ތަޖުރިބާކާރު ޑޮކްޓަރުންނާއި އެކު އައިޖީއެމްއެޗްގެ ހިތުގެ ބަލިތަކަށް ޚާއްސަ ވޯކްޝޮޕް، ކޮމްޕްލެކްސް ޕީ.ސީ.އައި ވިތު އިމޭޖިންގ، މިމަހު ފަހު ކޮޅު ބޭއްވުމަށް ހަމަޖެހިއްޖެއެވެ. މިއީ އައި.ޖީ.އެމް.އެޗް ގެ ނޭޝަނަލް ކާޑިއެކް ސެންޓަރުން ބާއްވާ މިފަދަ ދެވަނަ މަސައްކަތު ބައްދަލުވުމެވެ.

އައިޖީއެމްއެޗް އިން ބުނީ މި ބައްދަލުވުން ބޭއްވުމަށް ހަމަޖެހިފައިވަނީ މި އޭޕްރިލް މަހުގެ 28، 29 އަދި 30 ވަނަ ދުވަހު ކަމަށެވެ.

މިއާއެކު އެ ހޮސްޕިޓަލުން ބުނީ މިފަހަރުގެ ބައްދަލުވުމުގައި ބޭރުގެ 4 ކާޑިއޮލޮޖިސްޓުން ކިޔަވައިދިނުމުގައި ބައިވެރިވެ ވަޑައިގަންނަވާނެ ކަމަށެވެ. އެއީ އިޓަލީގެ ޑރ. އިމާދު ޝައިބާންއާއި، ޖަރުމަނުގެ ޑރ. ޖެރަލްޑް ވާރނަރ އާއި އިންޑިއާގެ ޑރ. ޕަރަތާޕް ކުމާރު އާއި، ބަންގްލަދޭޝްގެ ޑރ. ޤުލާމް އަޒަމްއެވެ. މީގެ އިތުރުން އަދި މި ބައްދަލުވުމުގައި އައި.ޖީ.އެމް.އެޗް ގެ 4 ކާޑިއޮލޮޖިސްޓުންވެސް ކިޔަވައިދިނުމުގައި ބައިވެރިވާނެ ކަން އައިޖީއެމްއެޗް އިން ވަނީ ފާހަގަކޮށްފައެވެ.

Advertisement

އައިޖީއެމްއެޗް އިން އިތުރަށް ބުނީ، މި ބައްދަލުވުމަށް މިފަހަރު 30 އަށްވުރެ ގިނަ ރާއްޖެއިންބޭރުގެ ކާޑިއޮލޮޖިސްޓުން ތަމްރީނު ހޯދުމަށްޓަކައި ވަޑައިގަތުމަށް ހަމަޖެހިފައިވާ ކަމަށެވެ.

މި މަސައްކަތު ބައްދަލުވުމުގެ މަގްސަދަކީ ފަސޭހައިން ނުހުޅުވޭގޮތަށް ބެދިފައިހުންނަ ހިތުގެ ހޮޅިތައް އެކިވައްތަރުގެ ޒަމާނީ ވަސީލަތްތައް ބޭނުންކޮއްގެން އަދި ހިތުގެ ހޮޅީގެ އެތެރެއަށް ލައްވާ ސްކޭންކުރާ ކެމެރާތަކުގެ އެހީގައި ހުޅުވާނެގޮތްތައް ކިޔަވައިދިނުން ކަމަށް ވެސް އައިޖީއެމްއެޗުގައި ބުނެއެވެ. އަދި މި ކިޔަވާދެއްވުމަށް ވަޑައިގަންނަވާ ބޭފުޅުންނަކީ މި ހުނަރާއި ތަޖުރިބާގައި ދުނިޔެއަށް މަޝްހޫރު ބޭފުޅުން ކަން އައިޖީއެމްއެޗް އިން ފާހަގަކޮށްފައިވެ އެވެ.