ފެނަކައިގެ ހުރިހާ ހަރު މުދަލެއް ވިއްކިޔަސް ދަރަނި ނުދެއްކޭވަރަށް އެ ކުންފުނި ދަރާފައިވާ ކަމަށް އެސްޓީއޯގެ ކުރީގެ އެމްޑީ ހުސައިން އަމްރު ވިދާޅުވެއްޖެ އެވެ.
ޑީސަލް ހުސްވެގެން ލ. ގަމުން ކަރަންޓް ކެނޑިފައިވާ ކަމަށް ބުނެ އޮންލައިން ނޫހަކުން ރިޕޯޓް ކުރުމާއި ގުޅިގެން އެ ޚަބަރު ހިއްސާ ކުރައްވައި އަމްރު ކުރެއްވި ޓްވީޓެއްގައި ވިދާޅުވީ، އެފަދަ ކަމެއް މީގެ ކުރިން ރާއްޖޭގައި ވެފައި ނުވާ ކަމަށެވެ.
"ފެނަކައިގެ ހިންގުން ދޯދިޔާވެ ވަނީ ބޮއްސުންލާފަ. ފެނަކައިގެ ހުރިހާ އެސެޓެއް ވިއްކިޔަސް ދަރަނި ނުދެއްކޭވަރަށް ވަނީ ދަރާފަ." އަމްރު ވިދާޅުވިއެވެ.
މިއާއެކު އަމްރު ވިދާޅުވީ ފެނަކައިގެ ދަރަނި އިންތިހާއަށް ބޮޑުވެފައިވާ މައްސަލައަށް އެއްވެސް ހައްލެއް އެސްވެސް މުއައްސަސާއަކުން ލިބިފައި ނުވާ ކަމަށެވެ.
ލ.އަތޮޅު ގަމުގައި ހުންނަނީ ފެކަނަ ކޯޕަރޭޝަންގެ އިންޖީނުގެއެކެވެ. އެ ރަށުގެ ހުރިހާ އަވަށަކަށް ވެސް ކަރަންޓް ދެމުން އަންނަނީ އެ އިންޖީނުގެއިންނެވެ. އެހެންވެ އެއިންޖީނުގެ ހުއްޓުމުން މުޅި ރަށުން ކަރަންޓް ކެނޑިގެން ވަނީ ގޮސްފައެވެ.
ފަހަކަށް އައިސް ފެނަކަ އަށް ވަނީ މާލީ ގިނަ މައްސަލަތަކެއް ކުރިމަތިވެފައެވެ.
ތެޔޮ ގަތުމަށްފަހު އެކުންފުނިން އެސްޓީއޯ އަށް ދައްކަން ޖެހިފައިވާ ފައިސާގެ އަދަދު ވެސް 1.8 ބިލިއަން ރުފިޔާއަށް އަރައެވެ. އޭގެ އިތުރުން އެކުންފުނީގެ މަސައްކަތްތައް ކޮށްފައިވާ އެތައް އަމިއްލަ ކުންފުނިތަކަކަށް ފައިސާ ނުދީގެން ވެސް ގިނަ ބަޔަކު އަންނަނީ ޝަކުވާ ކުރަމުންނެވެ.
Advertisement
This content is created and paid for by advertisers and does not involve Voice Journalists
