ސައޫދީ ކިންގް ކަޕްގެ ސެމީ ފައިނަލުގެ ދެވަނަ މެޗުގައި މިރޭ ރަށުން ބޭރުގައި އަލް ނަސްރު ބަލިކޮށް އަލް ވެހްދާ މުބާރާތުގެ ފައިނަލްގެ ޖާގައެއް ކަށަވަރުކޮށްފިއެވެ.

މިދެޓީމު އެންމެ ފަހުން ސައުދީ ލީގުގައި ކުޅުނު މެޗު 4-0 ގެ ނަތީޖާއަކުން އަލް ނަސްރު މޮޅުވެފައި އޮތުމުން މިރޭގެ ސެމީ ފައިނަލް މެޗު އެޓީމަށް ފަސޭހަ މެޗަކަށް ވާނެކަމަށް ގިނަބަޔަކު ތިބީ ގަބޫލުކޮށްގެންނެވެ.

ލީގުގައި އެންމެ ފަހުން ކުޅުނު ދެ މެޗުން މޮޅެއް ނުހޯދި، އެއްވަނައިގައި އޮތް އަލް އިއްތިހާދާއި ދެމެދުގައި ތިން ޕޮއިންޓްގެ ފަރަގެއް ވާއިރު، ސައުދީ ސުޕަކަޕްގެ ފައިނަލުގައި އެޓީމު ބަލިވީ ވެސް އަލް އިއްތިހާދު އަތުންނެވެ.

މި ހުރިހާ ސަބަބަކާއި ހުރެ މިސީޒަނުގައި ތައްޓެއް ކާމިޔާބު ކުރުމުގެ އެންމެ ފަސޭހަ ފުރުސަތަކަށް އޮތީ މިރޭގެ މެޗުން މޮޅުވެ ފައިނަލުގައި އަލް ހިލާލް ބަލިކުރުމެވެ.

ނަމަވެސް މެޗުގެ ކުޅުން ފެށުމާއެކު ފެނިގެންދިޔައީ މުޅިން ތަފާތު މަންޒަރެކެވެ. އަލް ވަހްދާގެ ކުޅުންތެރިން ރޭވުންތެރިކަމާއެކު ޑިފެންސިވް ގޭމެއް ކުޅެމުންދިޔައިރު، އަލް ނަސްރުގެ ކުޅުންތެރިންގެ ފަރާތުން ފެނިގެންދިޔައީ ފަރުވާކުޑަކަމާއި އެއްވެސްކަހަލަ ރޫހެއްނެތި ކުޅެމުންދިޔަ މަންޒަރެވެ. ނަތީޖާއެއްގެ ގޮތުން ފުރަތަަމަ ހާފުގައި އަލް ވަހްދާ އިން ގޯލާއި އަމާޒުކޮށް ފޮނުވާލި ހަމައެކަނި ހަމަލާގައި އެޓީމުން ލަނޑެއް ކާމިޔާބުކޮށް މެޗުގެ ލީޑު ހޯދިއެވެ.

މިލަނޑު ފުރަތަަމަ ހާފުގެ 23 ވަނަ މިނެޓުގައި ކާމިޔާބުކޮށްދިނީ އެޓީމުގެ ފްރާންސް ފޯވާޑް ޑޭވިޑް ބިއުގުއެލް އެވެ. މިއީ އެޓީމުގެ ކޮސްޓަރީކާ ޑިފެންޑަރު އޮސްކާ ޑުއާޓޭ ގޯލު ކުރިމައްޗަށް ހުރަސްކޮށްދިން ބޯޅައެއް ގޯލުގެ ތެރެއަށް ފޮނުވާލައިގެން އޭނާ ކާމިޔާބުކޮށްދިން ލަނޑެކެވެ.

ފުރަތަަމަ ހާފުގައި ވެސް އަދި ދެވަނަ ހާފުގައި ވެސް ލަނޑުޖަހާނެ ގިނަ ފުރުސަތުތަކެއް މި މެޗުގައި އަލް ނަސްރަށް ލިބުނު އިރު، ދެވަަނަ ހާފުގެ 53 ވަނަ މިނެޓުގައި އަލް ވަހްދާގެ ކުޅުންތެރިއަކު އެޓީމުގެ ޕެނަލްޓީ އޭރިއާ ބޭރުން ކްރިސްޓިއާނޯ ރޮނާލްޑޯއަށް ކުރި ފައުލަކާއި ގުޅިގެން ރެފްރީ ވަނީ އޭނާއަށް ދެވަނަ ރީނދޫ ކާޑާއެކު ރަތް ކާޑެއް ދައްކާ ދަނޑުން ފޮނުވާލައިފައެވެ.

މިމެޗުގައި އަލް ނަސްރުގެ ޓަލިސްކާއާއި ގަރީބުގެ އިތުރު ކްރިސްޓިއާނޯ ރޮނާލްޑޯ ފޮނުވާލި ނުރައްކާތެރި ހަމަލާތައް ދިފާއުކުރުމުގައި އަލް ވަހްދާގެ މޮރޮކޯ ގޯލްކީޕަރު މުނީރު ވަނީ މޮޅު ކުޅުމެއް ދައްކައިދީފައެވެ. އަދި ފަހުހާފު ނިމެން އުޅެނިކޮށް އަލް ވަހްދާގެ ޕެނަލްޓީ އޭރިއާ ތެެރެއިން މުޅިން ހުސްކޮށް ހުރެ ކްރިސްޓިއާނޯ ރޮނާލްޑޯ ފޮނުވާލި ބޯޅަ އަމާޒުވީ ގޯލުގެ ހުރަސް ދަނޑިއަށެވެ.