މިދޔަ ފެބްރުއަރީ މަހު އެންމެ ގިނަ އަދަދަކަށް ގްރީން ޓެކްސް ލިބިފައިވަނީ ކ. އަތޮޅުންނާއި ރ. އަތޮޅުން ކަމަށް ފިނޭންސް މިނިސްޓްރީގެ ތަފާސްހިސާބުތަކުން ދައްކާފިއެވެ.

އެގޮތުން ފިނޭންސް މިނިސްޓްރީއިން އާންމުކޮށްފައިވާ ތަފާސްހިސާބުތަކުން ދައްކާ ގޮތުން ފެބްރުއަރީ މަހު ގްރީން ޓެކްސްގެ ގޮތުގައި ލިބިފައިވާ ޖުމްލަ އަދަދަކީ 91.8 މިލިއަން ރުފިޔާއެވެ. މީގެ ތެރެއިން ރިސޯޓް، ގެސްްޓްހައުސް އަދި ހޮޓެލްތަކުން ގްރީން ޓެކްސްގެ ގޮތުގައި ލިބިފައިވަނީ 89.6 މިލިއަން ރުފިޔާއެވެ. އަދި ސަފާރީތަކުން 2.2 މިލިއަން ރުފިޔާ ލިބިފައިވާއިރު ހޯމްސްޓޭ ފެސިލިޓީތަކުން ލިބިފަިއވަނީ 321.5 ރުފިޔާއެވެ.

ގްރީން ޓެކްސްގެ ގޮތުގައި ލިބިފައިވާ ޖުމްލަ އަދަދުގެ ތެރެއިން އެންމެ ގިނަ އަދަދަކަށް ފައިސާ ލިބިފައިވަނީ ކ. އަތޮޅުންނެވެ. އެގޮތުން މި އަތޮޅުން ލިބިފައިވާ 35.1 މލިއަން ރުފިޔާގެ ތެރެއިން 33.2 މިލިއަން ރުފިޔާ އަކީ ރިސޯޓްތަކުން ލިބިފައިވާ ފައިސާއެވެ. އަދި އެ އަތޮޅުގެ ގެސްޓްހައުސްތަކުން ލިބިފައިވާ 1.8 މިލިއަން ރުފިޔާ ވެސް މި އަދަދުގެ ތެރޭގައި ހިމެނެއެވެ.

ދެވަަނައަށް އެންމެ ގިނަ އަދަދަކަށް ގްރީން ޓެކްސް ލިބިފައިވަނީ ރ. އަތޮޅުންނެވެ. އެގޮތުން އެ އަތޮޅުން 7.4 މިލިއަން ރުފިޔާގެ ޓެކްސް ލިބިފައިވެއެވެ. މިއާއިއެކު ދެން އެންމެ ގިނައިން ގްރީން ޓެކްސް ލިބިފައިވަނީ އދ. އަތޮޅުން 7 މިލިއަން ރުފިޔާގެ އަދަދެކެވެ.

ފިނޭންސް މިނިސްޓްރީގެ ހިސާބުތައް ދައްކާގޮތުން ޖަނަވަރީ މަސް ނިމުނުއިރު ގްރީން ފަންޑުގައި ހުރީ ޖުމްލަ 825 މިލިއަން ރުފިޔާއެވެ.