ފަލަކީ ހިސާބުތަކުން ދައްކާ ގޮތުގައި މި އަހަރުގެ ފިޠުރު ޢީދު ދުވަހަކީ ހުކުރު ދުވަސް ކަމަށް ކުރީގެ ރައީސް މައުމޫން ޢަބްދުލް ޤައްޔޫމް ވިދާޅުވެއްޖެއެވެ.
މައުމޫން ވިދާޅުވީ އިތުބާރު ހުރި ފަލަކީ ހިސާބު ކަށަވަރުކޮށްދޭ ގޮތުގައި، މި ހިނގާ 1444 ވަނަ އަހަރުގެ ރަމަޟާން މަސް ވާނީ 29 ދުވަހުގެ މަހަކަށް ކަމަށެވެ. ސަބަބަކީ 20 އެޕްރީލް 2023 ވާ ބުރާސްފަތި ދުވަހުގެ އިރުއޮއްސުމަށްފަހު ވަރަށް ގިނަ އިސްލާމީ ޤައުމުތަކަށް ހަނދު ނޯއްސި ހުންނާނެތީ ކަމަށް މައުމޫން ވިދާޅުވިއެވެ.
"މިގޮތުން، ދިވެހިރާއްޖެއަށް އެދުވަހު އިރުއޮއްސެނީ ހަވީރު 6:11 މިނެޓުގައި. ހަނދު އޮއްސެނީ 6:27 މިނެޓުގައި. އެހެންކަމުން، އެދުވަހު އިރުއޮއްސުމަށްފަހު 16 މިނެޓުއިރު ރާއްޖެއަށް ހަނދު ނޯއްސި ހުންނާނެ" މައުމޫން ވިދާޅުވިއެވެ.
މީގެ އިތުރުން މައުމޫން ވިދާޅުވީ މިއަދުގެ އިރުއޮއްސުމަށްފަހު މައްކާއަށް 24 މިނެޓު ހަނދު ނޯއްސި ހުންނާނެ ކަމަށާއި މިސުރަށް 27 މިނެޓު ހަނދު ނޯއްސި ހުންނާނެ ކަމަށެވެ. އަދި އިންޑޮނީޝިޔާގެ ޖަކާޓާއަށް 9 މިނެޓް ހަނދު ނޯއްސި ހުންނާނެ ކަމަށެވެ.
މީގެ އިތުރުން ތުރުކީއަށް 31 މިނެޓު ، މޮރޮކޯގެ ރަބާޠަށް 35 މިނެޓު، ސައުތު އެފްރިކާގެ ކޭޕް ޓައުނަށް 13 މިނެޓް އަދި އާޖެންޓީނާގެ ބުއެނޮސް އެއާރީސްއަށް 20 މިނެޓު ހަނދު ނޯއްސި ހުންނާނެ ކަމަށް މައުމޫން ވިދާޅުވިއެވެ.
އެހެންކަމުން، މިއަހަރުގެ ޝައްވާލު މަހުގެ 1 ވާނީ، ފަލަކީ ހިސާބުން ދައްކާގޮތުގައި، މި އެޕްރީލް މަހުގެ 21 ވާ ހުކުރު ދުވަހަށް ކަމަށް މައުމޫން ވިދާޅުވިއެވެ.
Advertisement
This content is created and paid for by advertisers and does not involve Voice Journalists
