ކުނި މެނޭޖްކުރުން ގާނޫނީ އިމުގެ ތެރެއިން ކުރިއަށް ގެންދަން އެންވަޔަރަންމަންޓަލް ޕްރޮޓެކްޝަން އެޖެންސީ (އީޕީއޭ) އިން އިލްތިމާސްކޮށްފިއެވެ.
މާލެ ސަރަހައްދުގެ މަގުތަކަށް ކުނި އެޅުމާއި ކުނިނެރިފައި މަގުތަކުގައި ބެހެއްޓުމާ ގުޅޭގޮތުން އީޕީއޭއުން މިއަދު ކުރި އިއުލާނެއްގައި ބުނީ، މިހާރަކަށް އަހިސް މާލެ ސަރަހައްދުގެ މަގުތަކަށާއި ގޭދޮރުމައްޗަށާއި ކަންކަންމައްޗަށް ކުނި ނެރެފައި ބެހެއްޓުން އަދި ކުނި ޖަމާކުރުން ވަރަށް ބޮޑަށް އިތުރުވެފައި ވާކަމަށެވެ.
އޭގެ ސަބަބުން ތަފާތު އެކި އުނދަގޫތައް ކުރިމަތިވަމުން ދާކަން ފާހަގަކޮށް އީޕީއޭއިން ބުނީ މަގުތަކުގެ ސާފުތާހިރުކަން ގެއްލި މަގުތައް ގޮނޑުވަމުންދާ ކަމަށެވެ.
އީޕީއޭއިން ބުނީ، ކުނި ގެންދާނެ ކަމަށް ބަލައި ގޭގެ ދޮރުން ބޭރު، ދުވާރުގައި ނުވަތަ ކަންކަންމަތީގައި ކުނި ބަހައްޓާކަމަށާއި ކުނި ގެންދާ މީހުން އަންގައިގެން ކަމަށް ބުނެ މަގުމައްޗަށް ނު ނެރޭކަން ފާހަގަ ކުރެވިފައި ވާކަމަށެވެ. އަދި ވަކި ގަޑިއެއް ނުބަލާ ކުނި ނެރޭ ކަމަށް އީޕީއޭއިން ވަނީ ފާހަގަ ކޮށްފައެވެ.
މީގެ އިތުރުން، ކުނި އުކާލާ މީހުން ކުނި ބަލާ ގެއަށް ވަނަ ނުދިނުމަށްޓަކައި ކުނި ކޮތަޅު ގެއިން ބޭރުގައި ބަހައްޓާކަމަށް އީޕީއޭއިން ބުންޏެވެ.
އޭގެ އިތުރުން އީޕީއޭއިން ފާހަގަ ކޮށްފައިވާ ކަންތައްތަކުގެ ތެރޭގައި:-
* އެކި މަސައްކަތް ކުރާ ތަންތަނުން ޕިކަޕެއް ފުރެންދެން މަގުމަތީގައި ކުނި ބަހައްޓަމުން ދިއުން
* ފަރުނީޗަރު، ގޮދަޑި، މެޝިން ފަދަ ބަލްކް ކުނި އުކާލުން އަގުބޮޑުކަމަށް ބުނެ މަގުތަކަށް ނެރެފައި ބެހެއްޓުން
* ކުނި ނަގާ ފަރާތްތަކުން ވެހިކަލްތަކަށް ކުނި އެޅުމުގެ ބޭނުމުގައި މަގުތަކުގެ އެކި ތަންތަނަށް ކުނި އަލާފައި ބެހެއްޓުން ހިމެނެެވެ.
އެފަދަ ކަންކަމަކީ ކުނި މެނޭޖް ކުުރުމުގެ ގާނޫނާއި ގަވާއިދު ހުއްދަކުރާ ކަންކަމަށް ނުވާތީ، އެކަންކަން ނުކުރުމަށް އީޕީއޭއިން ވަނީ ނަސޭހަތްތެރި ވެފައެވެ.
"އެއްވެސް ސަބަބަކާ ހުރެ ކުނިވާ ޒާތުގެ ކުނިކޮތަޅުތަކާއި އެހެނިހެން ކުނި މަގުތަކަށާއި ދުވާރުމަތީގައާއި ކަންކަންމަތީގައާއި ހުސްތަންތަނަށް ނެރެފައި ބެހެއްޓުމަކީ ގަވާއިދާ ޚިލާފު ކަމެއް" އީޕީއޭއިން ބުންޏެވެ.
ކުނި އުކާލުމުގެ ހިދުމަތްދޭ މުވައްޒަފަކު، ކުނި ނެރުމަށް ބުނެގެން ނުވާނެ ކަމަށާއި އެފަދައިން ބުނި ނަމަވެސް އެއަށް އަމަލު ކޮށްގެން ނުވާނެ ކަމަށް އީޕީއޭއިން ބުންޏެވެ.
Advertisement
This content is created and paid for by advertisers and does not involve Voice Journalists
