ރައްޔިތުންގެ މަޖިލީހުގެ ގުރައިދޫ ދާއިރާގެ ބައި-އިލެކްޝަނަށް 6 ދުވަހަށް ވެފައިވަނިކޮށް އެ ދާއިރާގައި ހިމެނޭ ކ. ގުޅީ ބިން ހިއްކުމަށް ސާމާނު ގެންގޮސްފި އެވެ. 

ކ. ގުޅީގެ ބިން ހިއްކުމުގެ މަޝްރޫއު 89.6 މިލިއަން ރުފިޔާއަށް މޯލްޑިވްސް ޓްރާންސްޕޯޓް އެންޑް ކޮންޓްރެކްޓިންގް ކޮމްޕެނީ (އެމްޓީސީސީ)އާ ހަވާލުކޮށްފައިވަނީ މިދިޔަ މާޗުމަހުގެ ތެރޭގައެވެ. 

ސަރުކާރުގެ މަޝްރޫއުތަކާއި ބެހޭ މައުލޫމާތު އާންމުކޮށްފައިވާ ވެބްސައިޓުގައި ބުނާގޮތުން އެ މަޝްރޫއު ފެށުމަށް ސަރުކާރުން ނިންމާފައިވަނީ މިއަހަރުގެ އޮކްޓޫބަރު މަހުގައެވެ. 

އެހެން ނަމަވެސް ބިން ހިއްކުމުގެ މަޝްރޫއު އަވަސްކޮށްފައިވަނީ ގުރައިދޫ ދާއިރާގެ އިންތިޚާބާއި ދިމާކޮށްކަން ފާހަގަކޮށްލެވެއެވެ. އެ އިންތިޚާބުގައި ސަރުކާރު ހިންގާ މައި ޕާޓީ އެމްޑީޕީންވެސް ވަނީ ވާދަކުރަން ނިންމާފައެވެ. 

ބިން ހިއްކުމާއި ގުޅޭގޮތުން ގުޅި ކައުންސިލްގެ ރައީސް މޫސާ ސަލީފު ވިދާޅުވީ ބިން ހިއްކުމަށް ބޭނުންވާ ސާމާނު މިހާރު އެ ރަށަށް ގެނެސްފައިވާ ކަމަށެވެ. އެހެން ނަމަވެސް މަސައްކަތް ފަށާނެ ވަކި ތާރީހެއް ހާމަކުރައްވާފައެއް ނުވެއެވެ. ވިދާޅުވީ މިހާރު ކުރިއަށް ދަނީ އެ މަސައްކަތް ފެށުމަށް ކުރަންޖެހޭ އެންމެ ފަހުގެ މަސައްކަތްތައް ކަމަށެވެ. 

އިންތިޚާބާއި ދިމާކޮށް ގުރައިދޫ ދާއިރާގައި ސަރުކާރުން އެ ނޫންވެސް މަޝްރޫއުތައް ހިންގަމުންދާކަން ފާހަގަކޮށްލެވެއެވެ. އެގޮތުން އިންތިޚާބަށް އިއުލާނުކޮށްފައި ވަނިކޮށް މާފުށިން 300 ގޯތި ދޫކުރުމަށް ވަނީ އިއުލާނުކޮށްފަ އެވެ. 

މި އިންތިޚާބުގައި ވާދަކުރާ ސަރުކާރާއި ވާދަވެރި ސިޔާސީ ޕާޓީ ޕީޕީއެމުން މި ކަންކަން ސިފަކުރަމުންދަނީ އިންތިޚާބަށް ނުފޫޒު ފޯރުވުމަށް ހިންގާ ކަންކަމުގެ ގޮތުގައެވެ. އިންތިޚާބާއި ދިމާކޮށް ގުރައިދޫ ދާއިރާގައި މަޝްރޫއުތައް ހިންގުމަށް އިއުލާނު ކުރުމަކީ އިއްތިފާގެއް ނޫންކަމަށް އިދިކޮޅުން ދަނީ ބުނަމުންނެވެ. 

ގުރައިދޫ ބައި-އިލެކްޝަނާއި ދިމާކޮށް ސަރުކާރުން އަމަލުކުރަމުންދަނީ މީގެ ކުރިން ކޮމަންޑޫ ދާއިރާގެ އިންތިޚާބަށްވެސް ނުފޫޒުފޯރުވުމަށް އަމަލުކުރަމުން ދިޔަ ގޮތަށްކަމަށް އިދިކޮޅު ކޯލިޝަން ވަގުތީގޮތުން ހިންގެވުމާއި ހަވާލުވެ ހުންނެވި ޕީއެންސީގެ ރައީސް އަބްދުއްރަހީމް އަބްދުﷲ ވަނީ ވިދާޅުވެއެވެ. 

އޭގެ އިތުރުން އިންތިޚާބަށް ނުފޫޒު ފޯރުވުމަށް ސަރުކާރުން ކުރަމުންދާ ކަންކަން ފާހަގަކޮށް އެ މައްސަލަތައް އިދިކޮޅުން ވަނީ އޭސީސީއަށް ހުށައެޅުމަށް ނިންމާފަ އެވެ.