ޗާގޯސް އައިލެންޑްސް އާއި ރާއްޖެއާ ދެމެދު އިން ކަނޑައަޅަން މޮރިޝަސް އިން އިންޓަނޭޝަނަލް ޓްރައިބިއުނަލް ފޯ ދަ ލޯ އޮފް ދަ ސީސް (އިޓްލޮސް) އަށް ހުށަހަޅާފައިވާ މައްސައިގައި ރާއްޖެއިން ވަކާލާތު ކުރިގޮތަށް މައްސަލަ ނިމުމުން އެނގިގެން ދިޔައީ ދިވެހި ކަނޑާއި ވައިގެ ސަރަހައްދުންވެސް އެއްމެ އިންޗިއެއްވެސް ދޫވިޔަނުދިނުމަށް ސަރުކާރުން ކުރި އިޙުލާސްތެރި ގަދަފަދަ މަސައްކަތް ކަމަށް ރައްޔިތުންގެ މަޖިލީހުގެ އިހަވަންދޫ ދާއިރާގެ މެންބަރު މުހައްމަދު ޝިފާއު ވިދާޅުވެއްޖެއެވެ. 

ޝިފާއު މިފަދައިން ވިދާޅުވީ އިޓްލޮސްގެ ނިންމުމާއި ގުޅިގެން، ދިވެހި ސަރުކާރަށާއި ރައީސުލްޖުމްހޫރިއްޔާ އިބްރާހީމް މުހައްމަދު ޞާލިހަށް މަރުހަބާ ދަންނަވައި ކުރެއްވި ޓްވީޓެއްގައެވެ. 

"އިޓްލޮސްގަ މިއަދު ލިބުނު ކާމިޔާބީގެ އަސްލަކީ ދިވެހި ކަނޑާއި ވައިގެ ސަރަހައްދުންވެސް އެއްމެ އިންޗިއެއްވެސް ދޫވިޔަނުދިނުމަށް ކުރެއްވި އިޙުލާސްތެރި ގަދަފަދަ މަސައްކަތް." ޝިފާއު ވިދާޅުވި އެވެ. 

Advertisement

އިމުގެ މައްސަލާގައި މޮރިޝަސްއިން ވަކާލާތު ކުރަމުން އައީ އިން ކަނޑައެޅުމުގައި ބްލެންހެމް ފަރުން މިން އަޅަން ފެށުމަށެވެ. ނަމަވެސް ރާއްޖޭން ވަކާލާތު ކުރަމުން އައީ މޮރިޝަސްއިން ބޭނުންވާ ފަދައިން ބްލެންހެމް ފަރުން މިންއެޅުމުގެ ބަދަލުގައި ޕެރޯސް ބަންހޯސްއާއި ސެލޮމަން އައިލެންޑްސް ދެ އަތޮޅުގައި ފާހަގަކުރާ ނުކުތާތަކަކުން ފެށިގެން ކަނޑުގެ ސަރަހައްދު މިންކުރުމަށެވެ.

ދެ ފަރާތުގެ ވާހަކައަށް ބެލުމަށް ރާއްޖެއާއި އިޓްލޮސްގައި މައްސަލަ ބެއްލެވި ޗެމްބަރުން ނިންމީ ޗާގޮސްގެ މެދުގައިވާ ކަނޑުގެ ސަރަހައްދުން ފުށުއަރާ ސަރަހައްދު ބައިކުރާނީ ރާއްޖެއިން އެދުނު ގޮތަށް ޕެރޯސް ބަންހޯސްއާއި ސޮލަމަން އައިލެންޑްސް ދެ އަތޮޅުގައި ފާހަގަކުރާ ނުކުތާތަކުން ފެށިގެން ޗާގޮސްގެ ކަނޑުގެ ސަރަހައްދު މިންކޮށްގެން ކަމަށެވެ. 

ދިވެހި ސަރުކާރުން ވަކާލާތު ކުރިގޮތަށް މައްސަލަ ނިމުނު ނަމަވެސް، އެފަދައިން ނިމުމުން، ރާއްޖޭގެ މަސްވެރިން މަސްވެރިކަން ކުރާ ކަނޑުގެ ސަރަހައްދުން 50000 އަކަ ކިލޯ މީޓަރަށްވުރެ ބޮޑު ބައެއް ގެއްލޭނެ އެވެ. އެކަމުގެ ސަބަބުން ގިނަ ބަޔަކު އަންނަނީ ކަންބޮޑުވުން ފާޅުކުރަމުންނެވެ.