ޗާގޯސް މައްސަލަ ނިމުނީ ދިވެހިން ބޭނުންވި ގޮތަކަށް ނޫން ކަމަށާއި، އެއީ 'ޣައްދާރުން' ބޭނުންވި ގޮތް ކަމަށް ޕީއެންސީގެ ރައީސް އަބްދުއްރަހީމް (އަދުރޭ) ވިދާޅުވެއްޖެއެވެ.

އަދުރޭ މިހެން ވިދާޅުވީ، "ޗަ ގޯސް" ގެ ނަމުގައި ރޭ ހެދިގޮނޑުދޮށުގައި ބޭއްވި ޖަލްސާގައި ވާހަކަ ދައްކަވަމުންނެވެ.

"ދިވެހި ރައްޔިތުން ބޭނުންވި ގޮތަކަށް ނޫން މައްސަލަ ނިމިގެން މިއުޅެނީ. މައްސަލަ ދިމިގެން ދިޔައީ ދިވެހި ރާއްޖޭގެ ޣައްދާރުން ބޭނުންވި ގޮތަށް" އަދުރޭ ވިދާޅުވިއެވެ.

މި މައްސަލައަށް ފުންކޮށް ވިސްނާލާއިރު، މޮރިޝަސްއަށް ޗާގޯސްގެ ސިޔާދަތީ ބާރު ލިބެންޖެހޭ އެއްވެސް ސަބަބެއް ފެންނަން ނެތް ކަމަށާއި ހަމައެކަނި އެ މީހުން ދައްކާ ހުއްޖަތަކީ، އިނގިރޭސި އިސްތިއުމާރުގެ ދަށުގެ ދުނިޔެ އޮތް އިރު، ޗާގޯސްގެ އިދާރީ ކަންތައްތައް ބަލަހައްޓަމުން ގެންދިޔައީ މޮރިޝަސް މެދުވެރިކޮށް ކަމަށް އަދުރޭ ވިދާޅުވިއެވެ.

"މިއީ ހަމައެކަނި މި ދައްކާ ހުއްޖަތަކީ. މި ހުއްޖަތުގެ މައްޗަށް މި ޣައްދާރު އިބްރާހިމް މުހައްމަދު ޞާލިހާ އޭނާގެ އައުވާނުން ސިއްރު ސިޓީއެއް ދިންއިރު، އިނގިރޭސީންގެ އިސްތިއުމާރު އޮތްއިރު، އެމީހުން ދިވެހިރާއްޖެ ބަލަހައްޓަމުން ގެންދިޔައީ ސިލޯނު މެދުވެރިކޮށް. މާދަމާ ސިލޯނުން ނުކުމެ، ދިވެހިރާއްޖޭގެ ސިޔާދަތީ ބާރު އޮންނަން ޖެހޭނީ ތިމަންނަމެންނަށޭ، އެ ދުވަސްވަރު ދިވެހިރާއްޖެ ބަލަހައްޓަމުން ގެންދިޔައީ ތިމަންނަމެންނޭ ކިޔާ ވަކާލާޓު ކުރަން ފެށީމާ، އިބްރާހިމް މުހައްމަދު ޞާލިހާ އޭނާގެ އައުވާނުން އެއީ ތެދެކޭ ބުނެ، ސިއްރު ސިޓީއެއް ދީގެން، ޑީލެއް ނަހަދާނެ ކަމުގެ ޔަގީންކަމެއް ނެތް" އަދުރޭ ވިދާޅުވިއެވެ.

މީގެ އިތުރުން އަދުރޭ ވިދާޅުވީ، މި މައްސަލައިގައި ސަރުކާރުން 500 މިލިއަން ޑޮލަރުގެ ޑީލެއް ހަދާފައިވާކަމަށް ރައްޔިތުންގެ މަޖިލީހުގެ އެމްޑީޕީގެ މެމްބަރުން ބުނަމުންދާ ކަމަށާއި އެހެންކަމުން އެކަން ތަހުގީގު ކުރަންޖެހޭ ކަމަށެވެ.

ޗާގޯސް އައިލެންޑްސް އާއި ރާއްޖެއާ ދެމެދު އިން ކަނޑައަޅަން މޮރިޝަސް އިން އިންޓަނޭޝަނަލް ޓްރައިބިއުނަލް ފޯ ދަ ލޯ އޮފް ދަ ސީސް (އިޓްލޮސް) އަށް ހުށަހަޅާފައިވާ މައްސަލަ ނިމުނީ ރާއްޖެއިން ވަކާލާތު ކުރި ގޮތަށެވެ.

ރާއްޖެ އާއި ޗާގޯސް ޖަޒީރާއާ ދެމެދު އެއްވެސް ފަރާތަކަށް 200 ނޯޓިކަލް މޭލު ހަމަނުވެ، ހާއްސަ އިގުތިސޯދީ ސަރަހައްދު ފުށުއަރާ ގާތްގަނޑަކަށް 95،000 އަކަކިލޯމީޓަރުގެ ސަރަހައްދެއް އޮވެއެވެ.

އިޓްލޮސް އިން އެ މައްސަލައިގައި ހުކުމް އިއްވީ ފުށުއަރާ 200 ނޯޓިކަލް މޭލުގެ ސަރަހައްދު ރާއްޖެއާއި މޮރިޝަސްއާ ދެމެދު އެއްވަރަކަށް ބެހުމަށެވެ.

މި މައްސަލާގައި މޮރިޝަސްއިން ވަކާލާތު ކުރަމުން އައީ އިން ކަނޑައެޅުމުގައި ބްލެންހެމް ފަރުން މިން އަޅަން ފެށުމަށެވެ. ނަމަވެސް ރާއްޖޭން ވަކާލާތު ކުރަމުން އައީ މޮރިޝަސްއިން ބޭނުންވާ ފަދައިން ބްލެންހެމް ފަރުން މިންއެޅުމުގެ ބަދަލުގައި ޕެރޯސް ބަންހޯސްއާއި ސެލޮމަން އައިލެންޑްސް ދެ އަތޮޅުގައި ފާހަގަކުރާ ނުކުތާތަކަކުން ފެށިގެން ކަނޑުގެ ސަރަހައްދު މިންކުރުމަށެވެ.

ދެ ފަރާތުގެ ވާހަކައަށް ބެލުމަށް ފަހު އިޓްލޮސް އިން ނިންމީ މޮރިޝަސްގެ ހުށަހެޅުން ބަލައިނުގަނެވޭނެ ކަމަށެވެ. އަދި ބްލެންހެމް ފަރަކީ ބޭސްޕޮއިންޓުކަމަށް ކަމަށް ބެލުމަށް ޤަބޫލުކުރެވޭ މިންވަރަށް މޮރިޝަސްއަށް ހެކި ހުށަހެޅިފައިނުވާކަމަށް އިޓްލޮސްގައި މައްސަލަ ބެއްލެވި ޗެމްބަރުން ބުނެފައިވެއެވެ.

އެހެންކަމުން، ރާއްޖެއާއި ޗާގޮސްގެ މެދުގައިވާ ކަނޑުގެ ސަރަހައްދުން ފުށުއަރާ ސަރަހައްދު ބައިކުރާނީ ރާއްޖެއިން އެދުނު ގޮތަށް ޕެރޯސް ބަންހޯސްއާއި ސޮލަމަން އައިލެންޑްސް ދެ އަތޮޅުގައި ފާހަގަކުރާ ނުކުތާތަކުން ފެށިގެން ޗާގޮސްގެ ކަނޑުގެ ސަރަހައްދު މިންކޮށްގެން ކަމަށް އިޓްލޮސްގައި މައްސަލަ ބެއްލެވި ޗެމްބަރުން ވަނީ ނިންމާފައެވެ.