މާލެ ސިޓީ ކައުންސިލްގެ ފަރާތުން މާލެ ސަރަަހައްދުގެ ގޭބިސީތަކަށް ހިލޭ ކޮތަޅު ޕެކޭޖް ބަހަން ނިންމައިފިއެވެ.

މި ނިންމުން ނިންމާފައި ވަނީ މިއަދު ކުރިއަށް ގެންދިޔަ، އެ ކައުންސިލްގެ ހަތަރުވަނަ ދައުރުގެ 100 ވަނަ ރަސްމީ އާއްމު ޖަލްސާގައެވެ.

އެގޮތުން މާލޭ މޭޔަރު ޑރ. މުހައްމަދު މުއިއްޒު ވިދާޅުވީ، ސަރުކާރުން ކޮތަޅުން ޓެކްސްއެއް ނަގަން ފަށާފައި ވުމާއެކު، އެކަގާ ގުޅިގެން ބައެއް ފަރާތްތަކާ ވާހަކަދައްކައި މަޝްވަރާ ކޮށްލުމަށްފަހު، މާލޭގެ ގޭބިސީތަކަށް ކޮތަޅު ބެހުމަކީ ކުރަން ރަނގަޅު ކަމެއްގެ ގޮތުގައި ފާހަގަ ކުރެވުނު ކަމެއް ކަމަށެވެ.

Advertisement

އެހެންކަމުން 25 ކޮތަޅު ހިމެނޭ ރީޔޫސަބަލް ކޮތަޅު ޕެކް ތަކެއް ހެދުމަށްފަހު މާލޭ ސިޓީގެ ގޭބިސީތަކަށް ބެހުމަށް ސިޓީ ކައުންސިލްގެ ޖަލްސާގައި ވަނީ ފާސްކޮށްފައެވެ.

މުއިއްޒު ވިދާޅުވީ، މާލެއާއި ހުޅުމާލެ އަދި ވިލިމާލޭގެ ޖުމުލަ 50 ހާސް ގޭބިސީއަށް ކޮތަޅު ހަދިޔާ ކުރާނެ ކަމަށެވެ.

އެކަމަށް ގާތްގަނޑަކަށް 1.5 މިލިއަން ރުފިޔާ ހަރަދުވާނެ ކަމަށް ސިޓީ ކައުންސިލުން ވަނީ ލަފާކޮށްފައެވެ.

މުއިއްޒު ވިދާޅުވީ، އެކި ކުލައިގެ ކޮތަޅު ހިމެނޭ މި ޕެކޭޖްގެ ސަބަބުން އެކި ބާވަތުގެ ސާމާނު ގަންނައިރު ފަސޭހަ ވެގެންދާނެ ކަމަށާއި އަދި އެކޮތަޅުގައް ފުދޭވަރަކަށް ގިނަ ދުވަހު ބޭނުން ކުރެވޭނެ ކަމަށެވެ.