ކަރަންޓު ބިލް ކުރާ ޓެރިފް ރޭޓްއަކީ ސްޓެލްކޯއިން ކަނޑައަޅާ ކަމެއް ނޫން ކަމަށް ސްޓެލްކޯގެ މެނޭޖިންގ ޑިރެކްޓަރ އަހްމަދު ޝަރީފް ވިދާޅުވެއްޖެއެވެ.

ޝަރީފް މިހެން ވިދާޅުވެފައިވަނީ މިމަހުގެ ކަރަންޓު ބިލްތައް އާދަޔާޚިލާފަށް މަތި ކަމަށް ދައްކާ ޕޯސްޓްތަކެއް ސޯސަލް މީޑިޔާގައި ދައުރުވުމާއި ގުޅިގެން، މިއީ މީޓަރުގެ ރީޑިން ނުނަގައި ސްޓެލްކޯއިން ތައްޔާރުކޮށްފައިވާ ބިލްތަކެއް ކަމަށް ދެކެވެމުން އަންނަ ވާހަކަތަކަށް ރައްދު ދެއްވަމުންނެވެ.

އެގޮތުން ޝަރީފް މިއަދު ކުރެއްވި ޓްވީޓެއްގައި ވިދާޅުވެެފައިވަނީ ރީޑިންގ ނުނަގައި ބިލް ބޮޑުކުރިކަމަށް ދެކެވެމުންދަނީ އެއްވެސް އަސާސެއް ނެތް ވާހަކައެއް ކަމަށެވެ.

އަދި ސްޓެލްކޯއިން އެއްވެސް އިރެއްގައި ބިލް އާއި ބެހޭ ގޮތުން ސައްހަ ނޫން މައުލޫމާތެއް ހާމަ ކޮށްފައެއް ނުވާނެ ކަމަށެވެ.

މިއާއިއެކު ޓެރިފް ރޭޓްއަކީ ސްޓެލްކޯ އިން ކަނޑައަޅާ ކަމެއް ނޫން ކަމަށާއި ކަރަންޓު ބޭނުން ކުރުމަކީ ސްޓެލްކޯއިން ކޮންޓްރޯލް އޮންނަ ކަމެއް ނޫން ކަމަށް ވެސް ޝަރީފް ވިދާޅުވިއެވެ.

ވޭތުވެދިޔަ މަހަކީ އަދަޔާޚިލާފަށް ޖައްވު ހޫނުގަދަ މަހަކަށް ވެފައި ރޯދަމަސް ކަމަށް ވުމުގެ ސަބަބުން ކަރަންޓު ބޭނުންކުރާ މިންވަރު ރިކޯޑް އަދަދަކަށް މަތިވެފައިވާ ކަމަށާއި ރޭގަނޑުގެ ވަގުތުގައިވެސް ކަރަންޓު އުފައްދަން ޖެހޭ މިންވަރު އިތުރުވެފައިވާ ކަމަށް ސްޓެލްކޯއިން ވަނީ ބުނެފައެވެ.

މިކަމުގެ ސަބަބުން ބިލްތައް ބޮޑު ވާނެ ކަމަށް ވެސް ސްޓެލްކޯއިން ބުނެފައިވެއެވެ. އެހެންކަމުން ކަރަންޓު އިގްތިސާދު ކުރުމަށް ހާއްސަ ސަމާލުކަމެއް ދިނުމަށް އެކުންފުނިން ވޭތުވެދިޔަ މަހުގެ ތެރޭގައި ތަކުރާރުކޮށް އައީ އިލްތިމާސް ކުރަމުންނެވެ.