ރައްޔިތުންގެ މަޖިލީހުގެ ކުރީގެ ނައިބު ރައީސް މޫސާ މަނިކު (ރީކޯ މޫސަ) ގެ ކުންފުނި ހެވީ ލޯޑުގެ ކޮޅުވެއްޓިއެއް ށ. ނަލަންދޫ ފަރަށް އެރިތާ ދެ އަހަރު ފާއިތުވެގެން ދިޔައިރުވެސް އެ ކޮޅުވެއްޓި ނަގާފައި ނުވާ ކަމަށާއި، ނެގުމަށް އެތަކެއް ފަހަރު އަންގާފައި ވާކަމަށް އީޕީއޭއިން ބުނެފިއެވެ.

ދެހާސް ވިހި ވަނަ އަހަރުގެ ސެޕްޓެމްބަރު މަހުގެ ނުވަ ވަނަ ދުވަހު މާލެއިން ފުރި އެ ކޮޅުވެއްޓި ނަލަންދޫ ފަރަށް އަރާފައި ވަނީ 2020 ވަނަ އަހަރުގެ ސެޕްޓެމްބަރު މަހުގެ 14 ވަނަ ދުވަހުއެވެ.

ކޮޅުވެއްޓި ފަރަށް އެރީ ފެނަކައިގެ ޖަނަރޭޓަރަކާއި އިތުރު މުދާތަކެއް ހިފައިގެން ދަތުރު ކުރަމުން ދަނިކޮށެވެ

މިކަމާ ގުޅިގެން އީޕީއޭގެ ޑިރެކްޓަރ ޖެނެރަލް އިބްރާހިމް ނަޢީމް "ވޮއިސް" އަށް ވިދާޅުވީ، އެ ކޮޅުވެއްޓި ނެގުމަށް ވަރަށް ގިނަ ފަހަރު އަންގާފައިވާނެ ކަމަށާއި، ނުނެގި ނަމަވެސް އީޕީއޭއަށް ކުރެވޭނެ ކަމެއް ނޯންނާނެ ކަމަށެވެ. އަދި އީޕީއޭގެ މަސައްކަތަކީ، ފަރަށް އަރާ އުޅަނދެއް ނެގުމުން، ފަރަށް ލިބޭ ގެއްލުން ބެލން ކަމަށެވެ.

"ވަރަށް ގިނަ ފަހަރު ނަގަން އެންގީމަވެސް ނުއެއް ނަގާ،" ނަޢީމް ވިދާޅުވިއެވެ.

ޖޫރިމަނާއެއް ކުރެވެން އޮންނާނީ ފަރަށް އެޅި އުޅަނދެއް ނެގުމުންކަން ފާހަގަ ކުރައްވައި ނައީމް ވިދާޅުވީ އީޕީއޭގެ މަސައްކަތަކީ ތިމާވެއްޓަށް ލިބޭ ގެއްލުމާ ގުޅުންހުރި މަސައްކަތްތަކަށް ފިޔަވަޅު އެޅުން ކަަމަށެވެ. 

މީގެ އިތުރުން ނަޢީމް ވިދާޅުވީ، އެ އުޅަނދު ނުނަގާ އޮންނަ ނަމަ އޭގެ ސަބަބުން ވަރަށް ބޮޑެތި ގެއްލުންތައް ވާނެ ކަމަށެވެ. އަދި އޭގެ ސަބަބުން ނަލަންދޫއަށްވެސް ގެއްލުން ވާން ފަށާނެ ކަމަށެވެ.