ގދ. ފަރެސްމާތޮޑާ އެއާޕޯޓް ސަރަހައްދުގައި ގެސްޓްހައުސްގެ ވިޔަފާރިކުރުމަށް ފުރުސަތު ހުޅުވާލައިފިއެވެ.

މިކަމާއި ގުޅިގެން ރީޖަނަލް އެއާޕޯޓްސް ކުންފުނި (އާރްއޭސީއެލް) އިން އާއްމުކުރި އިއުލާނެއްގައި ބުނީ، ދާދިފަހުން ހުޅުވުނު ފަރެސްމާތޮޑާ އެއާޕޯޓް ސަރަހައްދުގައި ގެސްޓްހައުސް ވިޔަފާރި ކުރުމުގެ ފުރުސަތު ދިވެހިންނަށް ހުޅުވާލާފައިވާ ކަމަށެވެ.

އެގޮތުން، ގެސްޓްހައުސް ހިންގުމަށް ޝައުގުވެރިވާ ކުންފުނިތަކުން އެކަމަށް އެދި މިމަހުގެ 26 ވާ ބުދަ ދުވަހުގެ 14:00 ގެ ކުރިން ހުށަހެޅުމަށް އެ ކުންފުނިން ވަނީ އެދިފައެވެ.

ފަރެސްމާތޮޑާ އެއާޕޯޓް ސަރަހައްދުގައި ގެސްޓްހައުސް އެޅުމަށް 18 ބިން ދޫކުރަން ހަމަޖެހިފައިވެއެވެ. އަދި ގެސްޓްހައުސް ހިންގުމަށް ދޫކުރުމަށް ނިންމާފައިވާ ބިމުގެ ބޮޑުމިނުގައި 10،000 އަކަފޫޓް ހުރެއެވެ.

1200 މީޓަރު ދިގު އަދި 30 މީޓަރު ފުޅާ ރަންވޭއާއެކު ހަދާފައިވާ ފަރެސްމާތޮޑާ އެއާޕޯޓަކީ ތިމާވެއްޓާ ރައްޓެހި ގޮތަށް ބަލައިގެން ފަރުމާކޮށްފައިވާ، މީހުން ފުރުވަންދާ ފަރާތްތަކަށް، މަތިންދާބޯޓަށް މީހުން އަރާ މަންޒަރު ފެންނާނެ ތަފާތު އެއާޕޯޓެކެވެ. މި އެއާޕޯޓުގެ ފަސިންޖަ ޓާމިނަލް އަކީ ރަށްތަކުގެ މަލަމަތިން ފެންނަ އޮޑިހަރުގެ ދައްކުވައި ދޭގޮތަށް ފަރުމާ ކޮށްފައިވާ އެއާޕޯޓެކެވެ.