ޖޫނިއާ ޗެމްބާ އިންޓަނޭޝަނަލް (ޖޭސީއައި) ގެ ފަރާތުން ބޭނުން ޖެހިފައިވާ އާއިލާތަކަށް ހަދިޔާ ޕެކޭޖް ބަހައިފިއެވެ.
'އެކުގައި' ނަމުން ނަން ދެވިފައިވާ މި ޕްރޮގްރާމާ ބެހޭގޮތުން "ވޮއިސް" އަށް މައުލޫމާތު ދެއްވަމުން ޖޭސީއައިގެ ސިޔާސަތާއި ބައިނަލްއަގުވާމީ ގުޅުންތަކާއި ބެހޭ ޚާއްސަ އެޑްވައިޒަރ މުހައްމަދު ހޫދު ވިދާޅުވީ މިއީ ބޭނުން ޖެހިފައިވާ އާއިލާތަކަށް އެހީތެރިކަން ފޯރުކޮށްދިނުމަށްޓަކައި ކުރިއަށް ގެންދާ ޕްރޮގްރާމެއް ކަމަށާއި މި ޕްރޮގްރާމި ކުރިއަށް ގެންދާތާ ދެތިން އަހަރެއް ވެދާނެ ކަމަށެވެ.
ހާއްސަކޮށް ރޯދަމަހާ ގުޅުވައިގެން، އެހީތެރިކަން ބޭނުންވާ އާއިލާތަކަށް ހަދިޔާ ޕެކޭޖް ބެހުމަށް ކުރިއަށް ގެންދިޔަ މި ޕްރޮގްރާމުގައި މިއަދު 30 އާއިލާއަކަށް ޕެކޭޖް ބަހާފައިވާ ކަމަށް ހޫދު ވިދާޅުވިއެވެ.
ހޫދު ވިދާޅުވީ މި ޕްރޮގްރާމް ކުރިއަށް ގެންދިޔައީ ހިޔާ ފްލެޓް ސަރަހައްދުގައި ހަރަކާތްތެރިވާ އާންމު އެކުވެރިންގެ ގުޅުން (އޭއީޖީ) އާއި ގުޅިގެން، އެއްކޮށް އެއްތަނެއްގައި ކަމަށެވެ.
މީގެކުރިން މި ޕްރޮގްރާމް ކުރިއަށް ގެންގޮސްފައިވާ ގޮތަށް ބަލާއިރު، 'ފުޑް ޕެކޭޖް' ގޮތުގައި އެހީ ތެރިކަން ބޭނުންވެފައިވާ ފަރާތްތަކަށް ފޯރުކޮށްދީފައިވާނެ ކަމަށް ހޫދު ވިދާޅުވިއެވެ.
މި ޕްރޮގްރާމް ޖޭސީއާއެކު ޕާޓްނާކުރާ އޭއީޖީއިން، އެހީއަށް ބޭނުންވާ މީހުންގެ ލިސްޓުތަކެއް ގެންގުޅޭކަން ފާހަގަކޮށް ހޫދު ވިދާޅުވީ، މިއީ އާއްމުކޮށް އިއުލާނު ކޮށްގެން، ސޯސަލް މީޑިޔާއާއި ހިޔާ ކޮމިއުނިޓީ ގްރޫޕްތަކުގައި ޖަހައިގެން އެހީ ބޭނުންވާ ފަރާތްތައް ހޯދައި ނަންތައް ނޯޓުކޮށްގެން ހަދާފައިވާ ލިސްޓުތަކެއް ކަމަށެވެ.
މިއަދުގެ ހަރަކާތް ކުރިއަށް ގެންގޮސްފައި ވަނީ ހިޔާ ޓަވަރު 3 އަދި 4 ކައިރީގައެވެ.
Advertisement
This content is created and paid for by advertisers and does not involve Voice Journalists
