ވޯޓުލާ ވަގުތު އިތުރު ކުރެވޭނެ ހާލަތްތައް ލިޔުމުން ފެންނަން އޮތުމަކީ މުހިންމު ކަމެއް ކަމަށް ރައްޔިތުންގެ މަޖިލިހުގެ ވިލިމާލެ ދާއިރާ މެންބަރު އަޙްމަދު އުޝާމް ވިދާޅުވެއްޖެއެވެ.

އުޝާމް މިހެން ވިދާޅުވީ، މިހާރު ކުރިއަށްދާ، ރައްޔިތުންގެ މަޖިލީހުގެ ކ. ގުރައިދޫ ދާއިރާގެ ބައި-އިލެކްޝަންއަށް ވޯޓުލުމުގެ ވަގުތު އިތުރު ކުރުމާ ގުޅިގެންނެވެ.

އުޝާމް ވިދާޅުވީ، އީސީއިން އިންތިހާބުތަކުގައި ވޯޓުލާ ވަގުތު އިތުރުކުރުމަކީ ކޮމިޝަންގެ މެންބަރުން ބޭނުންވާއިރަށް ކުރެވޭ ކަމެއްގެ ބަދަލުގައި، މިކަން ކުރެވޭނެ ހާލަތްތައް ލިޔުމުން ފެންނަން އޮތުމަކީ މުހިންމު ކަމެއް ކަމަށާއި މިހާރު މިކަންކުރުމުގައި އެއްވެސް 'ކަންސިސްޓެންސީ' އެއް އޮންނަތަން ނުފެންނަ ކަމަށެވެ.

މިއަދު ކުރިއަށްދާ ބައި-އިލެކްޝަންގައި، ވޯޓުނެގުމަށް ހަމަޖެހިފައިވާ ވަގުތުގައި މޫސުން ގޯސްވުމުގެ ސަބަބުން ވޯޓުލާން ދިޔުމަށް ދަތިވެފައިވާތީ ކަމަށް ބުނެ، ވޯޓުލުމުގެ ވަގުތު މިއަދު 17:00އަށް ވަނީ އިތުރު ކޮށްފައެވެ.

މިދާއިރާގެ ބައި-އިލެކްޝަންގައި 3 ސިޔާސީ ޕާޓީގެ ކެނޑިޑޭޓުން ވާދަ ކުރެއެވެ. އެއީ ޕީޕީއެމްގެ ފަރާތުން ހުސައިން ރިޒާ، އެމްޑީޕީގެ ފަރާތުން އިބްރާހިމް ޝާޒް އަދި އެމްއެންޕީގެ ފަރާތުން އަލީ އާރިފްއެވެ.

މި ދާއިރާގެ ރަށްތައް ކަމަށްވާ ގުރައިދޫއާއި މާފުއްޓާއި ގުޅީގެ އިތުރުން މާލޭގައި ވޯޓް ފޮށި ބަހައްޓާފައި ވެއެވެ. އެގޮތުން މާފުށީގައި 3 ވޯޓް ފޮށި ބެހެއްޓިފައިވާއިރު ގުރައިދޫގައި 2 ވޯޓް ފޮށި އަދި މާލެއާއި ގުޅީގައި 1 ވޯޓް ފޮށި ބެހެއްޓިފައިވެއެވެ.

ގުރައިދޫ ދާއިރާގެ ބައި-އިލެކްޝަނަށް ވޯޓް ލުމުގެ ހައްގު ލިބިގެންވަނީ ޖުމްލަ 3423 މީހުންނަށެވެ.

މި ދާއިރާގެ ގޮނޑި ހުސްވެފައިވަނީ ކުރިން އެ މަގާމު ފުރުއްވަމުންދިޔަ ޕީޕީއެމްގެ މެންބަރު އިބްރާހީމް ރިޒާ އަވަހާރާވުމާއި ގުޅިގެންނެވެ.