ނިމިދިޔަ ގުރައިދޫ ދާއިރާގެ ބައި-އިލެކްޝަން އެމްޑީޕީއަށް ކާމިޔާބު ވުމަކީ ކުރިއަށް އޮތް ރިޔާސީ އިންތިޚާބު ވެސް އެ ޕާޓީއަށް ކާމިޔާބު ވާނެކަމުގެ ހެޔޮ ފާލެއް ކަމަށް އިލެކްޝަން ކޮމިޝަންގެ ކުރީގެ ރައީސް އަދި މިހާރު ސްޓެލްކޯގެ މެނޭޖިން ޑިރެކްޓަރުގެ މަޤާމުގައި ހުންނެވި އަހުމަދު ޝަރީފް ވިދާޅުވެއްޖެ އެވެ.
ޝަރީފު މިފަދައިން ވިދާޅުވެފައި ވަނީ ހުސްވެފައިވާ މަޖިލީހުގެ ގުރައިދޫ ދާއިރާގެ ގޮނޑި އެމްޑީޕީން ކާމިޔާބު ކުރުމާއި ގުޅިގެން އެމްޑީޕީގެ ކެންޑީޑޭޓު ޝާޒަށް މަރުހަބާ ދަންނަވާ ކުރެއްވި ޓްވީޓެއްގަ އެވެ.
ޝަރީފު ސިފަކުރެއްވި ގޮތުގައި ގުރައިދޫ ދާއިރާގެ އިންތިޚާބު އެމްޑީޕީއަށް ކާމިޔާބު ކުރެވުމަކީ ރިޔާސީ އިންތިޚާބު ކާމިޔާބުކޮށް ރައީސުލްޖުމްޙޫރިއްޔާ އިބްރާހިމް މުހައްމަދު ޞާލިހަށް ދެވަނަ ދައުރަށް ލިބުމަށް އޮތް ހެޔޮ ފާލެކެވެ.
ޝަރީފަކީ މި އިންތިޚާބުގައި އެމްޑީޕީއަށް ގޮނޑި ކާމިޔާބު ކޮށްދިނުމަށް ދާއިރާގެ ރަށްތަކަށް ވަޑައިގެން ވަރަށްް ގާތުން އިންތިޚާބުގެ ކަންކަން ބައްލަވާ މަސައްކަތްޕުޅު ކުރެއްވި ބޭފުޅެއްކަން ފާހަގަކޮށްލެވެއެވެ.
"ތީ އަޅުގަނޑުމެން އެމްޑިީޕީ ވަރަށް ފަޚުރުވެރިވާ ގޮނޑިއެއް. އިބްރާހިމް މުޙައްމަދު ޞާލިހަށް ރިޔާސީ އިންތިޚާބު ކާމިޔާބުކުރުމަށް އޮތް ހެޔޮ ފާލެއް. މިހާރު މިސްރާބު ޖަހާފައި މިވަނީ ރިޔާސީ އިންތިޚާބަށް"
ސްޓެލްކޯ އެމްޑީ އަހުމަދު ޝަރީފު
މި އިންތިޚާބަކީ ރިޔާސީ އިންތިޚާބު ބޯމަތިވެފައި އޮތްވާ ބޭއްވި އިންތިޚާބަކަށް ވެފައި، އިންތިޚާބުގައި ރާއްޖޭގައި އޮތް އެންމެ ބޮޑު ދެ ޕާޓީން ވާދަކޮށްފައިވާއިރު، އިންތިޚާބު އެމްޑީޕީއަށް ކާމިޔާބު ކުރެވުމަކީ އެ ޕާޓީ މިހާރު ދަތުރުކަމުންދާ މިސްރާބު ރަނގަޅުކަމަށް ބުނެދޭ ކަމެއްކަމަށް އެމްޑީޕީގެ ސަރުކާރު ފަޅީގެ ބޭބޭފުޅުން ވެސް ދަނީ ވިދާޅުވަމުން ނެވެ.
މި އިންތިޚާބު އެމްޑީޕީން ކާމިޔާބުކޮށްފައި ވަނީ ޕާޓީގެ ރައީސް މުޙައްމަދު ނަޝީދާއި އޭނާގެ ވަފާތެރިން ސަރުކާރާއި ދެކޮޅަށް މަސައްކަތް ކުރަމުންދާ ދަނޑިވަޅެއްގަ އެވެ.
މި ކާމިޔާބަށްފަހު ރައީސް ޞާލިހުގެ ފަހަތްޕުޅުގައި ތިއްބެވި ބޭފުޅުން ވިދާޅުވަމުން ދަނީ ނަޝީދާއި ނުލާވެސް އެމްޑީޕީ ހިންގޭކަން މި އިންތިޚާބުން ޔަގީންވެގެން ދާ ކަމަށެވެ.
Advertisement
This content is created and paid for by advertisers and does not involve Voice Journalists
