ދަރިވަރުންނަށް އެއްވެސް ނުރައްކަލެއް ނެތް ކަމަށް އެޑިޔުކޭޝަން މިނިސްޓަރ ޑރ.ޢާއިޝަތު ޢަލީ ވިދާޅުވި އަރަބިއްޔާ ސުކޫލުގެ ބާ އިމާރާތުގެ ތަނބުތައް ހަލާކުވެ، ކޮންކްރީޓް ތައް ފައިބަން ފަށައިފި އެވެ. 

މީސްމީޑިއާގައި މިހާރު ޢާއްމު ވެފައިވާ ފޮޓޯ ތަކުން ފެންނަ ގޮތުން, ޢަރަބިއްޔާގެ ދަރިވަރުން އެންމެ ފަހުން ތަޢުލީމް ހާސިލްކުރި ޢިމާރާތުގެ މީގެ ކުރިން ރެނދުލާފައިހުރި ތަނބުތަކުން ވަނީ ކޮންކްރީޓްތައް ނެއްޓިފައެވެ.

އެ ޢިމާރާތަކީ އެފަދަ ހާލަތެއްގައިވާ، ދަރިވަރުންނަށް ރައްކާތެރި ނޫން ތަނެއް ކަން ފާހަގަކޮށް، 2021 ވަނަ އަހަރުގެ ރައްޔިތުންގެ މަޖިލީހުގެ ޖަލްސާގައި މައްޗަންގޮޅި ދެކުނު ދާއިރާގެ މެމްބަރު އަހްމަދު ހައިތަމް ވަނީ އެޑިއުކޭޝަން މިނިސްޓަރާއި އެކަމާއި ގުޅިގެން ސުވާލުކުރައްވައިފައެވެ.

އެ ސުވާލަށް ޖަވާބު ދެއްވަމުން މިނިސްޓަރު ވިދާޅުވީ އަރަބިއްޔާ ސުކޫލުގެ އެ އިމާރާތަކީ 2013 ވަނަ އަހަރު ހުޅުވި އިމާރާތެއް ކަމަށާއި އެތަނަށް އެހާ ގިނަ ދުވަސްވެފައި ނުވާ ކަމަށެވެ.

"އެހެންވީމަ އަދި އެހާ ގިނަ ދުވަސްތަކެއް ނުވޭ އެ ބިލްޑިންއަކަށް، ނަމަވެސް އަޅުގަނޑުމެންނަށް ފުރަތަމަ ވެސް އަރަބިއްޔާ ސުކޫލުގަ ބޮޑެތި ރެނދުތަކެއް ހުރިކަން ފާހަގަވެފައިމިވަނީ ޑިސެންބަރު 2020 ގައި،" އައިޝާ ވިދާޅުވިއެވެ.

މިނިސްޓަރު އައިޝާ ވިދާޅުވީ ރެނދުތައް ފާހަގަވުމާއެކު އިންސްޕެކްޝަނެއް ހަދައިފައިވާނެ ކަމަށާއި ޕްލޭނިން މިނިސްޓްރީން އިންޖިނިއަރުން ގުޅިގެން ހެދި އިންސްޕެކްޝަންގައި ވިޝުއަލް އިންސްޕެކްޝަނެއް ހަދައި ރިޕޯޓެއް ހުށަހަޅައިފައިވާ ކަމަށެވެ.

"އެ ރިޕޯޓުގައި ފާހަގަކޮށްފައިވާ ގޮތުގައި އަދިއެއް ދަރިވަރުންނަކަށް ގެއްލުމެއް ނެތް، އެއީ އަޅުގަނޑުމެން ހަމަ ވަރަށް ކްލޯސްލީ މޮނިޓާ ކުރަމުން މިދަނީ، ކިރިޔާ ވެސް ދަރިވަރުންނަށް ނުރައްކާ ވާ ކަން އަޅުގަނޑުމެންނަށް އެނގޭ ހާލަތުގައި އަޅުގަނޑުމެން އެތަން ކުދިން ނެރުމުގެ މަސައްކަތް ކުރިއަށްދާނެ،" މިނިސްޓަރު ވިދާޅުވިއެވެ.

އެއަށްފަހު، ފާއިތުވެދިޔަ އަހަރުގެ ޖަނަވަރީ މަހުގައި އަރަބިއްޔާގެ ދަރިވަރުންވަނީ ވަގުތީ ގޮތުން، ފޮރިން މިނިސްޓްރީ ހިންގި އިމާރާތަށް ބަދަލު ކޮށްފައެވެ.