލޭ ސިޓީ ކައުންސިލުން ވަނީ ބުނެފައެވެ. 

އެ ގުދަނަކީ ޤަވާއިދާ ޚިލާފަށް މާލޭ ސިޓީ ކައުންސލުގެ ހުއްދަ ނެތި ބޭނުންކުރަމުންދާ ތަނަކަށްވާތީ، އެ ގުދަނުގައި ބަހައްޓާފައި ހުރި ތަކެތީގެ ވެރިފަރާތެއް ހޯދުމަށް 2022 ވަނަ އަހަރުގެ ޑިސެމްބަރ މަހުގެ 04 ވަނަ ދުވަހުން ފެށިގެން 10 ވަނަ ދުވަހުގެ ނިޔަލަށް ސަރުކާރުގެ ގެޒެޓުގައި އާންމުކޮށް އިއުލާނުކޮށް އަދި  ޑިސެމްބަރ މަހުގެ 10 ވަނަ ދުވަހުގެ ނިޔަލަށް އެ ގުދަނުގައި ތަކެތި ބަހައްޓާފައިވާ ފަރާތަކުން އެކަން މާލޭ ސިޓީ ކައުންސިލަށް ނާންގާނަމަ ނުވަތަ އެ ގުދަން ކުއްޔަށް ހިފައިގެން ބޭނުންކުރާ ކަމުގެ ލިޔުންތައް ހުށަހަނާޅާނަމަ އެ ގުދަން ރޫޅާލައި އެ ގުދަނުގައި ހުރި ތަކެތި މާލޭ ސިޓީ ކައުންސިލްގެ ބެލުމުގެ ދަށަށް ގެންދާނެކަން އާންމުކޮށް އަންގައި އިއުލާނު ކުރިކަމަށް ސިޓީ ކައުންސިލުން ވަނީ ބުނެފައެވެ. 

އެހެން ނަމަވެސް 2023 ވަނަ އަހަރުގެ މާޗު މަހުގެ 31 ވަނަ ދުވަހުގެ ނިޔަލަށްވެސް މާލޭ ސިޓީ ކައުންސިލަށް އެއްވެސް ފަރާތަކުން އެ ގުދަން ބޭނުންކުރާ ކަމުގެ ލިޔުމެއް ހުށަހަޅާފައި ނުވާތީ، އެގުދަނަކީ ވެރިފަރާތެއް ނެތްތަނެއްގެ ގޮތުގައި ބަލައި އެ ގުދަން ހުސްކުރުމަށް ބެލިއިރު އެ ގުދަނުގައި މުދާތަކެއް ހުރިކަން އެނގުމާއެކު  އެ ގުދަނުގައި ހުރި ތަކެތި ރައްކާތެރިކަމާއެކު މާލޭ ސިޓީ ކައުންސިލްގެ ބެލުމުގެ  ދަށުގައި ހުރި ތަނަކަށް ބަދަލުކުރުމުގެ މަސައްކަތް ފެށީ، އެގުދަން  ހުރި ތަނަކީ މިހާރު ކައުންސިލަށް އެއްވެސް މަންފާއެއް ނުލިބޭ ތަނަކަށް ވާތީ އެ ބިމުގެ ބޭނުން އެންމެ ރަނގަޅުގޮތުގައި ހިފުމުގެ ބޭނުމުގައި ކަމަށް މާލޭ ސިޓީ ކައުންސިލުން ނެރުނު ބަޔާނުގައި ބުނެފައި ވެއެވެ. 

މާލޭ ސިޓީ ކައުންސިލުން ބުނީ އެ ކައުންސިލުން އަބަދުވެސް މަސައްކަތް ކުރަމުންދަނީ ދިވެހި ރާއްޖޭގައި ހަދާފައިވާ އެންމެހައި ޤާނޫނުތަކާއި ޤަވާއިދުތަކާއި އެއްގޮތްވާ ގޮތުގެމަތިން ކަމަށާއި، އެގޮތުން މި ގުދަންވެސް ހުސްކުރުމުގެ މަސައްކަތް ކުރަމުންދަނީ ޤާނޫނާއި ޤަވާއިދާ އެއްގޮތްވާ ގޮތުގެމަތިން ކަަމަށެވެ. 

ގުދަން ނެގުމުގެ މަސައްކަތްވެސް ކޮށްފައިވަނީ އެ އުސޫލުގެ ތެރެއިންކަމަށާއި، އެތަން ހުސްކުރުމުގައި ގަވައިދާއި ޚިލާފުކަމެއް ކޮށްފައި ނުވާނެކަމަށް ސިޓީ ކައުންސިލުން ވަނީ ބުނެފައެވެ.