ރާއްޖޭގެ ސަރަހައްދީ އިން ކަނޑައެޅުމާ ގުޅޭ ގޮތުން ޖަރުމަނުގައި ހުންނަ އިންޓަނޭޝަނަލް ޓްރައިބިއުނަލް ފޯ ދަ ލޯ އޮފް ދަ ސީ (އިޓްލޮސް) އަށް ހުށަހަޅާފައިވާ މައްސަލައިގައި ގޮތެއް ކަނޑައެޅުމަށް އަންނަ ހުކުރު ދުވަހަށް ތާވަލުކޮށްފި އެވެ. 

އިޓްލޮސް އިން ނެރެފައިވާ ނޫސްބަޔާނެއްގައި ބުނެފައި ވަނީ މި މައްސަލައިގައި ގޮތެއް ކަނޑައެޅުން އޮންނާނީ މިމަހުގެ 28 ވަނަ ދުވަހުގެ 11:00 ގައި ކަމަށެވެ. އެއީ ރާއްޖެ ގަޑިން 8:00 ގައެވެ.

ރާއްޖެއާ ދެކޮޅަށް މޮރިޝަސް އިން އިޓްލޮސްއަށް ހުށަހަޅާފައި ވަނީ ރާއްޖެއާއި މޮރިޝަސްގެ އިގްތިސޯދީ ހާއްސަ ސަރަހައްދާއި ކޮންޓިނެންޓަލް ޝެލްފްގެ ބައުންޑަރީ ކަނޑައަޅައިދިނުމަށެވެ. މި މައްސަލަ އިޓްލޮސްއަށް ހުށަހެޅި ހިސާބުން ފެށިގެން ރާއްޖެއިން އަންނަނީ އެ މައްސަލަ އިޓްލޮސްއަށް ނުބެލޭނެ ކަމަށް ވަކާލާތުކުރަމުންނެވެ.

މި މައްސަލައިގައި ރާއްޖޭގެ ފަރާތުން ވަކާލާތު ކުރައްވަނީ ބަންޑާރަ ނައިބް އިބްރާހިމް ރިފްއަތާއި ބަންޑާރަ ނައިބުގެ ނައިބު، ހަދީޖާ ޝަބީން އެވެ.

މި މައްސަލައިގެ އަޑުއެހުންތައް މީގެ ކުރިންވެސް ކުރިއަށް ގެންގޮސްފައިވާއިރު، ޗާގޯސްއަކީ މޮރިޝަސްގެ ބައެއްގެ ގޮތުގައި ބަލައިގަނެ، އެ ގައުމާ އެއްކޮޅަށް އދ. ގައި ވޯޓު ދިނުމަށް ރާއްޖެއިން މިދިޔަ އަހަރު ވަނީ ނިންމާފައެވެ.

އެއާއެކު މި ނިންމުމަކީ އިމުގެ މައްސަލައިގައި ހިލާފު އުފެދިފައިވާ ސަރަހައްދު މޮރިޝަސް އަށް ދޭން ނިންމުން ކަމަށް ވިދާޅުވެ ކުރީގެ ބަންޑާރަ ނައިބުކަން ކުރައްވާފައިވާ ފަރާތްތައް އަދި ކަނޑުގެ ސަރަހައްދު ކަނޑައެޅުމުގައި ހަރަކާތްތެރިވެފައިވާ ފަރާތްތައް ގެންދަނީ ސަރުކާރަށް ބޮޑެތި ފާޑުކިޔުންތަކެއް އަމާޒުކުރަމުން ނެވެ. 

ސަރުކާރަށް ފާޑުކިޔުންތައް އަމާޒުވަމުން ދިއުމާއި ގުޅިގެން، ދިފާއުގައި ސަރުކާރުން ބުނީ ސްޓޭންޑު ބަދަލުކުރީ ޗާގޯސްގެ މިނިވަންކަމާއި މެދުގައި ކަމަށާއި، އިމުގެ މައްސަލައިގައި ދައުލަތުގެ ސްޓޭންޑު ބަދަލު ނުކުރާ ކަމަށެވެ. 

ޗާގޯސް މައްސަލައިގައި ރައީސުލްޖުމްހޫރިއްޔާ އިބްރާހިމް މުޙާއްމަދު ޞާލިހު މޮރިޝަސްގެ ބޮޑުވަޒީރަށް ސިއްރު ސިޓީފުޅެއް ފޮނުވާފައިވާ މައްސަަވެސް ވަނީ ހޫނުވެފަ އެވެ.

ކުރީގެ ބަންޑާރަ ނައިބު ޑރ މުނައްވަރުގެ އިތުރުން އެމްޑީޕީގެ ބައެއް މަޖިލީސް މެމްބަރުން ގެންދަވަނީ ޗާގޯސް މައްސަލައިގައި ސަރުކާރުގެ ސްޓޭންޑު ބަދަލުކުރީ ފައިސާގެ ޑީލެއް ހަދައިގެންކަމަށް ތުހުމަތު ކުރައްވަމުން ނެވެ. 

މި މައްސަލައިގައި ގޮތް ނިންމުން ހުކުރު ދުވަހަށް ތާވަލުކޮށްފައިވާއިރު، މި މައްސަލަ ރާއްޖެއާއި ދެކޮޅަށް ނިމިއްޖެ ނަމަ ރާއްޖޭގެ ކަނޑުގެ ސަރަހައްދުން ބައެއް ގެއްލޭނެކަމަށް ޤާނޫނީ ފަންނުގެ ބޭބޭފުޅުން އިއްތިފާގު ވެއެވެ. އަދި އެކަމުގެ ޒިންމާ ސަރުކާރުން ނަގަން ޖެހޭނެކަމަށް އެ ފަރާތްތައް ދަނީ ވިދާޅުވަމުން ނެވެ.