އަމީނީމަގު ހެދުމުގެ އެއްބަސްވުމާއި ކުރެހުން އަމިއްލަ ފަރާތަކުން އެދިފައިވާ ގޮތަށް ހާމަކުރަން، އިންފޮމޭޝަން ކޮމިޝަނަރުގެ އޮފީސް (އައިކޮމް) އިން ހައުސިން މިނިސްޓްރީއަށް އެންގީ ރަނގަޅަށް ކަމަށް ހައި ކޯޓުން ނިންމި ނިންމުން ދައުލަތުން ސްޕްރީމް ކޯޓުގައި އިސްތިއުނާފްކޮށްފި އެވެ.
އެޓަނީ ޖެނެރަލްގެ އޮފީހުން ހައިކޯޓުގެ ހުކުމް ސުޕްރީމް ކޯޓުގައި އިސްތިއުނާފު ކުރީ މިދިޔަ ބުރާސްފަތި ދުވަހު އެވެ.
އަމިއްލަމީހަކު، އަމީނީމަގު ތަރައްޤީ ކުރުމުގެ މަޝްރޫޢާއި ގުޅިގެން ފަސް ކަމެއް ސާފުކުރުމަށް ޕްލޭނިން މިނިސްޓްރީއަށް ހުށައަޅައި އޭގެ ތެރެއިން މަޝްރޫޢުގެ ތަފުސީލީ ކުރެހުމާއި، މިނިސްޓްރީއާއި އާރުޑީސީގެ މެދުގައި ހެދި އެއްބަސްވުން ހާމަނުކުރުމަށް އެމިނިސްޓްރީން ނިންމިއެވެ. އެ ނިންމުން އިންފޮމޭޝަން ކޮމިޝަނަރުގެ އޮފީހުގައި އިލްތިމާސްކުރުމުން ކޮމިޝަނަރު ނިންމެވީ އެ މައުލޫމާތަކީ ހާމަކުރަންޖެހޭ މައުލޫމާތު ކަމަށެވެ.
ނަމަވެސް އިންފޯމޭޝަން ކޮމިޝަނަރުގެ ނިންމެވުމަކީ ޤާނޫނާ ޚިލާފު ނިންމުމެއްކަމަށް ބުނެ ހައިކޯޓުގައި މިނިސްޓްރީން އެ ނިންމުން އިސްތިއުނާފުކުރިއެވެ.
ހައިކޯޓުގައި މިމައްސަލަ ބެއްލެވީ ފަނޑިޔާރު ހަސަން ޝަފީއު އާއި ފަނޑިޔާރު ހުޒައިފާ މުހައްމަދު އަދި ފަނޑިޔާރު މުހައްމަދު ސަލީމެވެ. ބެންޗުގެ ރިޔާސަތަކީ ފަނޑިޔާރު ޝަފީއު އެވެ. ފަނޑިޔާރުންގެ ބެންޗުން ނިންމާފައިވަނީ އިންފޮމޭޝަން ކޮމިޝަނަރުގެ އޮފީހުގެ ނިންމުމަށް ތާއީދު ކުރުމަށެވެ. އަދި މި ނިންމުމަށް ހައި ކޯޓުން ތާއީދުކުރީ އެ މައްސަލަ ބެއްލެވި ފަނޑިޔާރުންގެ އިއްތިފާގުންނެވެ.
ހައި ކޯޓުން ކުރި ހުކުމުގައިވަނީ އެ މައުލޫމާތުތައް ހޯދަން އެދުމުން އެ ހާމަ ނުކުރެވޭނެ ކަމަށް ޕްލޭނިން މިނިސްޓްރީން ބުނެފައި ވިޔަސް، އެގޮތަށް ބުނެފައިވަނީ މައުލޫމާތު ނުދެވޭނެ ގާނޫނީ ކޮން ސަބަބެއް އޮވެގެންކަން އެ މިނިސްޓްރީއަށް ބުނެދެވިފައިނުވާ ކަމަށެވެ. އެހެންކަމުން ސަބަބު ބަޔާން ކުރުމެއް ނެތި މައުލޫމާތު ދޭން ދެކޮޅު ހެދުމަށްފަހު އިންފޮމޭޝަން ކޮމިޝަނަރުގެ އޮފީހުން އެ މައްސަލަ ބަލަން ފެށުމުން އާ ސަބަބުތަކެއް ނުދެއްކޭނެ ކަމަށް ހުކުމްގައި ބުނެފައިވެއެވެ. އަދި އެގޮތަށް އަމަލު ކުރާނަމަ ގާނޫނުގައި ބުނާ އިސްތިއުނާފްގެ ފުރުސަތު ގެއްލިގެންދާ ކަމަށް ހުކުމުގައިވެ އެވެ.
މީގެ އިތުރުން އެ މައުލޫމާތަކީ ގާނޫނުގައި ބުނާ ފަދަ އިސްތިސްނާ ހާލަތްތަކަށް ފެތޭ މައުލޫމާތެއް ކަން ޕްލޭނިން މިނިސްޓްރީއަށް ކޯޓުގައި ބުނެދެވިފައެއް ނުވާ ކަމަށާއި، އެ މައުލޫމާތު ދޭން ދެކޮޅު ހަދަނީ ތިން ވަނަ ފަރާތެއްގެ މަސްލަހަތު ހިމެނޭތީ ކަމަށް ޕްލޭނިން މިނިސްޓްރީން ބުނެފައި ވިޔަސް، ތިން ވަނަ ފަރާތުގެ ތެރޭގައި ދައުލަތުގެ އިދާރާތައް އޭގެ ތެރޭގައި ނުހިމެނޭނެ ކަމަށް ގާނޫނުގައި ބުނެފައިވާ ކަމަށް ހުކުމުގައިވެ އެވެ.
Advertisement
This content is created and paid for by advertisers and does not involve Voice Journalists
