ކުޑަކުދިންނަށް ޖިންސީ ގޯނާކުރާ ކުޑަކުދިންގެ އަދަބު ލުއި ނުކުރެވޭނެ ކަމަށް ހައި ކޯޓުން ކަނޑައަޅައިފި އެވެ.
ހައިކޯޓުން މިފަދައިން ކަނޑައަޅާފައިވަނީ، ކުޑަކުދިން ހިމެނޭ ޖިންސީ ގޯނާގެ މައްސަލަ އެއްގައި ޖުވެނައިލް ކޯޓުން ކުރި ހުކުމެއް ދައުލަތުން ހައިކޯޓުގައި އިސްތިއުނާފު ކުރުމުން، އެ މައްސަލާގައި މިއަދު ކުރި ހުކުމުގައެވެ.
އެ މައްސަލަ އަކީ 2019 ވަނަ އަހަރުގެ ޖުލައި މަހުގެ 6 ވަނަ ދުވަހު 15 އަހަރުގެ އަންހެން ކުއްޖެއްގެ ނުރުހުމުގައި އެ ކުއްޖާއާމެދު ޖިންސީ ޢަމަލު ހިންގާފައިވާތީ، އަންހެން ކުއްޖާ އާއި މެދު އެ އަމަލު ހިންގި ކުއްޖާގެ މައްޗަށް ކުޑަކުއްޖެއްގެ ހަށިގަނޑުގައި ޖިންސީ ނިޔަތެއް އޮވެގެން ޤަސްދުގައި އަތްލުމުގެ ކުށުގެ ދަޢުވާ އާއި ގުޅިގެން ޖުވެނައިލް ކޯޓުގައި ކުރިއަށް ގެންދިޔަ ޝަރީއަތުގައި އެ ކޯޓުން ކުރި ހުކުމުގެ އިސްތިއުނާފީ މައްސަލަ އެވެ.
އެ އެމައްސަލާގައި ނޮވެމްބަރު، 2021 ޖުވެނައިލް ކޯޓުން ހުކުމް ކުރީ، ޖިންސީ ގޯނާ ކުރި ކުއްޖާއަށް، އެ ކުށުގެ އަދަބު ކަމުގައިވާ ފަސް އަހަރުގެ ޖަލު ހުކުމުން ތިން ބައި ކުޅަ ދެ ބައި ކަމަށްވާ ތިން އަހަރާއި ދެ މަހަށް ޖަލަށް ލުމަށެވެ. އަދި އެއް އަހަރުގެ މުއްދަތަށް ކަނޑައެޅި ޝަރުތުތަކާ އެކު، ޖަލު ހުކުމް ތަންފީޒު ފަސްކޮށް، އެ ކުއްޖާ ދޫކޮށްލި އެވެ.
މައްސަލައިގެ އިސްތިއުނާފް އަޑުއެހުމުގައި ހައި ކޯޓުން މިއަދު ކުރި ހުކުމުގައި ބުނީ، އަސްލު އަދަބުގެ ތިން ބައި ކުޅަ ދެ ބައި ކުޑަކުދިންނަށް ދޭންޖެހޭ ގޮތަށް ކުޑަކުދިންގެ އަދުލުގެ ގާނޫނުގައި އޮތީ ކުޑަކުދިންނަށް އަދަބު ކަނޑައަޅާނެ މިންވަރު ބަޔާން ކޮށްފައިނުވާ މައްސަލަތަކުގައި ކަމަށެވެ.
އަދި ޖިންސީ ގޯނާގެ މައްސަލަތަކުގައި ކުޑަކުދިންނަށް ދެވޭނެ އަދަބު ގާނޫނުގައި ސާފުކޮށް ބަޔާން ކޮށްފައިވާތީ އަދަބު ކަނޑައަޅަން ޖެހޭނީ އެ ގާނޫނުގައި އޮތްގޮތަށް ކަމަށާ، އެގޮތުން ކުޑަކުއްޖަކަށް ޖިންސީ ގޯނާގެ ކުރުމުގައި ކުޑަކުއްޖަކު ބައިވެރިވެއްޖެ ނަމަ އެފަދަ ކުއްޖެއްގެ އަދަބަކީ ފަސް އަހަރަށް ވުރެ ދިގު ނޫން މުއްދަތަކަށް ކުޑަކުދިންނަށް ހާއްސަ ޖަލެއްގައި ބަންދު ކުރުން ކަމަށެވެ.
އެހެން ކަމުން، ހައި ކޯޓުގައި އެ މައްސަލަ ބެއްލެވި ފަނޑިޔާރުން ކަމުގައިވާ ފަނޑިޔާރު މުހައްމަދު ސަލީމް, ފަނޑިޔާރު ހުޒައިފާ މުހައްމަދު އަދި ފަނޑިޔާރު ހަސަން ޝަފީއުގެ އިއްތިފާގުން ކުރެއްވި ހުކުމުގައިވަނީ ޖުވެނައިލް ކޯޓުގެ ހުކުމް ބާތިލްކޮށް، އެ ކުއްޖާއަށް ކަނޑައަޅަންޖެހޭ އަދަބާ މެދު ޖުވެނައިލް ކޯޓުން އަލުން ގޮތެއް ނިންމަން އަންގާ ކަމަށެވެ.
Advertisement
This content is created and paid for by advertisers and does not involve Voice Journalists
