ވ.ކެޔޮދޫ މިސްކިތުގައި ހުރި މުސްހަފުތައް ވީދައި، މިސްކިތުގެ ބިއްލޫރިގަނޑު ތަޅާލައި މިސްކިތަށް ގެއްލުންދިންކަމަށް ތުހުމަތުވާ މީހާ ޝަރީޢަތް ނިމެންދެން ބަންދުގައި ބަހައްޓަން ކޯޓުން އަމުރުކޮށްފިއެވެ.

ކެޔޮދޫ މިސްކިތުގެ ބިއްލޫރި ގަނޑު ތަޅާލައި މިސްކިތަށް ގެއްލުންދިން މައްސަލައިގައި ހައްޔަރުކޮށްފައި ވަނީ ޢުމުރުން 27 އަހަރުގެ ދިވެހި ފިރިހެނެއް ކަމަށް ފުލުހުން މައުލޫމާތު ދެއެވެ 

އެމީހާ އަތުލައިގަތީ ރޭގެ ވަގުތެއްގައި މިސްކިތް ކައިރީގައި އުޅޭ ޒުވާނެކެވެ. އެޒުވާނާ ބޭރަށް ނުކުތް ވަގުތު ބިއްލޫރިގަނޑެއް ތަޅައިގެންދިޔަ އަޑު އިވިގެން ކިހިނެއް ވެގެން އުޅޭ ކަމެއްތޯ ބެލިއިރު، މިސްކިތަށް ގެއްލުން ދިނުމަށްފަހު މީހަކު މިސްކިތުން ނުކުމެގެން ދަނީއެވެ. އެވަގުތު އޭނާ ހިފަހައްޓައި ފުލުހުންނާ ވަނީ ހަވާލުކޮށްފައެވެ.

ފުލުހުންގެ މީޑިއާ އޮފިޝަލަކު ވިދާޅުވީ އޭނާގެ ބަންދުގެ މުއްދަތު އިތުރު ކުރުމުގެ ގޮތުން ކޯޓަށް ހާޒިރު ކުރުމުން، ޝަރީއަތުން ގޮތެއް ނިންމަންދެން ބަންދު ކުރުމަށް އަމުރު ކޮށްފައިވާ ކަމަށެވެ.

ކެޔޮދޫ މިސްކިތަށް ގެއްލުންދިން މައްސަލާގައި މީހަކު ހައްޔަރުކޮށްފައި މިވަނީ، މިސްކިތުގައި ހުރި ގިނަ ޢަދަދެއްގެ މުސްޙަފް ވީދާ މައްސަލައެއް ފެންމަތިވެފައި ވަނިކޮށެވެ.

އެގޮތުން މިސްކިތުގައި ހުރި ގިނަ ޢަދަދެއްގެ މުސްޙަފްތައް ވިދާލާފައިވާއިރު، އެންމެ ފުރަތަމަ އެކަން ފާހަގަވީ މިދިޔަ އަހަރުގެ އޮކްޓޫބަރުމަހު ކަމަށް އެރަށު ކައުންސިލުން މައުލޫމާތު ދެއެވެ. އެފަހަރު 10 މުސްޙަފް ވިދާލައިފައިވާއިރު، މިދިޔަ ހޮނިހިރު ދުވަހު 20 މުސްޙަފް ވިދާލާފައިވާކަމަށް ކައުންސިލުން ބުނެފައިވެއެވެ.