އިޓްލޮސް އިން މިއަދު އިމުގެ މައްސަލާގައި ނިންމި ނިންމުމާއި ގުޅިގެން، ނެތް އެއްޗެއް ލިބުނީ މޮރިޝަސް އަށް ކަމަށާ، ރާއްޖެއިން ކުރިން ބޭނުން ކުރަމުން އައި ސަރަހައްދެއް ގެއްލިގެން ގޮސްފައިވާ ކަމަށް ރައްޔިތުންގެ މަޖިލީހުގެ އުނގޫފާރު ދާއިރާގެ މެންބަރު މުހައްމަދު ވަހީދު (ވައްޑެ) ވިދާޅުވެއްޖެއެވެ.
އިންޓަނޭޝަނަލް ޓްރައިބިއުނަލް ފޯ ދަ ލޯ އޮފް ދަ ސީ (އިޓްލޮސް)އަށް ހުށަހަޅާފައިވާ ރާއްޖޭގެ ދެކުނުން އޮންނަ ޗާގޯސް އައިލެންޑްސް (ފޯޅަވަހި) މައްސަލައިގައި މިއަދު އިޓްލޮސް އިން ވަނީ ރާއްޖެއިން ވަކާލާތު ކުރިގޮތާއި އެއްގޮތަށް ނިންމުން ނިންމާފައެވެ.
އެކަމާއި ގުޅިގެން ސަރުކާރަށް ތާއީދު ކުރާ ފަރާތްތަކުން އެއީ ބޮޑު ކާމިޔާބީއެއް ކަމަށް ސިފަ ކުރައްވައި، ރައީސުލްޖުމްހޫރިއްޔާ އިބްރާހީމް މުހައްމަދު ޞާލިހު އަށާއި، ދިވެހި ސަރުކާރަށް ތައުރީފް ކުރަމުންދާތީ އެކަމަށް ރައްދު ދެއްވައި ވައްޑެ ކުރެއްވި ޓުވީޓެއްގައި ވިދާޅުވީ، މިއަދުގެ ނިންމުމާއެކު މިހާތަނަށް އޮތްގޮތް ފިޔަވައި އެހެން ދެބަދަލެއް އަންނާނެ ކަމަށެވެ.
އެގޮތުން ފުރަތަަމަ ބަދަލަކީ، ފެށުނީއްސުރެ ދިވެހިން މަސްވެރިކަން ކުރަމުން އައި ހިސާބުގަނޑެއް ބަންދުވުން ކަމަށާ، އަދި ދެވަނަ ބަދަލަކީ ކަނޑުމަސް އާލާވާކަމަށް ޒަމާނުއްސުރެ މަސްވެރީން ބުނާ، ދެކުނު ކަނޑުގައި ބޮޑުދާ އަޅަން ބޭރުގެ މަސްވެރިން ފެށުން ކަމަށް އޭނާ ވިދާޅުވި އެވެ.
މިއާއެކު ވައްޑެ ކުރެއްވި އެހެން ޓުވީޓެއްގައި ވިދާޅުވީ، ނެތް އެއްޗެއް ލިބިގެން އުޅެނީ މޮރިޝަސްއަށްކަމަަށެވެ. އަދި ރާއްޖެއަށް ކުރިން ބޭނުންކުރެވޭ ބައެއް ގެއްލިގެން ގޮސްފައިވާ ކަމަށްވެސް އޭނާ ވިދާޅުވި އެވެ.
"ދެން މިކަން ޞޮލާޙުއްދީނުލް އައްޔޫބީ ހޯއްދެވި ފަދަ ބޮޑު ނަޞްރަކާ ފަތަޙައަކަށް ހަދައިގެން އުޅޭތީ ހަމަ އަޖައިބުވޭ." ވައްޑެ ވިދާޅުވި އެވެ.
އިޓްލޮސް އިން ޗާގޯސް މައްސަލައިގައި މިއަދު ހުކުމް އިއްވީ ސަރަހައްދީ އިމުގެ ފުށުއަރާ 200 ނޯޓިކަލް މޭލުގެ ސަރަހައްދު ރާއްޖެއާއި މޮރިޝަސްއާ ދެމެދު އެއްވަރަކަށް ބެހުމަށެވެ.
އަދި އެގޮތުން، ބަހާއިރު، އިން ކަނޑައަޅަން ނިންމާފައިވަނީ ރާއްޖެއިން އެދުނު ގޮތަށެވެ. އޭގެ ސަބަބުން ރާއްޖޭގައި މަސްވެރިން މަސްވެރިކަން ކުރާ ކަނޑުގެ ސަރަހައްދުން 50000 އަކަ ކިލޯ މީޓަރަށްވުރެ ބޮޑު ބައެއް ގެއްލޭނެ ކަމަށް އިދިކޮޅުން އަންނަނީ ބުނަމުންނެވެ.
Advertisement
This content is created and paid for by advertisers and does not involve Voice Journalists
