ފްރާންސްގެ ޕީއެސްޖީއަށް ކުޅެމުން އަންނަ އާޖެންޓީނާގެ ކެޕްޓަން ލަޔޮނަލް މެސީ ކުލަބުގެ ހުއްދަނެތި ޕްރެކްޓިސްއަށް ހާޒިރުނުވުމާއި ގުޅިގެން, މުސާރަ ނުލިބޭގޮތަށް އަދި ކުލަބުގެ ސީނިއަރ ޓީމުގެ ފަރިތަކުރުންތަކުގައި ބައިވެރި ނުވެވޭހެން ދެ ހަފްތާގެ މުއްދަތަށް އޭނާ ސަސްޕެންޑް ކޮށްފި އެވެ.
މީޑިއާ ރިޕޯޓްތައް ބުނާގޮތުގައި މެސީ ކުލަބުގެ ޕްރެކްޓިސްއަށް ހާޒިރުނުވީ ސައުދީ އަރަބިއާއަށް ދިއުމަށްޓަކައި އެވެ. އަދި ލީގުގައި އެންމެފަހުން ލޮރިއަންޓް އަތުން 3-1 ގެ ނަތީޖާއަކުން އަމިއްލަ ދަނޑުގައި ޕީއެސްޖީ ބަލިވި މެޗު ނިމުނުތާ މާގިނައިރުތަކެއް ނުވެ މެސީ ވަނީ ސައުދީ އަރަބިއާ އަށް ގޮސްފައެވެ.
ސައުދީ އަރަބިއްޔާގެ ޓޫރިޒަމް މިނިސްޓަރު އަހުމަދު އަލް ޚަތީބު ހޯމަ ދުވަހު މެސީއަށް މަރުހަބާ ވިދާޅުވެ ކުރެއްވި ޓްވީޓެއްގެ އިތުރުން މެސީގެ ސައުދީ ދަތުރުގެ ފޮޓޯތައް މީޑިއާގައި ވަނީ ފެތުރިފަ އެވެ.
ޕީއެސްޖީ އާއި އެކު މެސީ ހަދާފައިވާ ދެ އަހަރު ދުވަހުގެ އެއްބަސްވުން މިއަހަރުގެ ޖޫން މަހުގެ ނިޔަލަށް ހަމަވާއިރު ސައުދީގެ ވަރުގަދަ ކުލަބެއް ކަމަށްވާ އަލް ހިލާލުން އެއް އަހަރު ދުވަހުގެ އެއްބަސްވުމެއްގެ ދަށުން 400 މިލިއަން މެސީ އަށް ހުށަހެޅުމަށް ތައްޔާރަށް އޮތް ކަމަށް މީޑިއާތަކުން ވަނީ ރިޕޯޓްކޮށްފައެވެ. އަދި މެސީގެ މި ކުއްލި ދަތުރާއި އަލް ހިލާލުގެ ހުށަހެޅުމާއި ގުޅުމެއް އޮވެދާނެކަމަށް މީޑިއާތަކުން ވަނީ ރިޕޯޓްކޮށްފައެވެ.
Advertisement
This content is created and paid for by advertisers and does not involve Voice Journalists
