ރ.މަޑުއްވަރީ ކައުންސިލްގެ ފަރާތުން މިއަހަރުގެ ފިތުރު އީދު ބަންދުގައި އެރަށުގައި ބާއްވާ ފުޓްސަލް މުބާރާތުގެ ގުރުއަތުލުން ބާއްވައިފި އެވެ.

ދެ ޑިވިޝަނަކަށް ބަހާލައިގެން އޭޕްރިލް 21-28 އަށް ބޭއްވުމަށް ހަމަޖެހިފައިވާ މި މުބާރާތުގައި 10 ޓީމަކުން ވަނީ ބައިވެރިވެފަ އެވެ. އެއީ އަންހެން 3 ޓީމާއި ފިރިހެން 7 ޓީމެވެ.

މުބާރާތުގެ އަންހެން ޑިވިޝަންގެ މެޗުތައް ލީގު އުސޫލުން އެއްބުރު ކުޅެ އެންމެ ގިނަ ޕޮއިންޓް ލިބޭ ދެ ޓީމުގެ މެދުގައި ފައިނަލް ކުޅޭ އިރު، ފިރިހެން ޑިވިޝަންގެ މެޗުތައް ކުރިއަށް ގެންދިއުމަށް ހަމަޖެހިފައިވަނީ ދެ ގްރޫޕަކަށް ބަހާލައިގެންނެވެ. ކޮންމެ ގުރޫޕަކުން އެއްވަނަ އަދި ދެވަނައަށް ދާ ދެ ޓީމު ސެމީ ފައިނަލަށް ހޮވޭ އިރު މުބާރާތުގެ ދެ ޑިވިޝަންގެ ވެސް ފައިނަލް މެޗު ކުޅުމަށް ހަމަޖެހިފައިވަނީ އެޕްރިލް މަހުގެ 28 ވަނަ ދުވަހުގެރޭ އެވެ.

Advertisement

މި މުބާރާތާއި ބެހޭގޮތުން ވޮއިސް އަށް މައުލޫމާތު ދެމުން މަޑުއްވަރީ ކައުންސިލްގެ ފަރާތުން އަހުމަދު ސައީދު ބުނީ މި ރަށުގައި ކޮންމެ އަހަރަކުވެސް އީދު ބަންދާއި ދިމާކޮށް ފުޓްބޯޅަ މުބާރާތެއް ބާއްވާކަމަށާއި، ނަމަވެސް އެކި ސަބަބުތަކާ ހުރެ 2018 ވަނަ އަހަރަށް ފަހު އެކަން ހުއްޓިފައިވާ ކަމަށެވެ. 

މިވަގުތު ރާއްޖޭގައި އެންމެ ހަލުވިކަމާއެކު ކުރިއަރަމުން އަންނަ ކުޅިވަރަކީ ފުޓްސަލް ކަމަށްވެފައި މިރަށުގެ ޒުވާނުންނަށް ފުޓްސަލްގައި ކުރިއަށް ދިއުމުގެ ފުރުސަތު ތަނަވަސް ކޮށްދިނުމުގެ ގޮތުން ބާއްވާ މުބާރާތެއްމިއީ، މީގެ ސަބަބުން ޒުވާނުންގެ މެދުގައި އެކުވެރިކަން އާލާވެ ދުޅަހެޔޮ މުޖުތަމައެއް ބިނާކުރުމަށް މަގުފަހިވެގެންދާނެކަމަށް އަޅުގަނޑުމެން ގަބޫލު ކުރަނީ..

މީގެއިތުރުންވެސް މި މުބާރާތުގެ ފެންވަރު ރަނގަޅުކުރުމަށް ކޮންމެ ޓީމެއް ގައި ވެސް ރަށުން ބޭރުގެ ދެ ކުޅުންތެރިން ހިމެނުމުގެ ފުރުސަތު ދީފައިވާނީ، އަދި އޭގެ ސަބަބުން މިރަށުގެ ޒުވާން ކުޅުންތެރިންނަށް މުސްތަގުބަލުގައި އޭގެ ފައިދާ ކުރާނެކަމަށް ސައީދު ބުންޏެވެ.