އިގިރޭސި ޕްރިމިއާ ލީގުގައި މިރޭ އަމިއްލަ ދަނޑުގައި ތާވަލުގެ އެއްވަނައިގައި އޮތް އާސެނަލް 4-1 ނަތީޖާއަކުން ބަލިކޮށް ޗެމްޕިއަން މެންޗެސްޓާ ސިޓީ އިން އެޓީމުގެ ފެންވަރު ދައްކާލައިފި އެވެ.

މިރޭގެ މެޗުގެ ފުރަތަަމަ ހާފުގައި މެންޗެސްޓާ ސިޓީ އިން ދެ ލަނޑުގެ ލީޑެއް ނެގިއިރު، އެޓީމުގެ ފުރަތަަމަ ލަނޑު 7 ވަނަ މިނެޓުގައި ހާލަންޑް ތަނަވަސްކޮށްދިން ފުރުސަތެއްގައި ކާމިޔާބުކޮށްދިނީ ކެވިން ޑިބްރޭނާ އެވެ. އަދި ފުރަތަަމަ ހާފުގެ އިތުރު ވަގުތުގައި އެޓީމުގެ ދެ ވަނަ ލަނޑު ކާމިޔާބުކޮށްދިނީ އެޓީމުގެ އިގިރޭސި ޑިފެންޑަރު ޖޯން ސްޓޯން އެވެ. މިއީ ޑިބްރޭނާ ތަނަވަސްކޮށްދިން ފުރުސަތެއްގައި އޭނާ ކާމިޔާބުކޮށްދިން ލަނޑެކެވެ.

ފުރަތަަމަ ހާފުގައި ސިޓީ އިން ދެ ލަނޑު ކާމިޔާބު ކުރި އިރު މިހާފުގައި އެޓީމުގެ ލީޑު ފުޅާކުރުމަށް ހާލަންޑަށް ވަނީ ގިނަ ފުރުސަތުތަކެއް ލިބި ބޭނުންކުރެވޭ ގޮތްނުވެފައެވެ. އަދި މިހާފުގައި އާސެނަލްގެ ފަރާތުން އާދައިގެ ކުޅުމެއް ފެނިގެންދިޔަ އިރު ސިޓީގެ ގޯލާއި އަމާޒުކޮށް ފުރަތަަމަ ހާފުގައި އެޓީމަށް އެންމެ ހަމަލާއެއް ވެސް ފޮނުވާލެވިފައެއް ނުވެއެވެ.

ދެވަަނަ ހާފު ފެށިގެން 9 ވަނަ މިނެޓުގައި ސިޓީގެ ލީޑު ފުޅާކޮށްދިނީ ޑިބްރޭނާ އެވެ. މިއީ ހާލަންޑް ތަނަވަސްކޮށްދިން ފުރުސަތެއްގައި އޭނާ ކާމިޔާބުކޮށްދިން ލަނޑެކެވެ.

ސިޓީއިން ތިން ލަނޑުގެ ލީޑެއް ނެގުމާއެކު އާސެނަލް އިން ބަދަލުތަކެއް ގެނެސް ޓީމުގެ ކުޅުން ރަގަޅުކުރިއެވެ. ނަތީޖާއެއްގެ ގޮތުން ދެވަނަ ހާފުގެ 86 ވަނަ މިނެޓުގައި ސިޓީގެ ޕެނަލްޓީ އޭރިއާ ތެެރެއިން ލިބުނު ފުރުސަތެއްގައި އާސެނަލްގެ އިގިރޭސި ޑިފެންޑަރު ރޮބް ހޯލްޑިންގް ލަނޑެއް ކާމިޔާބުކޮށް އެޓީމަށް ނަތީޖާގެ ފަރަގު ކުޑަކޮށްދިނެވެ. ނަމަވެސް މެޗުގެ އިތުރު ވަގުތުގެ ތެރޭގައި ހާލަންޑް ވަނީ ލަނޑެއް ކާމިޔާބުކޮށް އަނެއްކާވެސް ސިޓީއަށް ތިން ލަނޑުގެ ލީޑެއް ހޯދައިދީފައެވެ.

މިރޭގެ މެޗުން ލިބުނު ތިން ޕޮއިންޓާއެކު އެކު 31 މެޗު ކުޅެގެން މެންޗެސްޓާ ސިޓީއަށް 73 ޕޮއިންޓް ލިބިފައިވާއިރު، ދެ މެޗު އިތުރަށް ކުޅެގެން 75 ޕޮއިންޓާއެކު މިވަގުތު ޕޮއިންޓް ތާވަލުގެ ކުރީގައި އޮތީ އާސެނަލް އެވެ.