ރައީސުލްޖުމްހޫރިއްޔާ އިބްރާހީމް މުހައްމަދު ޞާލިހުގެ މި ސަރުކާރާއި އެއްކޮޅަށް ތިބި އެމްއާރްއެމްގެ މެންބަރުންނާއި އެކު އެ ޕާޓީގެ ޒަޢީމް އަދި ކުރީގެ ރައީސް މައުމޫން އަބްދުލްޤައްޔޫމް ކުއްލި ބައްދަލުވުމެއް ފަށައިފި އެވެ.
މައުލޫމާތު ލިބިފައިވާ ގޮތުގައި މި ބައްދަލުވުން މިހާރު ކުރިއަށް ދަނީ މޫކައި ސޫޓްސްގެ ކޮންފަރެންސް ހޯލްގައެވެ. އަދި މި ބައްދަލުމުގައި، އެމްއާރްއެމްގެ ކައުންސިލް މެންބަރުންނާއި، ސަރުކާރުގެ އެކި މަގާމު ތަކުގައި ތިބި އެމްއާރުއެމްގެ މެންބަރުން ވަނީ ބައިވެރިވެފަ އެވެ.
އެމްއާރްއެމް އިން މިފަދަ ބައްދަލުވުމެއް އެ ޕާޓީގެ ސަރުކާރަށް ތާއީދުކުރާ މެންބަރުންނާއިއެކު ބާއްވާފައިވާއިރު، އެ ޕާޓީން ޗާގޯސް މައްސަލާގައި ސަރުކާރުން ނިންމި ނިންމުމަށް ދެކޮޅު ކަން ދާދިފަހުން ވަނީ އިޢުލާން ކޮށްފައެވެ. އަދި މިއަދު ޗާގޯސް މައްސަލާގައި އިދިކޮޅުން ބޭއްވި ނޫސްވެރިންގެ ބައްދަލުވުމުގައިވެސް އެ ޕާޓީގެ މެންބަރުން ވަނީ ބައިވެރިވެފަ އެވެ.
އެމްއާރްއެމް އަކީ މިހާރު މިހިނގާ ސަރުކާރުގެ ކޯލިޝަންގައި ހިމެނޭ ޕާޓީއެކެވެ. އަދި މިހާތަނަށްވެސް ކޯލިޝަންގައި ދެމި އޮތް ޕާޓީ އެކެވެ.
ނަމަވެސް މިއަހަރުގެ ސެޕްޓެމްބަރުގައި ބޭއްވުމަށް ހަމަޖެހިފައިވާ އިންތިޚާބުގައި އެމްޑީޕީ އާއި އެކު ކޯލިޝަން ހެދުމާއިމެދު އެ ޕާޓީން އަދި ވަކި ގޮތެއް އަދި ނިންމާފައި ނުވާއިރު، އެ ޕާޓީން އަންނަނީ ސަރުކާރާއި، އަދި ޖުމްހޫރީ ޕާޓީއާއި އެކުވެސް މަޝްވަރާތައް ކުރަމުންނެވެ.
Advertisement
This content is created and paid for by advertisers and does not involve Voice Journalists
