ސަރުކާރުގެ ކަރަންޓް ކުންފުނި، ސްޓެލްކޯ އަކީ ރައްކާތެރި މާހައުލެއްގައި މަސައްކަތް ކުރުމުގެ ހުރިހާ ވަސީލަތްތަކެއް މުވައްޒަފުންނަށް ފުރިހަމަކޮށްދީފައިވާ ކުންފުންޏެއް ކަމަށް އެ ކުންފުނީގެ މެނޭޖިން ޑިރެކްޓަރު އަހުމަދު ޝަރީފް ވިދާޅުވެއްޖެއެވެ.
ބައިނަލްއަގުވާމީ މަސައްކަތްތެރިންގެ ދުވަހުގެ ތަހުނިޔާ ސްޓެލްކޯގެ އެންމެހައި މުވައްޒަފުންނަށް އަރިސް ކުރައްވައި، ޝަރީފު ފޮނުއްވި މެސެޖެއްގައި ވިދާޅުވީ، ސްޓެލްކޯގެ މުވައްޒަފުންނަކީ ދިވެހި ރައްޔިތުންނަށް ވަރަށް މުހިންމު ޚިދުމަތެއް ކޮށްދެމުންދާ ބައެއް ކަމަށެވެ. އަދި އެކަމަށްޓަކައި، ކުންފުނީގެ މެނޭޖިން ޑިރެކްޓަރު ގެ ހައިސިއްޔަތުން އެންމެހައި މުވައްޒަފުންނަށް ޝުކުރު އަދާކުރައްވާ ކަމަށްވެސް ވިދާޅުވި އެވެ.
އަދި ކުރިމަގުގައިވެސް ފެންވަރު ރަނގަޅު ޚިދުމަތެއް ރައްޔިތުންނަށް ފޯރުކޮށްދިނުމުގައި ދެމި ތިބުމަށްވެސް ޝަރީފް ވަނީ މުވައްޒަފުންގެ ފަރާތުން އެދިލައްވާފައެވެ.
މިއާއެކު ޝަރީފް ވިދާޅުވީ މި އަހަރުގެ މަސައްކަތްތެރިންގެ ދުވަހުގެ ޝިޢާރަކީ މަސައްކަތުގެ މާހައުލަކީ ރައްކާތެރި ތަނަކަށް ހެދުމާއި، އަދި ސިއްހީ ގޮތުން ދުޅަހެޔޮ ތަނަކަށް ހެދުން ކަމަށާ، ސްޓެލްކޯ އަކީ އެފަދަ މާހައުލެއް މުވައްޒަފުންނަށް ހޯދަދީފައިވާ ކުންފުންޏެއް ކަމަށެވެ.
"ސްޓެލްކޯއަކީ ސިއްހީ ދުޅަހެޔޮކަމާއި، ރައްކާތެރި މާހައުލެއްގައި މަސައްކަތް ކުރުމުގެ ހުރިހާ ވަސީލަތްތަކެއް ސްޓެލްކޯގެ މުވައްޒަފުންނަށް ފުރިހަމަކޮށްދީފައިވާ ކުންފުންޏެއް. އަދި މިކަމުގައި އިތުރަށް ހަރުދަނާ ކުރުމުގެ މަސައްކަތް ވެސް ދަނީ ކުރެވެމުން."
ސްޓެލްކޯގެ މެނޭޖިންގ ޑިރެކްޓަރ އަހުމަދު ޝަރީފް
Advertisement
This content is created and paid for by advertisers and does not involve Voice Journalists
