އިގިރޭސި ޕްރިމިއާ ލީގުގައި މިރޭ ރަށުން ބޭރުގައި ސައުތުހެމްޓަން އާއި ވާދަކުރި މެޗު 4-1 ގެ ނަތީޖާއަކުން ކާމިޔާބުކޮށް މެންޗެސްޓާ ސިޓީ އިން އެއްވަނައިގައި އޮތް އާސެނަލް އާއި ދެމެދުގައި އޮތް ފަރަގު ފަސް ޕޮއިންޓަށް ކުޑަކޮށްފިއެވެ.

މިރޭގެ މެޗުގައި ސިޓީ ނޯވޭ ފޯވާޑް ހާލަންޑް ކާމިޔާބުކުރި ދެ ލަނޑާއެކު މިސީޒަނުގައި ލީގުގައި އޭނާ ކާމިޔާބުކުރި ލަނޑުގެ އަދަދު ވަނީ 30 އަށް އަރާފައެވެ.

މިރޭގެ މެޗުގެ ފުރަތަަމަ ހާފުގައި މެންޗެސްޓާ ސިޓީ އިން ގިނަވަގުތު ބޯޅަ ހިފަހައްޓައިގެން މޮޅަށް ކުޅުނު ނަމަވެސް މިހާފުގައި އެޓީމަށް ލަނޑެއް ކާމިޔާބުކުރެވުނީ 45 ވަނަ މިނެޓުގައެވެ.

Advertisement

މި ލަނޑު އެޓީމަށް ކާމިޔާބުކޮށްދިނީ ހާލަންޑް އެވެ. މިއީ އެޓީމުގެ ބެލްޖިއަމް މިޑްފީލްޑަރު ކެވިން ޑިބްރޭނާ ތަނަވަސްކޮށްދިން ފުރުސަތެއްގައި އޭނާ ކާމިޔާބުކޮށްދިން ލަނޑެކެވެ.

ދެވަަނަ ހާފު ފެށިގެން 58 ވަނަ މިނެޓުގައި ސިޓީގެ ލީޑު ފުޅާކޮށްދިނީ އިގިރޭސި މިޑްފީލްޑަރު ޖެކް ގްރިލިޝް އެވެ. އަދި އޭގެ 10 މިނެޓު ފަހުން ސިޓީގެ ތިންވަނަ ލަނޑު ގްރިލިޝް ތަނަވަސްކޮށްދިން ފުރުސަތެއްގައި ކާމިޔާބުކޮށްދިނީ ޕްރެމިއާ ލީގުގެ ޓޮޕް ސްކޯރ ހާލަންޑް އެވެ.

މެންޗެސްޓާ ސިޓީ އިން ތިން ލަނޑުގެ ލީޑެއްގައި ވަނިކޮށް ޕްރިމިއާ ލީގު ތާވަލުގެ ފުލުގައި އޮތް ސައުތުހެމްޓަން އިން ވަނީ ލަނޑެއް ކާމިޔާބުކޮށް ނަތީޖާ ފަރަގު ކުޑަކޮށްފައެވެ. މި ލަނޑު އެޓީމަށް ކާމިޔާބުކޮށްދިނީ ފްރާންސްގެ ފޯވާޑް ސެކޫ މާރާ އެވެ.

މި މެޗުގައި މެންޗެސްޓާ ސިޓީ އިން ކާމިޔާބުކުރި ހަތަރު ވަނަ ލަނޑު ދެވަނަ ހާފުގެ 75 ވަނަ މިނެޓުގައި ކާމިޔާބުކޮށްދިނީ ހާލަންޑްގެ ބަދަލުގައި ދެވަަނަ ހާފްގައި ކުޅެންނުކުތް އާޖެންޓީނާގެ ޒުވާން ފޯވާޑް އަލްވަރޭޒް އެވެ.

މިރޭގެ މެޗުން ލިބުނު ތިން ޕޮއިންޓާއެކު އެކު 29 މެޗުން މެންޗެސްޓާ ސިޓީއަށް ވަނީ 67 ޕޮއިންޓް ލިބިފައެވެ. މި މެޗުން ބަލިވި ސައުތުހެމްޓަން 30 މެޗު ކުޅެގެން އެޓީމަށް ލިބިފައިވަނީ 23 ޕޮއިންޓާއެކު ތާވަލްގެ 20 ގެނައެވެ.

މި ހަފްތާގެ އަންގާރަދުވަހުގެ ރޭ ޗެމްޕިއަންސްލީގުގެ ކުއާޓަރ ފައިނަލްގެ ފުރަތަމަ ލެގުގައި އަމިއްލަ ދަނޑުގައި މެންޗެސްޓާ ސިޓީ ނިންމާނީ ޖަރުމަނުގެ ޗެމްޕިއަން ބަޔާން މިއުނިކާއި ދެކޮޅަށެވެ.