ރާއްޖޭގެ ރައީސުލްޖުމްހޫރިއްޔާ އިބްރާހީމް މުހައްމަދު ޞާލިހުގެ ސިޓީ ފުޅެއްގެ ސަބަބުން ދިވެހިރާއްޖޭގެ ކަނޑުން ބޮޑު ބައެއް ގެއްލިގެން ގޮސްފައިވާ ކަމަށާ، އެކަމާއި ގުޅޭ އެސެސްމެންޓެއް ހެދުމުގެ މަސައްކަތް ކުރައްވަމުން ގެންދާ ކަމަށް އިދިކޮޅު ކޯލިޝަނުން ބުނެފިއެވެ.
ޕީޕީއެމް/ޕީއެންސީން ފޯޅަވަހީގެ މައްސަލާގައި އުފައްދާފައިވާ ކޮމިޓީގެ ފަރާތުން މިއަދު ބޭއްވި ނޫސްވެރިންގެ ބައްދަލުވުމުގައި ވާހަކަ ދައްކަވަމުން ޕީއެންސީގެ ނައިބު ރައީސް އަދި މާވަށު ދާއިރާގެ މެންބަރު މުހައްމަދު ސަޢީދު ވިދާޅުވީ، އެ ކޯލިޝަންގެ ރިޔާސީ ކެންޑިޑޭޓް ރައީސް އަބްދުالله ޔާމީން އަބްދުލްގައްޔޫމްގެ އެދިވަޑައިގެންނެވުމުގެ މަތިން، ރާއްޖޭގެ ކަނޑުގެ ސަރަހައްދުން ގެއްލިފައިވާ ސަރަހައްދު ހޯދުމުގެ މަސައްކަތް ކުރައްވަމުންދާ ކަމަށެވެ. އަދި އެކަމުގައި ރާއްޖެ އާއި ރާއްޖެއިން ބޭރުގެ ފަންނީ ފަރާތްތަކުގެ ލަފާ ހޯއްދަވަމުންދާ ކަމަށާ، އެކަމަށްޓަކައި ޚާއްސަ ކޮމިޓީއެއްވެސް އެކުލަވައިލާފައިވާ ކަން ސަޢީދު ފާހަގަކުރެއްވި އެވެ.
ފޯޅަވަހި މައްސަލައިގެ ކޮމިޓީން މިހާރު ކޮށްފައިވާ މަސައްކަތްތަކާއި ގުޅިގެން ވާހަކަ ދައްކަވަމުން ސަޢީދު އިތުރަށް ވިދާޅުވީ، އެ މައްސަލާގައި ހުކުމް ކުރުމުގެ ކުރިންވެސް އިދިކޮޅުން އިޓްލޮސް އަށް ސިޓީއެއް ފޮނުވާފައިވާ ކަމަށާ، އެ ސިޓީ އިޓްލޮސް އަށް ލިބިފައިވެސް ވާކަމަށެވެ. އަދި ހުކުމަށްފަހުވެސް ނޫސްވެރިންގެ ބައްދަލުވުމެއް ބޭއްވިފައިވާއިރު، އެ ބައްދަލު ވުމާއި ގުޅިގެންވެސް ގިނަ ބައެއްގެ ލަފާ އާއި މަޝްވަރާތަކެއް ލިބިގެން ގޮސްފައިވާ ކަމަށް އޭނާ ފާހަގަކުރެއްވިއެވެ. އެގޮތުން، ތަޢުލީމީ ބޭފުޅުންނާއި އެ ނޫން ފަރާތްތަކުންވެސް ފަރުދާގެ ފުރަގަހުގައި ހުރެގެންވެސް މަސައްކަތް ކޮށްދެއްވާނެ ކަމަށް ވިދާޅުވެފައިވާ ކަމަށް ސަޢީދު ވިދާޅުވިއެވެ.
ސަޢީދު ވިދާޅުވީ، ފޯޅަވަހީގެ މައްސަލާގައި އިޓްލޮސްއިން ކުރި ހުކުމް ބަލައި ނުގަންނަވާނެ ކަމަށާ، އަދި އެ މައްސަލަ އާއި ގުޅިގެން ކަމާބެހޭ ފަރާތްތަކުގެ ޚިޔާލު ހޯއްދެވުމުގެ މަސައްކަތް މިހާރުވެސް ފައްޓަވާފައިވާ ކަމަށެވެ.
ދެކުނުގެ މަސްކަނޑުން ވަރަށް ބޮޑު ބައެއް ގެއްލިގެން މި ދިޔައީ. މިފަދަ ބޮޑު ބައެއް ގެއްލިގެން ދާއިރު، ރާއްޖޭގެ ބޮޑު ބައެއް ގެއްލިގެން ދާއިރު، އާއްމު ބުއްދިވެސް ގަބޫލު ނުކުރާނެ ނީގެ އަޑީގައި ކޮންމެސް ކަހަލަ ގޯސްތަކެއް ހިނގާފައި ނޯންނާނެ ކަމަކަށް. އެއްވެސް ޝައްކެއްނެތް ވަރަށް ބޮޑެތި ގޯސްތައް ހިނގާފައި އޮންނާނެ. އަޅުގަނޑުމެންނަށް ދިރާސާ ކުރުން، އާއްމު ބުއްދިވެސް ގަބޫލު ނުކުރާނެ މީގެ އަޑީގައި ކޮންމެސް ކަހަލަ ގޯސްތަކެއް ހިނގާފައި ނޯންނާނެ ކަމަށް. އަޅުގަނޑުމެންނަށް ދިރާސާ ކުރުމުން، ވިސްނާލުމުންވެސް އެނގޭ، ރައީސް އިބްރާހިމް މުހައްމަދު ޞާލިހަށް، ސަރުކާރަށް، މަޖުބޫރު ތަކެއް މިކަމުގައި ވެފައި އޮތް ކަން. އަޅުގަނޑުމެންނަށް ނޭނގިގެން މިއުޅެނީ ކޮންކަހަލަ މަޖުބޫރީ ހާލަތެއްގައިތޯ ރައީސް އިބްރާހިމް މުހައްމަދު ޞާލިހް މިފަދަ ނިންމުމެއް މި ނިންމެވީ.
މުހައްމަދު ސަޢީދު
މީގެ އިތުރުން ސަޢީދު ވަނީ، ރާއްޖޭގެ ކަނޑުން ގެއްލިގެން ދިޔަ ސަރަހައްދުގައި މިހާރުވެސް ދާ އަޅަން ފަށާފައިވާ ކަމަށާ، އެ ސަރަހައްދުތައް މާ ކުރީއްސުރެ، މައްސަލަ ނިމުމުގެ ކުރިންވެސް، މޮރިޝަސް އިން އެކި ގައުމުތަކުގެ މަސްވެރިންނަށް ވިއްކާފައިވާކަމަށް ގަބޫލުކުރެވޭ ކަމަށެވެ. އެކަން މިއަދު އެނގިގެން ގޮސްފައިވާ ކަމަށް އޭނާ ވިދާޅުވި އެވެ.
ރާއްޖޭގެ ކަނޑުން ގެއްލިގެން ދިޔަ ސަރަހައްދާއި ގުޅޭ ގޮތުން މަސްވެރިންނާއި، އެންޖީއޯ ތަކާއި، ކައުންސިލް ތަކާއި ބައިނަލްއަގުވާމީ އެކިފަރާތްތަކާއިވެސް މަޝްވަރާތަކެއް ކުރައްވާނެކަމަށް ސަޢީދު ވިދާޅުވިއެވެ.
"ގެއްލިގެން ދިޔަ، 44000 އަކަ ކިލޯމީޓަރު ގެ، އޭގެ ގާނޫނު އަސާސީގައި ބުނާ ކަނޑާއި ކަނޑުގެ އަޑީއާއި، އެ ސަރަހައްދާއި، އެ ސަރަހައްދުގައި ހިމެނޭ ހުރިހާ ދިވެހިންގެ މިލްކިއްޔާތުގެ ފައިނެންޝިއަލް އިވެލުއޭޝަން އެއްވެސް ހަދަންޖެހޭ. އެއީ ދައުލަތަކީ ދިވެހި ރައްޔިތުންގެ މިލްކިއްޔާތެއް. އަންނަން އޮތް މުސްތަގުބަލާއި، މިހާރު ދިރިތިބީންގެ ހައްގެއް، ރައީސުލްޖުމްހޫރިއްޔާގެ ސިޓީ އަކުން ގެއްލިގެން މިއުޅެނީ. އެހެންވީމާ އިގްތިޞާދީ ގޮތުން، އިޖުތިމާއީ ގޮތުން، އަޅުގަމޑުމެންނަށް މި ގެއްލިގެން ދިޔަ، ބޮޑު ބައިގެ އެސެސްމަންޓެއް ހަދަން މަސައްކަތް ކުރަމުން." ސަޢީދު ވިދާޅުވިއެވެ.
Advertisement
This content is created and paid for by advertisers and does not involve Voice Journalists
