އިޓްލޮސްގައި އޮތް މައްސަލަ ނިމި ދެކުނުގެ އިން ކަނޑައެޅިގެން ދިއުމާއި އެކު, އެ ސަރަހައްދު ބެލެެހެއްޓުމަށް އިންޑިއާގެ އިތުރު މަނަވަރުތައް ގެންނާނެތޯ ކުރި ސުވާލަށް ޑިފެންސް މިނިސްޓަރު މާރިޔާ އަހުމަދު ދީދީ ޖަވާބެއް ނުދެއްވި އެވެ.
ރާއްޖޭގެ ކަނޑުގެ ސަރަހައްދަކީ ބޮޑު ސަރަހައްދަކަށްވުމުން، ސަރަހައްދު ބަލަހައްޓަން ސިފައިންނަށް ދަތިވާކަމަށް މީގެކުރިން ޑިފެންސް މިނިސްޓަރު މާރިޔާ ވަނީ ވިދާޅުވެފަ އެވެ.
އެހެންކަމުން ދެކުނުގެ އިން ކަނޑައެޅުމާއި ގުޅިގެން ކަނޑުގެ ސަރަހައްދުން ބަލަހައްޓަން ބެހޭ ބައި އިތުރުވުމާއި އެކު، އެ ސަރަހައްދު ބެލެހެއްޓުމަށް އިންޑިއާގެ މަނަވަރުތައް ގެންނާނެތޯ ރޭ ރައީސް އޮފީހުގައި ބޭއްވި ނޫސްވެރިންގެ ބައްދަލުވުމެއްގައި ނޫސްވެރިއަކު ވަނީ ސުވާލުކޮށްފަ އެވެ.
އެ ސުވާލަށް މިނިސްޓަރު މާރިޔާ ސާފު ޖަވާބެއް ދެއްވާފައި ނުވި ނަމަވެސް ކަނޑުގެ ސަރަހައްދު ބެހެއްޓުމަށް އިންޑިއާގެ ޑޯނިއާތަކާއި މަނަވަރުތައް ގެންނަން ޖެހިދާނެކަމުގެ އިޝާރާތެއް އެކަމަނާ ވަނީ ކުރައްވާފަ އެވެ.
މިނިސްޓަރު މާރިޔާ ވިދާޅުވީ ކަނޑުގެ ސަރަހައްްދުގެ ސަވައިލެންސް ބެލެހެއްޓުމަށް އަވައްޓެރި ގައުމުތަކާއެކު މަސައްކަތް ކުރުމަކީ ޒަމާނުއްސުރެ ރާއްޖެއިން ކުރަމުން އަންނަ ކަމެއް ކަމަށެވެ. މަހަކު އެއްފަހަރު ކަނޑުގެ ސަރަހައްދުގައި އެފަދަ ސަވައިލެންސްތައް ހަދާ ކަމަށާއި، އެއީ އަލަށް ކުރާކަމެއް ވެސް ނޫން ކަމަށް މިނިސްޓަރު މާރިޔާ ވިދާޅުވި އެވެ.
"އަޅުގަނޑުމެންގެ އީއީޒެޑް ސަވައިލެންސް އެއީ ޒަމާނުއްސުރެ ހަމަ އަޅުގަނޑުމެންގެ އަވައްޓެރި ގައުމުތަކާ އެކީގައި ކުރަމުން އަންނަ ކަމެއް. މަހަކު އެއްފަހަރު ހަމަ ކުރިންސުރެ އެ ސަވައިލެންސްތައް ހަދާ މިތަނަށް އައިސް. އެއީ އަލަށް ކުރާ ކަމެއް ނޫން"
ޑިފެންސް މިނިސްޓަރު މާރިޔާ ދީދީ
މިނިސްޓަރުގެ މާރިޔާގެ ޖަވާބާއި ގުޅިގެން ނޫސްވެރިއާ ވަނީ އެ ސުވާލު ތަކުރާރުކޮށްފަ އެވެ. އެގޮތުން އިންޑިއާގެ އިތުރު މަނަވަރުތަކާއި ޑޯނިއާތައް ގެންނާނެތޯ ނޫސްވެރިޔާ އެހިއެވެ. އެ ސުވާލަށް ވެސް މިނިސްޓަރު ޖަވާބު ނުދެއްވާ ހިނިފުޅު ވަޑުވާލެއްވުމަކުން ނިންމަވާލެއްވީ އެވެ.
އެފަހުން ރައީސުލްޖުމްހޫރިއްޔާ އިބްރާހިމް މުޙައްމަދު ޞާލިހު އެ ސުވާލަށް ޖަވާބުދެއްވަމުން ވިދާޅުވީ ވަރަށް ގިނަ ގައުމުތަކުގެ އެކުވެރިކަމުގެ ދަތުރުތަކުގައި މަނަވަރު އަންނާނެ ކަމަށެވެ. އަދި އެކަން ނުހުއްޓުވާނެ ކަމަށް ރައީސް ޞާލިހު ވިދާޅުވި އެވެ.
ރައީސް އިބްރާހިމް މުޙައްމަދު ޞާލިހުވެސް މި ސުވާލަށް ސާފުޖަވާބެއް ދެއްވާފައި ނުވާއިރު، މޮރިޝަސްއަކީވެސް އިންޑިއާއިން ވަރަށް ބޮޑަށް ކޮންޓްރޯލުކުރާ ގައުމަކަށް ވުމުން ކަނޑުގެ ސަރަހައްދުގައި އިންޑިއާގެ އަސްކަރީ އުޅަނދުތައް އިތުރުވެގެން ދިއުމަކީ އެކަށީގެންވާ ކަމެއްކަމަށް އިދިކޮޅު ފަރާތްތަކުން ގެންދަނީ ތުހުމަތު ކުރަމުން ނެވެ.
Advertisement
This content is created and paid for by advertisers and does not involve Voice Journalists
