ރާއްޖޭގެ ހައިޑްރޯގްރްފީ ޗާޓުތައް އަޕްޑޭޓްކުރުމަށް އިންޑިއާގެ އެހީތެރިކަން ފޯރުކޮށްދޭން އެ ޤައުމު އޮތީ ތައްޔާރަށްކަމަށް އިންޑިއާގެ ޑިފެންސް މިނިސްޓަރު ރަޖްނަތު ސިންގް ވިދާޅުވެއްޖެ އެވެ.

ރަސްމީ ދަތުރުފުޅެއްގައި ދިވެހިރާއްޖެ ވަޑައިގެން އިންޑިއާގެ ޑިފެންސް މިނިސްޓަރު ވަނީ ރައީސުލްޖުމްޙޫރިއްޔާ އިބްރާހިމް މުހައްމަދު ޞާލިހުގެ އަރިހަށް އިޚްތިރާމުގެ ޒިޔާރަތެއް ކުރައްވާފަ އެވެ. 

އެ ބައްދަލުވުމުގައި ދެ ޤައުމުގެ ދެމެދުގައި އޮތް ޒަމާންވީ ގުޅުމާއި ރާއްޖޭގެ ތަރައްގީއަށް އިންޑިއާއިން ފޯރުކޮށްދެމުންދާ އެހީތެރިކަމާއި ގުޅޭގޮތުން ވަނީ ވާހަކަދައްކަވާފަ އެވެ. 

އެގޮތުން އިންޑިއާގެ ޑިފެންސް މިނިސްޓަރު ސިންގު ވިދާޅުވީ މި ސަރުކާރުގެ "ނޫ އިޤްތިޞާދު" ސިޔާސަތުގެ ދަށުން ކުރަން ހުރި ކަންކަމަށް އެހީތެރިވެދިނުމުގެ ގޮތުން ތިން ބުރެއްގެ މަތިން ހައިޑްރޯގްރަފީ ސާވޭގެ މަސައްކަތް ކޮށްފައިވާ ކަމަށެވެ. އަދި އެ ސާވޭގެ ތެރެއިން ތައްޔާރުކުރެވުނު ޗާޓުތައް ސަރުކާރާއި ހިއްސާކޮށްފައިވާއިރު، އެ ޗާޓުތައް އަޕްޑޭޓު ކުރުމުގެ މަސައްކަތް ކޮށްދިނުމަށް ވެސް އިންޑިއާ އޮތީ ތައްޔާރަށްކަމަށް ސިންގު ވިދާޅުވި އެވެ. 

އޭގެ އިތުރުން އިންޑިއާގެ ޑިފެންސް މިނިސްޓަރު ވަނީ ދިފާއީ ދާއިރާ ހަރުދަނާ ކުރުމަށް ކުރެވެން އޮތް ކަންކަމާއި ގުޅިގެން މިހާރަށްވުރެ ފުޅާދާއިރާއެއްގައި މަޝްވަރާކޮށް ދެ ގައުމުން ގުޅިގެން މަސައްކަތް ކުރެވޭނެ ގޮތްތައް ހޯދުމާއި ގުޅޭގޮތުން ވާހަކަދައްކަވާފަ އެވެ. އަދި ދެ ގައުމުގެ މަތީފަންތީގެ ބޭފުޅުންގެ ދަތުރުފުޅުތަކާއި ރައްޔިތުންގެ މެދުގައި އޮންނަ ގުޅުންތަކާއެކު ވޭތުވެދިޔަ ހަތަރު އަހަރުގެ ތެރޭގައި އެ ގުޅުން އިތުރަށް ބަދަހިވެގެން ގޮސްފައިވާކަން ވެސް އޭނާގެ ވާހަކައިގައި ފާހަގަކުރެއްވި އެވެ. 

ރައީސް ޞާލިހު ވަނީ އިންޑިއާއިން ރާއްޖޭގެ ދިފާއީ ކަންކަން ހަރުދަނާ ކޮށްދިނުމަށް ކޮށްދީފައިވާ ކަންކަން ފާހަގަކުރައްވާ ޝުކުރު އަދާކުރައްވާފަ އެވެ. އަދި ކަނޑުގެ ޗާޓުތައް އެކުލަވާލުމަށް ކުރިއަށް ގެންދިޔަ ހައިޑްރޯގްރަފީ ސާވޭގެ މަސައްކަވެސް އެމަނިކުފާނު ފާހަގަކުރެއްވި އެވެ. 

އެ ސާވޭ ކުރިއަށް ގެންދިއުމަށް ބޭނުންވާ ވަސީލަތްތައް ފޯރުކޯށްދީ އިންޑިއާއިން ދިން އެހީތެރިކަން ފާހަގަކޮށް ރައީސުލްޖުމްހޫރިއްޔާ އިބްރާހިމް މުޙައްމަދު ޞާލިހުވަނީ އިންޑިއާ ސަރުކާރަށް ވަރަށް ޚާއްސަ ޝުކުރެއް އަދާކުރައްވާފަ އެވެ.