ހޯމް މިނިސްޓަރު ޢިމްރާން އަބްދުالله މޭ ޑޭގައި ހެއްދެވީ ބޮޑެތި އިތުރުފުޅު ކަމަށް ރައްޔިތުންގެ މަޖިލީހުގެ މާވަށު ދާއިރާގެ މެންބަރު މުހައްމަދު ސަޢީދު ވިދާޅުވެއްޖެއެވެ. 

2015 ވަނަ އަހަރުގެ މެއި މަހުގެ 1 ވަނަ ދުވަހު، ރައީސް ޔާމީން އަބްދުލްގައްޔޫމް ގެ ވެރިކަމުގައި އޭރުގެ އިދިކޮޅު ފަރާތްތަކުން ކުރި މުޒާހަރާގައި ވާހަކަ ދައްކަވަމުން ޢިމްރާން ވަނީ އަނިޔާވެރި ގޮތަކަށް އޮކްޓޯބަރު 2012ގައި އަވަހަރާކޮށްލި އަފްރާޝީމްގެ މަރުގެ ހަގީގަތް ޔާމީންއަށް އެނގިވަޑައިގަންނަވާނެ ކަމަށާ ޑޮކިއުމެންޓްތައް އަތުގައި އެބަހުރި ކަމަށް ވިދާޅުވެފައެވެ. 

"[އަފްރާޝިމް އަވަހާރަކޮށްލުމުގައި އަމަލީ ގޮތުން ބައިވެރިވިކަން ސާބިތުވެ މަރަން ހުކުމްކޮށްފައިވާ] ހުމާމު ބުނީ ތެދެއް. ހުމާމު ބުނީ ޑރ. އަފްރަޝީމް ޝަހީދުކުރި މީހުން އެންމެ ރަނގަޅަށް އެނގޭނީ ރައީސް ޔާމީނާއި އަހުމަދު އަދީބާ ދެ މީހުންނަށޭ. އެ ދެ މީހުންނަށް އެނގޭނެ. އާދެ، މި ގައުމުގައި ތިބި އެންމެ ބޮޑު ދެ އަނިޔާވެރިން އެ ދެ މީހުންނަކީ. އަޅުގަނޑުމެން އެއްވެ މި ތިބީ މި އަނިޔާވެރިކަމާ ދެކޮޅަށް، މި އަނިޔާވެރިކަން ނިންމަން،" 1 މެއި 2015ގައި އޭރުގެ އިދިކޮޅު އިއްތިހާދުން ބޭއްވި ބޮޑު އެއްވުމުގައި އިމްރާން ވިދާޅުވި އެވެ.

ޢިމްރާން އެފަދައިން ވިދާޅުވި ނަމަވެސް، އެއީ ދޮގުކަން އޭނާގެ އަމަލުތައް މިހާރު ހުރިގޮތުން އެނގޭކަން ގިނަ ބަޔަކު ތުހުމަތު ކުރަމުންދާ މި ދަނޑިވަޅުގައި ޢިމްރާން ވަނީ އެދުވަހަކީ  މެއި ޑޭ މުޒާހަރާ އަކީ ރާއްޖޭގެ ތަރީޚް ބަދަލުކޮށްލި މުޒާހަރާ އެއް ކަމަށް ވިދާޅުވެފައެވެ. 

އަދި ކުރީގެ ރައީސް ޔާމީން އަބްދުލްގައްޔޫމް ގެ ކިބައިން ދިވެހިން ސަލާމަތްވީ މެއި ޑޭގައި ދިވެހިން ދެއްކި އެއްބައިވަންތަ ކަމުން ކަމަށްވެސް އޭނާ ވިދާޅުވި އެވެ. 

ޢިމްރާންގެ އެ ވާހަކަތަކާއި ގުޅިގެން ސަޢީދު ކުރެއްވި ޓްވީޓެއްގައި ވިދާޅުވީ، އޭރުވެސް ރައީސް ޔާމީން އަށް އަނިޔާ ދިނުމަށް ވާގިވެރިވީ އިމްރާން އިސްވެ ހުންނަވައިގެން ކަމަށެވެ.

އަދި ހޯމްމިނިސްޓަރުގެ މަގާމުގައި ހުންނަވައިގެން ހުރެ މިއަދުވެސް ކުރައްވަނީ އެކަންތައް ކަމަށް ސަޢީދު ވިދާޅުވިއެވެ. 
"މޭޑޭ ގައި ހެދީ ބޮޑެތި ދޮގުތައް. އަބަދު އެއްގޮތަކަށް އޮވެދާނެކަމަށް ދެކެވަޑައި ނުގައްނަވާ! ޤާނޫނު އަރާހަމަކުރާނެ!" ސަޢީދު ވިދާޅުވިއެެވެ. 

ރައީސް ޔާމީނުގެ ވެރިކަން ބަދަލުވެ އިމްރާނަށް ހޯމް މިނިސްޓަރުކަން ލިބިވަޑައިގެންނެވި ފަހުން މޭޑޭގައި ހުރިކަމަށް ވިދާޅުވި ހެކިތަކާ ގުޅިގެން ނޫސްވެރިން ސުވާލުކުރުމުން އެތައް ފަހަރެއްގެ މަތިން އެ ސުވާލަށް ޖަވާބުދެއްވަން އިމްރާނުވަނީ ދެކޮޅުހައްދަވާފައެވެ.

ރައްޔިތުންގެ މަޖިލީހުގައި އެކަމާމެދު ސުވާލުކުރުމުން އިމްރާން ވިދާޅުވެފައިވަނީ މޭޑޭގައި އޭނާގެ އަތްޕުޅުގައި ހުރި ހެކިތައް ފުލުހުން އޭނާ އަތްޕުޅުން އަތުލައިގެން ގެންދިޔައީ ކަމަށެވެ. ނަމަވެސް އެ ހެކި ހޯއްދަވަން ފަހުން މަސައްކަތްކުރެއްވިތޯ ސުވާލުކުރުމުން އެ ސުވާލަށް އިމްރާނު ޖަވާބެއް ނުދެއްވައެވެ.