މާލޭ ސިޓީ ކައުންސިލުން ވިލިމާލޭގައި ބަގީގެ ޚިދުމަތް ރަސްމީކޮށް ފަށައިފި އެވެ. 

ބަގީގެ ޚިދުމަތް އިފްތިތާހުކޮށްދެއްވީ އެކަމަށްޓަކައި ރޭ ވިލިމާލޭގައި ބޭއްވި ޚާއްސަ ހަފްލާއެއްގައި މާލޭ ސިޓީގެ މޭޔަރު ޑރ މުހައްމަދު މުއިއްޒު އެވެ.

އެ ރަސްމިއްޔާތުގައި ޑރ މުއިއްޒުގެ އަރިހުގައި މާލޭ ސިޓީ ކައުންސިލްގެ ވިލިމާލޭ ދާއިރާގެ މެމްބަރު ނަހުލާ އަލީއާއި ސިޓީ ކައުންސިލްގެ މެމްބަރުން ބައިވެރިވެފައިވެއެވެ. އަދި ވިލިމާލޭގެ ރައްޔިތުންވެސް ވަނީ އެ ހަލްފާގައި ބައިވެރިވެފައެވެ. 

Advertisement

ރޭ ރަސްމީކޮށް ބަގީގެ ޚިދުމަތް ފެށިގެން ދިޔަ ނަމަވެސް މާވުމަހުގެ 16 ވަނަ ދުވަހުން ފެށިގެން ވިލިމާލޭގައި ބަގީގެ ޚިދުމަތް މާލޭ ސިޓީ ކައުންސިލުން ދަނީ ފޯރުކޮށްދެމުން ނެވެ. 

ބަގީގެ ޚިދުމަތް މެދުކެނޑިފައި އޮންނަތާ ގިނަ ދުވަސްތަކަކަށްފަހު އެ ޚިދުމަތް މާލޭ ސިޓީ ކައުންސިލުން ވިލިމާލޭގައި ފައްޓާފައިވާއިރު، މާލޭ ސިޓީ ކައުންސިލުން ވަނީ މުދާ އުފުލާ ބަގީއާއި، ކުއްލި ހާލަތުގައި އެމަޖެންސީކޮށް ބަލިމީހުންނަށް ދަތުރުކުރެވޭނެ ބަގީގެ ޚިދުމަތްތައްވެސް ފަށާފައެވެ. 

އެގޮތުން 4 ސީޓުގެ ބަގީއާއި، 6 ސީޓުގެ ބަގީ އަދި 12 ސީޓުގެ ބަގީ ވިލިމާލޭގައި މިހާރު ދުއްވާނެއެވެ. 

މާލޭ ސިޓީ ކައުންސިލުން ވިލިމާލޭގައި ދުއްވަމުންދަނީ ވިލިމާލޭގެ މާހައުލާއި ގުޅޭގޮތަށް ތިމާވެއްޓާއި ރައްޓެހި ބަގީއެވެ. 

ބަގީގެ ޚިދުމަތް ރަސްމީކޮށް އިފްތިތާހުކޮށްދިނުމަށް ބޭއްވި ހަފްލާގައި މޭޔަރު މުއިއްޒު ވިދާޅުވީ ދަތުރުފަތުކުރުމަށް ވިލިމާލޭގ ރައްޔިތުންނަށް ދިމާވެފައިވާ ދަތިތައް ހައްލުކުރުމަށް މާލޭ ސިޓީ ކައުންސިލުން ފެށި ޚިދުމަތް ފުޅާކުރުމުގެ މަސައްކަތްވެސް ކުރައްވަމުން ގެންދާނެކަމުގެ ޔަގީންކަން ދެއްވާކަމަށެވެ. 

އެހެންކަމުން ކުރިއަށް އޮތްތަނުގައި ވިލިމާލޭގެ ރައްޔިތުންނަށް މިހާރަށްވުރެ ލުއި ފަސޭހަ ގޮތްތަކެއް ފޯރުކޮށްދެވޭނެ ކަމަށް އުންމީދުކުރައްވާކަމަށް ޑރ މުއިއްޒު ވިދާޅުވި އެވެ.