މާލޭ ސިޓީ ކައުންސިލްގެ އިހުތިޞާސް ހިމެނޭ ގްރޭޓާ މާލޭ ސަރަހައްދުގެ ރައްތަކަށް ޚިދުމަތް ފޯރުކޮށްދިނުމުގައި އެ ކައުންސިލުން ތަފާތުކުރުން ނުގެންގުޅޭނެކަމުގެ ޔަގީންކަން ދެއްވާކަމަށް މާލޭ ސިޓީގެ މޭޔަރު ޑރ މުޙައްމަދު މުއިއްޒު ވިދާޅުވެއްޖެ އެވެ.
ޑރ މުއިއްޒު މިފަދައިން ވިދާޅުވެފައިވަނީ ވިލިމާލޭގައި ބަގީގެ ޚިދުމަތް ރަސްމީކޮށް އިފްތިތާހުކޮށްދިނުމަށް ބޭއްވި ހަފްލާއެއްގައި ވިލިމާލޭގ ރައްޔިތުންނާއި މުޚާތަބުކޮށް ވާހަކަދައްކަވަމުން ނެވެ.
ޑރ މުއިއްޒު ވިދާޅުވީ ތަފާތުކުރުމެއްނެތި ހުރިހާ ރައްޔިތުންނަށް ޚިދުމަތްތައް ފޯރުކޮށްދިނުމަށް މާލޭ ސިޓީ ކައުންސިލަށް ބޮޑެތި ގޮންޖެހުންތަކެއްވެސް ހުރިކަމަށެވެ. އެގޮތުން އެ ކައުންސިލަށް ވިލިމާލޭގައި ބަގީގެ ޚިދުމަތް ފެށިގެން ދިޔައީވެސް އެފަދަ އެތައް ގޮންޖެހުންތަކެއްގެ ތެރެއިންކަން ޑރ މުއިއްޒު ފާހަގަކުރެއްވި އެވެ.
"މާލޭ ސިޓީގެ ކޮންމެ ރައްޔިތެއް ހަމަހަމަ. އެގޮތުން ވިލިމާލޭގެ ރައްޔިތުންނަށް މާލޭގެ އެހެން އަވަށްތަކުގެ ރައްޔިތުންނާއި މާލޭ ސިޓީ ކައުންސިލްގެ ކުރިމަތީގައި އެއީ އެއް ހަމައެއްގެ ބައެއް. އެހެންވީމާ މި ދާއިރާއަށް ލިބެންޖެހޭ ޚިދުމަތްތައް ގެނެސްދިނުމުގައި އަޅުގަނޑުމެން ތަފާތެއް ނުކުރާނަން. އަޅުގަނޑުމެންނަށް ކުރިމަތިވަނީ ގޮންޖެހުންތަކެއް. އެ ގޮންޖެހުންތައް ގިރާކުރުމުގައި އަޅުގަނޑުމެން މި މަސައްކަތް ކުރަން ޖެހެނީ"
މާލޭ ސިޓީގެ މޭޔަރު ޑރ މުހައްމަދު މުއިއްޒު
އެކަން ފާހަގަކުރައްވާ ޑރ މުއިއްޒު ވިދާޅުވީ ހުރަސްތައް ހުރި ނަމަވެސް، އެ ހުރަސްތައް ގިރާކޮށް މާލޭ ސިޓީ ކައުންސިލުން މަސައްކަތް ކުރަމުންދަނީ ވިލިމާލޭގެ ރައްޔިތުންނަށް ދިމާވެފައިވާ ދަތިތައް ޙައްލުކޮށްދިނުމަށް ކަމަށެވެ.
އެ މަސައްކަތް މިހާރަށްވުރެ ފުޅާ ދާއިރާއެއްގައި ކުރިއަށް ގެންދާނެކަމަށާއި، ކުރިއަށް އޮތީ ވިލިމާލޭ ދާއިރާގެ ރައްޔިތުންނަށް އުފާވެރި ދުވަސްތަކެއްކަމަށް ޑރ މުއިއްޒު ވިދާޅުވި އެވެ.
ރޭ ރަސްމީކޮށް މާލޭ ސިޓީ ކައުންސިލުން ވަނީ ވިލިމާލޭގައި ބަގީގެ ޚިދުމަތް ފަށައިފައެވެ.
އެ ރަސްމިއްޔާތުގައި ވާހަކަދައްކަވަމުން ޑރ މުއިއްޒު ވިާޅުވީ ބަގީގެ ޚިދުމަތް ފަށައިގަންނައިރު ދަތިތަކެއް ހުރި ނަމަވެސް، އެކަން ޙައްލުކޮށް، ޚިދުމަތް މެދުނުކެނޑި ކުރިއަށް ގެންދިއުމަށް ވިލިމާލޭ ރައްޔިތުންގެ އެހީތެރިކަން ބޭނުންވެލައްވާ ކަމަށެވެ. އަދި ސިޓީ ކައުންސިލާއި ރައްޔިތުންނާއި ގުޅިގެން ބަގީގެ ޚިދުމަތުން ލުއި ފަސޭހަކަން ހޯދޭނެކަމަށް ޑރ މުއިއްޒު ވިދާޅުވި އެވެ.
Advertisement
This content is created and paid for by advertisers and does not involve Voice Journalists
