ދިވެހިރާއްޖެއާއި ޗާގޯސް އާއި ދެމެދު ފުށުއަރާ ސަރަހައްދެއް އޮތްކަމަށް ބުނެ މޮރިޝަސްއިން  އިންޓަނޭޝަނަލް ޓްރައިބިއުނަލް ފޯ ދަ ލޯ އޮފް ދަ ސީ (އިޓްލޮސް) އަށް ހުށައެޅި މައްސަލައިގައި ދިވެހިރާއްޖެ އަށް ފައިދާ ވާނެ އެއްވެސް ކަމެއް ދިވެހި ސަރުކާރުގެ ފަރާތުން ހުށައަޅާފައި ވެސް ނުވާކަމަށް ކުރީގެ ބަންޑާރަ ނައިބު އާޒިމާ ޝުކޫރު ވިދާޅުވެއްޖެ އެވެ. 

އާޒިމާ މިފަދައިން ވިދާޅުވެފައިވަނީ ދިވެހިރާއްޖޭގެ ކަނޑުގެ ސަރަހައްދުން ބައެއް ގެއްލޭގޮތަށް އިޓްލޮސްއިން މައްސަލަ ނިންމި ސަބަބަށް އަލިއަޅުވާލާ ޗާގޯސް މައްސަލައިގައި ކަންބޮޑުވާ ފަރާތްތަކުން ގުޅިގެން ބޭއްވި ޕްރެސް ކޮންފަރެންސްގައި ކޯޓުގައި އެ މައްސަލަ ކުރިއަށް ގޮސްފައިވާ ގޮތާއި ގުޅޭގޮތުން ތަފްސީލީ މައުލޫމާތުތަކެއް ހިއްސާ ކުރައްވަމުން ނެވެ. 

އާޒިމާ ވިދާޅުވީ މޮރިޝަސްއިން އެ މައްސަލަ ހުށައެޅުމާއި ގުޅިގެން ދިވެހި ސަރުކާރުގެ ޕޮސިޝަނަކަށް ވީ އެމީހުން ބުނާ ހިސާބުން ހަމަހަމައަށް (އިކުއި ޑިސްޓެންސް) އުސޫލުން ބައި ކުރުމަށް ކަމަށެވެ. އިކުއި ޑިސްޓެންސް އުސޫލުން ބެހުމާއި ގުޅިގެން ދިވެހި ސަރުކާރުގެ ފަރާތުން ހަމައެކަނި އިއުތިރާޒު ކުރީ މޮރިޝަސްއިން ބުނާ ޕޮއިންޓަކުން ބެހުމަށްކަމަށް އާޒިމާ ވިދާޅުވި އެވެ.

Advertisement

ދިވެހިރާއްޖެ އިން ބުނާ ޕޮއިންޓަކުން ފަށައިގެން ކަނޑުގެ ސަރަހައްދު ބައި ކުރުމަށް ރާއްޖެ އޮތީ އެއްބަސްވެގެންކަން ކޯޓަށް ހުށައަޅާފައިވާ ހުށައެޅުމާއި އެ މައްސަލައިގައި އިޓްލޮސްއިން ކުރި ހުކުމުގައި ސާފުކޮށް ފެންނަން އޮތްކަމަށް އާޒިމާ ވިދާޅުވި އެވެ. 

އާޒިމާ ވިދާޅުވީ ޗާގޯސް އަކީ މީހުން ދިރިއުޅޭ ޖަޒީރާއަކަށް ނުވުމާއި، ދިވެހިންނަކީ މަސްވެރިކަމަށް ބަރޯސާ ބަޔެއް ކަމަށާއި، ޗާގޯސްގެ ސިޔާދަތު އޮތްކަމަށް ދައުވާ ކުރާ މޮރިޝަސްއަކީ މަސްވެރިކަން ކުރާ ބައެއް ނޫން ކަމަށާއި، އެމީހުންނަކީ ކަނޑުގެ ސަރަހައްދުން ދާ އަޅައިގެން މަސްވެރިކަން ކުރުމަށް ލައިސެންސް ދޫކުރާ ބައެއްކަމަށް ވުމުން، އެ ސަރަހައްދު ދީފިނަމަ ރާއްޖޭގެ އިޤްތިޞާދަށް ކުރާނެ ނޭދެވޭ އަސަރުތަކާއި، މިއިން އެއްވެސް ކަމެއް ދިވެހި ސަރުކާރުގެ ފަރާތުން އިޓްލޮސްއަށް ހުށައަޅާފައި ނުވާކަމަށެވެ. 

ދެ ގައުމުގެ ދެމެދުގައި ފުށުއަރާ ކަނޑުގެ ސަރަހައްދެއް އޮތްކަމަށް ވާނަމަ ހަމައަށް ބެހުމަކީ މައިގަނޑު އުސޫލު ކަމުގައި ވިޔަސް، އެންމެ ފައިދާ ބޮޑުގޮތަށް އެކަން ކުރެވޭނެ ގޮތްތައް އަބަދުވެސް ބަލާކަމަށް އާޒިމާ ވިދާޅުވި އެވެ. 

އެކަން ފާހަގަކުރައްވާ އާޒިމާ ވިދާޅުވީ އެ މައްސަލައިގައި އިޓްލޮސްގައި ދިވެހިރާއްޖެ އިން ނަގާފައިވާ ޕޮސިޝަނަކީ ޤާނޫނާއި ޚިލާފު ޕޮސިޝަނެއް ކަމަށެވެ. ރާއްޖޭގެ ކަނޑުގެ ސަރަހައްދު ދިވެހިރާއްޖޭގެ ކަނޑުގެ ސަރަހައްދުތަކުގެ ޤާނޫނުގައި ވަރަށް ސާފުކޮށް ބަޔާންވެފައި އޮންނާނެ ކަމަށާއި،  ދައުލަތުން އިޓްލޮސްގައި ވަކާލާތުކުރީ ޤާނޫނުގައި ބަޔާންކޮށްފައިވާ 200 ނޯޓިކަލް މޭލާ ޚިލާފަށް ކަމަށް އާޒިމާ ވިދާޅުވި އެވެ. 

އާޒިމާ އިތުރަށް ވިދާޅުވީ ކޮންމެ ބަޔަކުވެސް އެފަދަ މައްސަލަތަކުގައި ބަލާނީ އެބައެއްގެ މަސްލަހަތު އެންމެ ބޮޑަށް ރައްކާތެރި ކުރެވޭނެ ގޮތަށް ކަމަށެވެ. 

އެހެން ނަމަވެސް ފޯޅަވަހި މައްސަލައިގައި ދިވެހިރާއްޖެއިން އިސްކޮށްފައިވަނީ ދިވެހިންގެ މަސްލަހަތު ނޫންކަން އެނގެން އޮތް ކަމަށެވެ. އަދި އޭގެ ސަބަބުން ރާއްޖޭގެ މަސްކަނޑުން ބައެއް ގެއްލި މަސްވެރިކަމުގެ ސިނާއަތަށް ބޮޑު ގޮންޖެހުމެއް ކުރިމަތިވެފައިވާކަން އާޒިމާ ފާހަގަކުރެއްވި އެވެ.