ހދ ހަނިމާދޫ އިންޓަނޭޝަނަލް އެއާޕޯޓު ބޮޑުކުރުމަށް ކުރިއަށް ގެންދާ މަޝްރޫއުގެ ތެރެއިން ކަނޑައަޅާފައިވާ ސަރަހައްދުން ނަގާފައިވާ ބޮޑެތި ގަސްތައް އެ ރަށުގެ ކައުންސިލްގެ ހުއްދަނެތި ބޭރުކުރަމުންދާ މައްސަލަ އެ ކައުންސިލުން އެންވަޔަރުމަންޓު ޕްރޮޓެކްޝަން އޭޖެންސީ (އީޕީއޭ) ގެ ސަމާލުކަމަށް ގެނެސްފި އެވެ.

ހަނިމާދޫ އެއާޕޯޓު ބޮޑުކުރުމުގެ މަޝްރޫއު ކުރިއަށް ގެންދިއުމަށް ކަނޑައަޅާފައިވާ ސަރަހައްދުގައި ހުރި ބޮޑެތި ގަސްތައް ކައުންސިލްގެ ހުއްދަ ނުހޯދާ މީގެ ކުރިންވެސް ނަގާފައިވާކަމަށް ހަނިމާދޫ ކައުންސިލްގެ ނައިބު ރައީސް ފިރާގު މުހައްމަދު ވަނީ ވިދާޅުވެފަ އެވެ. 

އެ މައްސަލަ ފެންމަތިވެފައި ވަނިކޮށް އަނެއްކާވެސް ގަސްތައް ބޭރުކުރަމުންދާކަން ކައުންސިލްގެ ސަމާލުކަމަށް އައިސްފައިވާ ކަމަށާއި، އެކަން އެ ކައުންސިލުން އީޕީއެއް އަންގާފައިވާނެ ކަމަށް ފިރާގުވަނީ އެ މައްސަލައާއި ގުޅޭގޮތުން ކުރެއްވި ޓްވީޓެއްގައި ހިއްސާ ކުރައްވާފަ އެވެ. 

Advertisement

މީގެ ކުރިން އެ މައްސަލަ އީޕީއޭގެ ސަމާލުކަމަށް ގެނައުމުން، އީޕީއޭއިން ބުނެފައިވަނީ އެއާޕޯޓު ބޮޑުކުރުމަށް ކަނޑައަޅާފައިވާ ސަރަހައްދުގައި ހުރި ބޮޑެތި ގަސްތައް ނެގުމަށްފަހު ކައުންސިލުން ދައްކާ ސަރަހައްދެއްގައި އެ ގަސްތައް އިންދުމަށް އަންގާފަ އެވެ. އަދި އެ ސަރަހައްދުން ނަގާ ހުރިހާ ގަހެއް އިންދުމަކީ ކުރެވޭނެ ކަމަކަށް ނުވާއިރު، ގަސްތައް ބޭރު ކުރާނަމަ ކައުންސިލްގެ ހުއްދަ ހޯދައިގެން އެކަން ކުރުމަށް އީޕީއޭއިން ވަނީ އަންގާފަ އެވެ. 

އެހެން ނަމަވެސް އަނެއްކާވެސް ހަނިމާދޫއިން ގަސްތައް ބޭރުކުރަން ފަށާފައިވަނީ ހަނިމާދޫ ކައުންސިލްގެ ހުއްދަ ހޯދުމަކާއި ނުލައެވެ. 

ހަނިމާދޫ އެއާޕޯޓު ސަރަހައްދުން ނަގާފައިވާ ގަސް ގެންދަނީ 

ހަނިމާދޫ އެއާޕޯޓު ބޮޑުކުރުމަށް ކަނޑައަޅާފައިވާ ސަރަހައްދުން ނަގާ ގަސްތައް ކައުންސިލުން ދައްކާތަނެއްގައި އިންދުމަކީ އެ މަސައްކަތް ހަވާލުކުރާ ކުންފުނީގެ ޒިންމާއެއްގެ ގޮތުގައި ހިމަނާފައިވާ މަސައްކަތެކެވެ. 

ހަނިމާދޫ އެއާޕޯޓު ތަރައްގީކުރުމުގެ މަޝްރޫއަކީ 2.1 ބިލިއަން ރުފިޔާގެ މަޝްރޫއެކެވެ. އެ މަޝްރޫއު ހިންގުމަށް ސަރުކާރުން ވަނީ އިންޑިއާގެ ޖޭއެމްސީ ކުންފުންޏަށް ހަވާލުކޮށްފަ އެވެ. 

މި މަޝްރޫއުގެ މަސައްކަތް ނިންމައި 2024ގައި އެއާޕޯޓުން ހިދުމަތް ދޭން ފަށަން ހަމަޖެހިފަވާ ކަމަށް އިކޮނޮމިކް މިނިސްޓްރީން މީގެ ކުރިން ވަނީ ވިދާޅުވެފައެވެ. މި މަޝްރޫއުގެ ދަށުން ހަނިމާދޫ އެއާޕޯޓުގައި 2.46 ކިލޯމީޓަރުގެ އާ ރަންވޭއެއް ގާއިމްކުރާނެ އެވެ.

އެހެން ނަމަވެސް މަޝްރޫއުގެ މިހާ ކުރީކޮޅު މަޝްރޫއު ހަވާލުކުރާ ކުންފުނިން އުސޫލުތަކާއި ޚިލާފުވެފައިވާތީ ކައުންސިލުން ގެންދަނީ ކަންބޮޑުވުން ފާޅުކުރަމުންނެވެ. އަދި ގަސްތައް ބޭރުކުރާ މައްސަލައިގައި އަވަސް ޙައްލެއް ހޯއްދަވާދެއްވުމަށް ކައުންސިލުން ވަނީ ކަމާ ގުޅުންހުރި އިދާރާގައި އެދިފަ

އެވެ.