ޗާގޯސް މައްސަލައިގައި ރިޝްވަތު ހިމެނޭ ކަމަށް ކުރާ ތުހުމަތުގެ ރައްދުގައި، އެއީ މޮރިޝަސްގެ ފޮރިން މިނިސްޓަރަށް ނުފޫޒު ފޯރުވޭ ވަރުގެ ކަމެއް ނޫން ކަމަށް މޮރިޝަސްގެ ފޮރިން މިނިސްޓަރު އަލަން ގަނޫ ވިދާޅުވެއްޖެއެވެ.

އިންޑިއަން އޯޝަން ޑްރަގް އެބިއުސް ކޮންފަރެންސްގެ ހަވާސާގައި ފޮރިން މިނިސްޓަރާ ނޫސްވެރިން ކުރި ސުވާލަށް ޖަވާބު ދެއްވަމުން ސުވާލުކުރުމުން ގަނޫ ވިދާޅުވީ އޭނާއަކީ ރާއްޖޭގެ ނިންމުންތަކަށް ނުފޫޒު ފޯރުވޭ ފެންވަރުގެ ބޭފުޅެއް ނޫން ކަމަށައި، އެ ތުހުމަތާ ބެހޭ ގޮތުން އިތުރު އެއްޗެއް ދެންނެވޭނީ ރާއްޖޭގެ ރައްޔިތުންގެ މަޖިލީހުގައި ދެއްކި ވާހަކަތައް އެނގިވަޑައިގަތުމުން ކަމަށެވެ.

މީގެ އިތުރުން ގަނޫ ވިދާޅުވީ 500 މިލިއަނުގެ ވާހަކަ ފެނިވަޑައިގަތީ އެހެން މީހުންނަށް ވެސް ފެނުނު ގޮތަށް ނޫސްތަކުން ކަމަށެވެ.

Advertisement

ރާއްޖޭގެ ސަރަހައްދީ އިން ކަނޑައެޅުމާ ގުޅޭ ގޮތުން ޖަރުމަނުގައި ހުންނަ އިންޓަނޭޝަނަލް ޓްރައިބިއުނަލް ފޯ ދަ ލޯ އޮފް ދަ ސީ (އިޓްލޮސް) އަށް ހުށަހަޅާފައިވާ މައްސަލައިގައި ގޮތެއް ކަނޑައެޅުމަށް ތާވަލު ކޮށްފައި ވަނީ މާދަމާއެވެ.

އިޓްލޮސް އިން ނެރެފައިވާ ނޫސްބަޔާނެއްގައި ބުނެފައި ވަނީ މި މައްސަލައިގައި ގޮތެއް ކަނޑައެޅުން އޮންނާނީ މާދަމާ 11:00 ގައި ކަމަށެވެ. އެއީ ރާއްޖެ ގަޑިން 8:00 ގައެވެ.

ރާއްޖެއާ ދެކޮޅަށް މޮރިޝަސް އިން އިޓްލޮސްއަށް ހުށަހަޅާފައި ވަނީ ރާއްޖެއާއި މޮރިޝަސްގެ އިގްތިސޯދީ ހާއްސަ ސަރަހައްދާއި ކޮންޓިނެންޓަލް ޝެލްފްގެ ބައުންޑަރީ ކަނޑައަޅައިދިނުމަށެވެ. މި މައްސަލަ އިޓްލޮސްއަށް ހުށަހެޅި ހިސާބުން ފެށިގެން ރާއްޖެއިން އަންނަނީ އެ މައްސަލަ އިޓްލޮސްއަށް ނުބެލޭނެ ކަމަށް ވަކާލާތުކުރަމުންނެވެ.

މި މައްސަލައިގައި ރާއްޖޭގެ ފަރާތުން ވަކާލާތު ކުރައްވަނީ ބަންޑާރަ ނައިބް އިބްރާހިމް ރިފްއަތާއި ބަންޑާރަ ނައިބުގެ ނައިބު، ހަދީޖާ ޝަބީން އެވެ.

މި މައްސަލައިގެ އަޑުއެހުންތައް މީގެ ކުރިންވެސް ކުރިއަށް ގެންގޮސްފައިވާއިރު، ޗާގޯސްއަކީ މޮރިޝަސްގެ ބައެއްގެ ގޮތުގައި ބަލައިގަނެ، އެ ގައުމާ އެއްކޮޅަށް އދ. ގައި ވޯޓު ދިނުމަށް ރާއްޖެއިން މިދިޔަ އަހަރު ވަނީ ނިންމާފައެވެ.

އެއާއެކު މި ނިންމުމަކީ އިމުގެ މައްސަލައިގައި ހިލާފު އުފެދިފައިވާ ސަރަހައްދު މޮރިޝަސް އަށް ދޭން ނިންމުން ކަމަށް ވިދާޅުވެ ކުރީގެ ބަންޑާރަ ނައިބުކަން ކުރައްވާފައިވާ ފަރާތްތައް އަދި ކަނޑުގެ ސަރަހައްދު ކަނޑައެޅުމުގައި ހަރަކާތްތެރިވެފައިވާ ފަރާތްތައް ގެންދަނީ ސަރުކާރަށް ބޮޑެތި ފާޑުކިޔުންތަކެއް އަމާޒުކުރަމުން ނެވެ. 

ސަރުކާރަށް ފާޑުކިޔުންތައް އަމާޒުވަމުން ދިއުމާއި ގުޅިގެން، ދިފާއުގައި ސަރުކާރުން ބުނީ ސްޓޭންޑު ބަދަލުކުރީ ޗާގޯސްގެ މިނިވަންކަމާއި މެދުގައި ކަމަށާއި، އިމުގެ މައްސަލައިގައި ދައުލަތުގެ ސްޓޭންޑު ބަދަލު ނުކުރާ ކަމަށެވެ.