ސަރުކާރަށް ހަންފަތުރައިދޭ އެއްޗަކަށް މީޑިއާ ވެގެން ދިއުމަކީ ނޫސްވެރިކަމުގެ މިނިވަންކަން ގެއްލިގެން ދިއުންކަމަށް ރައްޔިތުންގެ މަޖިލީހުގެ އުނގޫފާރު ދާއިރާގެ މެމްބަރު މުޙައްމަދު ވަހީދު (ވައްޑެ) ވިދާޅުވެއްޖެ އެވެ.
ވަހީދު މިފަދައިން ވިދާޅުވެފައިވަނީ ދުނިޔޭގެ ނޫސްވެރިކަމުގެ މިނިވަންކަމުގެ ދުވަހާއި ގުޅުވާ ކުރެއްވި ޓްވީޓެއްގަ އެވެ.
ނޫސްވެރިކަމުގެ މިނިވަންކަން ރާއްޖޭގައި އޮތް މިންވަރަށް އަލިއަޅުވާލައްވާ ވަހީދު ކުރެއްވި އެ ޓްވީޓުގައި ވިދާޅުވީ ނޫސްވެރިކަމުގެ މިނިވަންކަން ގެއްލެނީ ހަމައެކަނި ބިރުދައްކައިގެން ނުވަތަ އަދަބުދީގެން އެކަނި ނޫން ކަމަށެވެ.
ސަރުކާރުން ނޫސްތަކަށް ފައިސާ ބަހާ ސަރުކާރަށް ހަންފަތުރައިދޭން މީޑިއާތައް ބޭނުންކުރަމުން ދިއުމަކީ ވެސް ނޫސްވެރިކަމުގެ މިނިވަންކަން ގެއްލުންކަމަށް ވަހީދު ވިދާޅުވި އެވެ.
"ނޫސްވެރިކަމުގެ މިނިވަން ގެއްލެނީ ހަމައެކަނި ބިރުދައްކައި އަދަބުދީގެން އެކަންޏެއް ނޫނެވެ. ސަރުކާރުގެ ފައިސާގައި ސަރުކާރަށް “ހަންފަތުރައިދޭ” އެއްޗަކަށް މީޑިޔާ ވުމަކީވެސް ނޫސްވެރިކަމުގެ މިނިވަންކަން ގެއްލުމެވެ"
އުނގޫފާރު ދާއިރާގެ މެމްބަރު މުޙައްމަދު ވަހީދު (ވައްޑެ)
ސަރުކާރުން ފައިސާދީގެން ނޫސްތަކުގެ ސުރުޚީތައް ކޮންޓްރޯލު ކުރަމުންދާކަމަށް ވިދާޅުވެ ވަހީދު ވަނީ މީގެ ކުރިންވެސް ފާޑުކިޔުން އަމާޒުކޮށްފަ އެވެ.
އެއީ ހުއްޓުވަން ޖެހޭނެ ކަމެއް ކަމަށާއި، މީޑިއާތައް ކޮންޓްރޯލުކޮށްގެން ޑިމޮކްރެޓިކް ވެރިކަމެއް ރާއްޖޭގައި ނުކުރެވޭނެކަމަށް ވަހީދު ވަނީ ވިދާޅުވެފަ އެވެ.
Advertisement
This content is created and paid for by advertisers and does not involve Voice Journalists
