ރ. އިނގުރައިދޫގައި ވަށްކަމާއި ފޭރުމުގެ މައްސަލަތައް އިތުރުވަމުންދާތީ އެ ރަށު ކައުންސިލުން ކަންބޮޑުވުން ފާޅުކޮށްފި އެވެ.

އިނގުރައިދޫގައި މިހާރަކަށް އައިސް ވަށްކަމާއި ފޭރުމުގެ މައްސަލަ އިތުރުވަމުންދާތީ އެކަމާއި ގުޅިގެން އެރަށު ކައުންސިލުން މިއަދު ނެރުނު އިޢުލާނެއްގައި ވަނީ، ރަށުގެ އަމާންކަން ނަގާލައި، މީހުންގެ މުދަލަށް އަރައިގަންނަމުންދާތީ، އެފަދަ ޢަމަލުތައް ހަރުކަށި އިބާރާތުން ކުށްވެރި ކުރާ ކަމަށް ބުނެފައެވެ. 

އަދި އެރަށުގައި ހިނގަމުންދާ އެފަދަ މައްސަލަތައް ހައްލެއް ހޯދައި، ކުށުގެ ވެއްޓަށް މީހުން ވަންނަ މިންވަރު މަދުކުރުމަށް ކުރަންޖެހޭ އެންމެހައި މަސައްކަތްތަކެއް ކުރުމަށް، ކަމާއި ގުޅުން ހުރި އިދާރާތަކާއި އެކު ކައުންސިލުން މަޝްވަރާ ކުރަމުންދާކަން އިއުލާނުގައި ފާހަގަކޮށްފައިވެއެވެ. 

މިއާއެކު، އެފަދަ ކަންކަމަކީ ރަށުގެ ރައްޔިތުންގެ އެއްބާރުލުމާއިއެކު ނޫނީ ހައްލު ކުރެވޭނެ ކަމެއް ނޫން ކަން ފާހަގަކޮށް އެ ކައުންސިލުން ވަނީ، އެކަން ހައްލު ކުރުމަށް ކަމާއި ބެހޭ ފަރާތްތަކަށް ސައްހަ މައުލޫމާތު ފޯރުކޮށްދީ، ކުށް މަދުކުރުމަށް ރައްޔިތުންނަށް ވެދެވެން އޮތް ހުރިހާ އެހީއަކާއި އެއްބާރުލުމެއް ދިނުމަށް އެދިފައެވެ. 

ހަމަ އެހެންމެ، ކުރިއަށްވުރެ ބޮޑަށް އަމިއްލަ މުދަލަށް ރައްކާތެރިވެ، ވައްކަންކުރާ ފަރާތްތަކަށް އެފަދަ ފުރުސަތު ފަހިވާނޭ ގޮތަށް ޢަމަލުތައް ނުބެހެއްޓުމަށްވެސް ކައުންސިލުން ވަނީ އިލްތިމާސްކޮށްފަ އެވެ.