ހައި އިމްޕެކްޓް ކޮމިއުނިޓީ ޑިވެލޮޕްމަންޓް ޕްރޮޖެކްޓް (އެޗްސީޑީޕީ) ގެ ދަށުން ރާއްޖޭގެ ހަ ރަށެއްގައި މަޝްރޫއުތަކެއް ކުރިއަށް ގެންދިއުމަށް ހިލޭ އެހީގެ ގޮތުގައި އިންޑިއާ ހައި ކޮމިޝަނުން ދިވެހި ސަރުކާރަށް 2.73 މިލިއަން ރުފިޔާ ދޫކޮށްފިއެވެ.

އިންޑިއާ ހައިކޮމިޝަނުން ބުނީ، މި ފައިސާ ބޭނުން ކުރެވިގެންދާނީ ގދ.ގައްދޫގައި “ސްޕޯޓްސް ކޮމްޕްލެކްސް” ގާއިމުކުރުމުގެ މަސައްކަތް ފެށުމަށާއި، ގދ.ތިނަދޫ އަބޫބަކުރު ސްކޫލާއި ލ.ގަން ސްކޫލް އަދި ހއ.ދިއްދޫގައި ހުންނަ ހއ އަތޮޅު ތައުލީީމީ މަރްކަޒުގައި އިންކްލޫސިވް އެޑިއުކޭޝަން ސަޕޯޓް (އައިއީއެސް) ޔުނިޓްތަކުގެ މަސައްކަތް އަވަސް ކުރުމުގެ އިތުރުން ތ. ވޭމަންޑޫގައި 100 މަގުބައްތި ހަރުކުރުމުގެ މަސައްކަތުގެ އެންމެ ފަހުގެ މަރުހަލާ ނިންމުމަށް ކަަމަށެވެ.

ގދ.ގައްދޫގައި “ސްޕޯޓްސް ކޮމްޕްލެކްސް” ގާއިމުކުރުމުގެ މަޝްރޫއުގެ އަމާޒަކީ ރައްޔިތުންނަށް އެކަށީގެންވާ އަދި ދެމެހެއްޓެނިވި ގޮތުގައި މުނިފޫހިފިލުވުމާއި ކުޅިވަރާއި ތަމްރީނާއި ދުޅަހެޔޮކަމުގެ ވަސީލަތްތައް ޤާއިމްވެފައިވާ ބައިނަލްއަޤްވާމީ ފެންވަރުގެ މަލްޓި ޕާޕަސް ސްޕޯޓްސް ކޮމްޕްލެކްސްއެއް ބިނާކޮށްދިނުމެވެ. އަދި އެތަނުގެ ސަބަބުން ޒުވާނުން ބާރުވެރިކުރުވައި މުޖުތަމައުގެ ކުރިއެރުމަށް އެހީތެރިކަން ފޯރުކޮށްދިނުން ކަމަށް ހައި ކޮމިޝަނުން ބުނެއެވެ.

Advertisement

ސްކޫލްތަކުގައި އައިއީއެސް ޔުނިޓްތައް ގާއިމު ކުރަނީ އައިއީއެސް ޔުނިޓްތަކުގެ ކެޕޭސިޓީ އާއި އިންފްރާސްޓްރަކްޗާ ތަރައްގީކުރުމާއި ކިޔަވައިދިނުމާއި އުނގެނުމަށް ބޭނުންވާ ސާމާނު ފޯރުކޮށްދިނުމެވެ. މި މަޝްރޫޢުގެ ޖުމްލަ އަގަކީ 4.64 މިލިއަން ރުފިޔާއެވެ. މި ދޫކުރެވުނު އިންސްޓޯލްމަންޓް ގެ ސަބަބުން މި މަސައްކަތް އަވަހަށް ނިންމުމަށް މަގުފަހިވެގެންދާނެ ކަމަށް އިންޑިޔާ ހައިކޮމިޝަނުން ބުނެއެވެ. 

ތ.ވޭމަންޑޫގައި 100 މަގުބައްތި ހަރުކުރުމުގެ މަޝްރޫޢުގެ ދަށުން ކަރަންޓު ބޭނުންކުރާ މިންވަރު ކުޑަކޮށް، މެއިންޓެނެންސް ހަރަދުވެސް ކުޑަކޮށް، ރަށުގެ މަގުބައްތި ޖެހުމުގެ ރަނގަޅު ނިޒާމެއް ގާއިމުކޮށްދޭނެ ކަމަށް އިންޑިޔާ ހައިކޮމިޝަނުން ބުނެއެވެ.

މީގެއިތުރުން ރާއްޖޭގައި ރާއްޖޭގެ އެކިކަންކޮޅުތަކުގައި ތަރައްގީގެ 18 މަޝްރޫއެއް ހިންގުމަށް އެހީތެރިވުމުގެ ގޮތުން އިންޑިއާ އިން ވަނީ 106 މިލިއަން ރުފިޔާގެ ހިލޭ އެހީ ވެސް ދީފައެވެ.