މިއަދަކީ ފަހުގެ ތާރީހުގައި ރާއްޖެއަށް ވެރިއަކު އެންމެ އަނިޔާވެރިވާނެ ދުވަސް ކަމަށް ރައްޔިތުންގެ މަޖިލީހުގެ މާވަށު ދާއިރާގެ މެމްބަރު މުހައްމަދު ސައީދު ވިދާޅުވެއްޖެއެވެ.

ރާއްޖޭގެ ސަރަހައްދީ އިން ކަނޑައެޅުމާ ގުޅޭ ގޮތުން ޖަރުމަނުގައި ހުންނަ އިންޓަނޭޝަނަލް ޓްރައިބިއުނަލް ފޯ ދަ ލޯ އޮފް ދަ ސީ (އިޓްލޮސް) އަށް ހުށަހަޅާފައިވާ މައްސަލައިގައި ގޮތެއް މިއަދަށް ވަނީ ތާވަލްކޮށްފައެވެ.

އެކަމާއި ގުޅިގެން ގިނަ ސުވާލުތަކަކާއެކު ސައީދު މިއަދު ކުރެއްވި ޓްވީޓެއްގައި ވިދާޅުވީ މިއަދަކީ ވަޒަންކުރަންދަތި އަދި ދިވެހިންނަށް ވަކާލާތު ކުރުމުގެ ޙައްގުއޮތް މުއްސަނދި ވަސީލަތެއް ފިކުރެއް ހިޔާލެއްނެތި ރައީސުލްޖުމްހޫރިއްޔާ އިބްރާހީމް މުހައްމަދު ޞާލިހު ދޫކޮއްލާ ދުވަސް ކަމަށެވެ. އަދި މިއީ ޤައުމަށް ޤައްދާރުވުން ނޫންނަމަ ދެން ޤައްދާރުވެވޭނެ އިތުރުގޮތެއްވަކި އޮއްނާނެތޯ އައްސަވައި ސައީދު ވަނީ ސުވާލު އުފައްދާފައެވެ.

Advertisement

"މޮރިޝަސްގެ ބޮޑުވަޒީރަށް ފޮނުވިސިއްރުސިޓީ ރައްޔިތުންގެ މަޖިލީހަށްސިއްރުކުރީ ކީއްވެ؟ މިލްކުވެރިކަން ނުނިއްމަނީސް ކަނޑުގެ އިންވަކިކުރަން ދިވެހިސަރުކާރު އެއްބަސްވީ ކީއްވެ؟ ޝައްކު އުފެދުމުން ޗެލެންޖުކޮށް ސިޓީފޮރުވުމުގެ ބަދަލުގައި މަޖިލިސް، މަޖިލީހުގެކަމާއިބެހޭ ކޮމެޓީތައް، ސިޔާސީޕާޓީތައް ނުވަތަ ދިވެހި ރައްޔިތުންނާއި ތަފްސީލްތައް ހިއްސާނުކުރީ ކީއްވެ؟ ވަޒީރުންގެ މަޖިލިސްގައި މަޝްވަރާނުކުރީ ކީއްވެ؟ މިއީ ޤައުމަށް ޤައްދާރުވުން ނޫންނަމަ ދެންޤައްދާރުވެވޭނެ އިތުރުގޮތެއްވަކި އޮއްނާނެތޯ؟" ސައީދު ވިދާޅުވިއެވެ.

ފޯޅަވަހި މައްސަލައިގައި ދިވެހި ދައުލަތުން ދަމަހައްޓަމުން އައި ސްޓޭންޑް ސަރުކާރުން ބަދަލުކުރުމުގެ ސަބަބުން ރާއްޖެއިން ބައެއް ގެއްލުމުގެ ފުރުސަތު ބޮޑުކަމަށް ޤާނޫނީ ފަންނުގެ ބޭފުޅުންވެސް ގެންދަވަނީ ވިދާޅުވަމުން ނެވެ. 

އެކަމާއި ގުޅިގެން، ކަންބޮޑުވުންފާޅުކޮށް ރާއްޖޭގެ ގިނަ ސިޔާސީ ޕާޓީ ތަކާއި، އާއްމު ރައްޔިތުން ވެސް އަންނަނީ ކަންބޮޑުވުން ފާޅުކުރަމުންނެވެ.