ދިވެހިރާއްޖޭގެއާއި މޮރިޝަސްއާއި ދެމެދު އޮތް ފުށުއަރާ ސަރަހައްދުގެ އިން ކަނޑައަޅާފައި ވާއިރު، މޮރިޝަސްއަށް ލިބުނު ސަރަހައްދުން ދާ އަޅައިގެން މަސްވެރިކަން ނުކުރާނެކަމުގެ ޔަގީންކަން ނުދެވޭނެކަމަށް ފިޝަރީސް މިނިސްޓަރު ޑރ ހުސެއިން ރަޝީދު ވިދާޅުވެއްޖެ އެވެ. 

މޮރިޝަސްއަކީ އެ ގައުމުގެ ކަނޑުގެ ސަރަހައްދުން ދާއަޅައިގެން މަސްވެރިކަން ކުރުމަށް އެހެން ފަރާތްތަކަށް ލައިސެންސް ދޫކޮށްގެން އާމްދަނީ ހޯދާ ގައުމަކަށް ވުމުން، ރާއްޖޭގެ ދެކުނުން މޮރިޝަސްއާއި ދެމެދު އޮތް ފުށޫ އަރާ ކަނޑުގެ ސަރަހައްދު އިން ވަކިކުރެވިގެން ދިޔައިރު، އެ ސަރަހައްދުން ދާ އަޅަން ފަށައިފި ނަމަ ރާއްޖޭގެ މަސްވެރިކަމަށް ވަރަށް ނޭދެވޭ އަސަރުތަކެއް ކުރާނެކަމަށް ފަންނީ ބޭފުޅުން ގެންދަވަނީ ވިދާޅުވަމުން ނެވެ. 

ދާ އަޅައިގެން މަސްވެރިކަން ކުރުމަކީ ދެމެހެއްޓެވި ގޮތެއްގައި މަސްވެރިކަން ކުރުމަށް އޮތް ބޮޑު ހުރަހެއްގެ ގޮތުގައި ދިވެހިރާއްޖެއިން ވެސް ވަކާލާތު ކުރަމުންދާ ކަމަކަށް ވެފައި، ފޯޅަވަހި ސަރަހައްދަކީ ރާއްޖެއިން މައިގަނޑު ގޮތެއްގައި ބާނާ ކަޅުބިލަމަސް އާލާވާ ސަރަހައްދަކަށް ވާއިރު، އެ ސަރަހައްދުން ދާއަޅައިގެން މަސްވެރިކަން ނުކުރާނެކަމުގެ ޔަގީންކަން ދެއްވިދާނެތޯ ރޭ ރައީސް އޮފީހުގައި އޮތް ނޫސްވެރިންގެ ބައްދަލުވުމުގައި ނޫސްވެރިއަކު ވަނީ ފިޝަރީސް މިނިސްޓަރާއި ސުވާލުކޮށްފަ އެވެ. 

އެ ސުވާލަށް ޖަވާބުދެއްވަމުން މިނިސްޓަރު ވިދާޅުވީ މޮރިޝަސްއާއި ރާއްޖެއާއި ދެމެދުއޮތް ފުށުއަރާ ސަރަހައްދުގެ އިން ވަކިކޮށް އެމީހުންނަށް އެ ލިބުނު ސަރަހައްދުގައިކުރުން ހުއްދަކޮށްފައި އޮތްކަމެއް ނުކުރާނެކަމުގެ ޔަގީންކަން ނުދެވޭނެ ކަމަށެވެ. 

މިނިސްޓަރު ވިދާޅުވީ މޮރިޝަސްގެ އީއީޒެޑް ސަރަހައްދުން ނޫނަސް އިންޑިއާ ކަނޑުގެ ކޮންމެ ހިސާބެއްގައި ވެސް ދާ އަޅައިގެން މަސްވެރިކަން ކުރާނަމަ އެކަމުގެ ނޭދެވޭ އަސަރުތައް ދިވެހި މަސްވެރިކަމަށް ކުރާނެ ކަމަށެވެ.

އެހެންކަމުން އިންޑިއާ ކަނޑުން ދާ އެޅުން ހުއްޓުވުމަށް ރާއްޖެއިން އިސް ނަގައިގެން މިހާރުވެސް ގިނަ މަސައްކަތްތަކެއް ކުރަމުންދާ ކަމަށާއި، އަދި މޮރިޝަސްއާއި ދެމެދު އިން ކަނޑައެޅުމާއެކު، އެކަމަށް ރިއާޔަތްކޮށް ވާހަކަ ދެކެވިފައިވާކަމަށް މިނިސްޓަރު ވިދާޅުވި އެވެ.

އެކަން ފާހަގަކުރައްވާ މިނިސްޓަރު އިތުރަށް ވިދާޅުވީ އެ ސަރަހައްދަކީ ރައްކާތެރި ކުރެވިފައިވާ ސަރަހައްދެއްގެ ގޮތުގައި ބާއްވާނެކަމަށް މޮރިޝަސްއިން ބުނަމުންދާ ކަމަށެވެ. އަދި ފޯޅަވަހީގައި އެމެރިކާގެ މިލިޓަރީ ބޭހެއް ހަދާފައި ހުންނައިރު، އެ ސަރަހައްދަށް މަސްވެރި ބޯޓުފަހަރު ވަދެ ހަރަކާތްތެރި ވުމަކީ އެމެރިކާއިންވެސް ރުހުންދޭނެ ކަމެއް ނޫންކަމަށް މިނިސްޓަރު ވިދާޅުވި އެވެ

ދިވެހިރާއްޖޭގެ ދެކުނުން އޮންނަ މޮރިޝަސްގެ ކަނޑުގެ ސަރަހައްދުން ދާ ނާޅާނެކަމުގެ ޔަގީންކަން މުތުލަގަށް ނުދެވުނު ކަމުގައި ވީ ނަމަވެސް އެ ސަރަހައްދު މިހާރު އޮތް ގޮތަށް ކޮންވެންޝަނަލް ޒޯނެއްގެ ގޮތުގައި އޮތުމުގެ ފުރުސަތު ވަރަށް ބޮޑުކަމަށް ފިޝަރީސް މިނިސްޓަރު ވަނީ ވިދާޅުވެފަ އެވެ.