ޗާގޯސްގެ މައްސަލައިގައި ގެއްލިދިޔަ ކަނޑުގެ ސަރަހައްދު ހޯދުމަށް މާލެސިޓީ ކައުންސިލުން ގޮވާލައިފިއެވެ.

އެ މައްސަލައިގައި މާލެ ސިޓީ ކައުންސިލުން ނެރުނު ނޫސްބަޔާނުގައި ބުނީ، ދިވެހިރާއްޖޭގެ ޚާއްޞަ އިގްތިސާދީ ޒޯނުން 45000 އަކަކިލޯ މީޓަރަށްވުރެ ބޮޑު ސަރަހައްދެއް ގެއްލޭގޮތަށް އެ ސަރަހައްދުގެ މައްޗަށް މޮރިސަސްގެ ޞިޢާދަތީ ބާރު ހިނގާނެކަމަށް އެއްބަސްވެ ދިވެހި ސަރުކާރުން އަމަލު ލކުރި ގޮތް މާލޭ ސިޓީ ކައުންސިލުން ކުށްވެރިކުރާ ކަމަށެވެ.

ދިވެހިރާއްޖޭގެ މަސްވެރިން މިހާތަނަށް މަސްބާނަމުން އަންނަ ދެކުނު ކަނޑުގެ ސަރަހައްދުން ބައެއް، މޮރިޝަޝްއަށް ލިބޭގޮތަށް ނިންމާފައި ވުމަކީ ހަމައެކަނި ދެކުނުގެ އަތޮޅުތަކުގެ މަސްވެރިންނަށް ލިބޭ ގެއްލުމެއް ނޫން ކަމަށާއި ރާއްޖޭގެ މަސްވެރިންނަކީ އެއިރެއްގައި މަސްބޭނޭ ހިސާބަކަށް ދަތުރުކޮށް މަސްބާނަމުން އަންނަ ބައެއް ކަމަށް ސިޓީ ކައުންސިލުން ފާހަގަ ކުރިއެވެ.

Advertisement

އަދި މާލޭ ސިޓީގައި ދިރިއުޅޭ މަސްވެރިންނަށްވެސް އެކަމުގެ ސަބަބުން ހިތަށް ނުގެނެވޭހާ ގެއްލުން ކުރިމަތިވެ، ރާއްޖޭގެ މަސްކަނޑުތަކުން މަސް ހުސްވެ މަސްވެރިން ނިކަމެތި ވެދާނެ ކަމެއްކަމުގައި ދެކޭ ކަމަށް ސިޓީ ކައުންސިލުން ބުންޏެވެ.

"ރާއްޖޭގެ ކަނޑުގެ ސަރަހައްދުން ބައެއް ގެއްލި ދިޔަ ދިއުމަކީ މިކައުންސިލުން ނުހަނު ހިތާމަކުރާ ކަމެއް" އެ ބަޔާނުގައި ވެއެވެ.

މީގެ އިތުރުން އެ ބަޔާނުގައި ކައުންސިލުން ބުނީ، ދިވެހިރާއްޖޭގެ މަސްވެރިކަމަކީ ދުނިޔެ ބަލައިގެންފައިވާ ނަމޫނާ، ދެމެހެއްޓެނި މަސައްކަތަކަށްވާއިރު، ދިވެހިރާއްޖެއާއި އިންވެގެން ދާއަޅައިގެން ކުރާ މަސްވެރިކަމުގެ ސަބަބުން ޒަމާންވީ ދިވެހިރާއްޖޭގެ ދެމެހެއްޓެނިވި މަސްވެރިކަމަށް އެކަމުގެ ސަބަބުން ވަރަށް ބޮޑެތި އަސަރުކުރާއިރު އެކަމުގެ އަސަރު މާލޭ ސިޓީގައި މަސްވެރިކަން ކުރާ މަސްވެރިންނަށްވެސް ކުރާނެ ކަމަށެވެ.

އަދި ދިވެހިރާއްޖޭގެ ކަނޑުގެ ސަރަޙައްދުން ބައެއް ގެއްލިގެން ދިޔަ ދިއުމަކީ މަސްވެރިކަމުގެ ސިނާޢަތުގައިވާ އެންމެ ގިނަ މަސްވެރިކަމުގެ އުޅަނދުތައް ހިމެނޭ މާލޭ ސިޓީގެ އޮޑިދޯނި ފަހަރާއި ރާއްޖޭގެ އެހެނިހެން ސަރަހައްދު ތަކުގެ އޮޑިދޯނިފަހަރުގެ ވެރިންނާއި، ކެޔޮޅުންނާއި، ފަޅުވެރިންނާއި، އަދި އެހުރިހާ ފަރާތްތަކެއްގެ އާއިލާތަކަށް ކުރިމަގުގައި ބޮޑެތި ގެއްލުންތަކާއި ކުރިމަތިލާންޖެހޭނެ ކަމެއްކަމުގައި އެ ކައުންސިލުން ފާހަގަ ކުރިއެވެ.

އެހެންކަމުން މާލެ ސިޓީ ކައުންސިލުން ވަނީ ގެއްލިގެންދިޔަ ކަނޑުގެ ސަރަހައްދު ހޯދުމަށާއި، ދިވެހިރާއްޖޭގެ މިނިވަންކަމާއި، ސިޔާދަތު ހިފެހެއްޓުމަށް ކެނޑިނޭޅި މަސައްކަތްކުރުމަށް ކުރަންޖެހޭ އެންމެހައި މަސައްކަތްތައް ކުރުމަށް ކަމާބެހޭ އެންމެހައި މުއައްސަސާތަކަށް ގޮވާލާފައެވެ.