ތެލުގެ އަގު ހެޔޮކޮށް ސިއްޙީ ދާއިރާގެ މަސައްކަތްތެރިންގެ މުސާރަ ބޮޑުކުރީ ރައީސުލްޖުމްހޫރިއްޔާ އިބްރާހިމް މުޙައްމަދު ޞާލިހު ފޮނުއްވި ސިއްރު ސިޓީފުޅުގެ ސަބަބުން ރާއްޖޭގެ ކަނޑުގެ ސަރަހައްދުން ބައެއް ގެއްލިގެން ދިއުމުން ރައްޔިތުންގެ ފޯކަސް އެހެން ދިމާލަކަށް އަނބުރާލުމަށް ކަމަށް މަޖިލީހުގެ މަހިބަދޫ ދާއިރާގެ މެމްބަރު އަހުމަދު ތާރިގު ވިދާޅުވެއްޖެ އެވެ. 

ތާރިގު މިފަދައިން ވިދާޅުވެފައިވަނީ ފޯޅަވަހި މައްސަލައާއި ގުޅޭގޮތުން ކުރެއްވި ޓްވީޓެއްގަ އެވެ. 

ތާރިގު ވިދާޅުވީ އިޓްލޮސްގައި އޮތް ދިވެހިރާއްޖޭގެ ދެކުނުގެ އިން ކަނޑައެޅުމުގެ މައްސަލަ ނިމުމާއެކު އަދި ދިވެހި މަސްކަނޑުން ބައެއް ގެއްލިގެން ދިއުމާއި ވިދިގެން މީގެ ކުރިން ސަރުކާރުން ކުޑަ ނުކުރެވޭނެކަމަށް ބުނަމުން އައި ހިޔާ ފްލެޓުގެ ކުލި ކުޑަކޮށް، ތެލުގެ އަގު ހެޔޮކޮށް އަދި މަސައްކަތްތެރިންގެ މުސާރައަށް ހެޔޮ ބަދަލުތަކެއް ގެނައީ އެ މައްސަލައިގެ ފޯކަސް އެހެން ދިމާލަކަށް ބަދަލުކޮށްލަން ކަމަށެވެ. 

Advertisement

އެހެން ނަމަވެސް، ސަރުކާރުން ކިތަންމެ މަސައްކަތެއް ކުރި ނަމަވެސް ރައްޔިތުންގެ ފޯކަސް އެ މައްސަލައިން ބަދަލު ނުކޮށްލެވޭނެ ކަމަށާއި، ސަރުކާރުން ކަނޑުގެ ސަރަހައްދުން ބައެއް ދޫކޮށްނުލާކަމަށް ނުހެދޭނެކަމަށް ތާރިގު ވިދާޅުވި އެވެ. 

އިޓްލޮސްގައި އޮތް ޗާގޯސް މައްސަލަ ނިމިގެން ދިޔަ ގޮތާއި ގުޅިގެން ކުރީގެ ބަންޑާރަ ނައިބުންނާއި ޤާނޫނީ ދާއިރާގައި ހަރަކާތްތެރިވާ ފަރާތްތައް ގެންދަނީ ކެނޑިނޭޅި ކަންބޮޑުވުން ފާޅުކުރަމުން ނެވެ. 

އެގޮތުން ޗާގޯސް އަކީ މޮރިޝަސްގެ ސިޔާދު ހިނގާ ކަމެއްކަމަށް ޤަބޫލުކޮށް ރައީސުލްޖުމްހޫރިއްޔާ އިބްރާހިމް މުޙައްމަދު ޞާލިހު ފޮނުއްވި ސިޓީފުޅުގެ ސަބަބުން އިޓްލޮސްގައި އޮތް މައްސަލައަށް އަސަރުކޮށްފައިވާ ކަމަށާއި، ކަނޑުގެ ސަރަހައްދުން ބައެއް ގެއްލުނީ އެ ސަބަބާއި ހުރެކަމަށް އެ ފަރާތްތައް ދަނީ ތުހުމަތު ކުރަމުންނެވެ. 

އަނެއްކޮޅުން ސަރުކާރުން ބުނަމުންދަނީ އިން ކަނޑައެޅުމުގެ މައްސަލައާއި ސިޔާދަތު ލިބިގެންވާކަމަށް ބުނާ މައްސަލައަކީ ތަފާތު ދެ މައްސަލައެއް ކަމަށެވެ. 

އެހެންކަމުން މޮރިޝަސްއަށް ފޮނުވި ސިޓީގެ ސަބަބުން އިޓްލޮސްގައ ކުރިއަށް ދިޔަ މައްސަލައަށް ކުޑަވެސް އަސަރެއް ނުކުރާނެ ކަމަށާއި، އިޓްލޮސްގައި އޮތް މައްސަލަ ނިމި ދިވެހިރއްޖޭގެ އިން ކަނޑައެޅިގެން ދިއުމަކީ ރާއްޖެއަށް ލިބިގެންދިޔަ ބޮޑު ކާމިޔާބީއެއްކަމަށް ރައީސް ޞާލިހު ވަނީ ވިދާޅުވެފަ އެވެ.