ރަށުގައި ހުރެ ވެސް ޑިޖިޓަލް ލައިސަންސްގެ ހިދުމަތް ހޯދޭނެ އިންތިޒާމު ޓްރާންސްޕޯޓް މިނިސްޓްރީން ހަމަޖައްސައިދީފި އެވެ.
އަންގާރަ ދުވަހު އެ މިނިސްޓްރީން ބުނެފައި ވަނީ މިހާރު ރާއްޖޭގެ ކޮންމެ ރަށެއްގައިވެސް ޑިޖިޓަލް ލައިސަންސްގެ ހިދުމަތް ހޯދޭނެކަމަށެވެ.
އެގޮތުން ސިމްސް އޮންލައިން ޕޯޓަލް މެދުވެރިކޮށް މިދިޔަ ފެބްރުއަރީ މަހުން ފެށިގެން މިހާތަނަށް 25،000 އެޕްލިކޭޝަނަށް ޑިޖިޓަލް ލައިސަންސްގެ ހިދުމަތް ދީފައިވާ ކަމަށްވެސް އެ މިނިސްޓްރީން ބުނެއެވެ.
މީގެ އިތުރުން އެ ޕޯޓަލް މެދުވެރިކޮށް އަތޮޅުތަކުގައި "އޭ" ޒޯން ލައިސަންސް ދިނުމަށް ކަނޑައަޅާފައިވާ ހުރިހާ ކައުންސިލްތަކުންވެސް ހިދުމަތް ލިބޭނެ ކަމަށް މިނިސްޓްރީން ބުނެއެވެ. މިނިސްޓްރީން ވަނީ އެ ޕޯޓަލް އަށް އެއްވެސް މައްސަލަ އެއް ދިމާވެއްޖެނަމަ އެކަން އެންގުމަށް އެދިފައެވެ. އަދި ޕޯޓަލް އަށް ދިމާވާ މައްސަލަތައް ހައްލުކުރަން އެ މިނިސްޓްރީން މަސައްކަތްކުރާ ކަަމަށް ވެސް ބުނެފައިވެއެވެ.
އެއްގަމުގައި ދުއްވާ އިންޖީނުލީ އުޅަނދުފަހަރު ދުއްވުމުގެ ލައިސަންސް ރައްކާތެރިކަމާއި ފަސޭހަކަމާއެކު ރައްޔިތުންނަށް ހޯދައި ދިނުމުގެ މަގުފަހިކުރުމަށްޓަކައި މިނިސްޓްރީ އޮފް ޓްރާންސްޕޯޓް އެންޑް ސިވިލްއޭވިއޭޝަންއިން އަލަށް ތައާރުފު ކުރި "ސިމްސް" ޕޯޓަލް އަކީ ކޮންމެ މީހަކަށްވެސް އެ މީހެއްގެ އީ ފާސް އެކައުންޓް ބޭނުންކޮށްގެން ފަސޭހަކަމާއެކު ޚިދުމަތް ހޯދޭގޮތަށް ފަރުމާކޮށްފައިވާ ޚިދުމަތެއް ކަމަށް މިނިސްޓްރީން ފާހަގަކުރެއެވެ.
Advertisement
This content is created and paid for by advertisers and does not involve Voice Journalists
