ފޯޅަވަހި މައްސަލައިގައި މި ސަރުކާރުން އަމަލުކޮށްފައިވާ ގޮތުގެ ސަބަބުން ރާއްޖޭގެ ކަނޑުގެ ސަރަހައްދުން ބައެއް ގެއްލިފައިވާ ކަމަށާއި، އަދި ރާއްޖެއަށް ބޮޑު ގެއްލުމެއް ލިބޭގޮތަށް މި މައްސަލަ ނިމިގެން ދިޔައިރު ވެރިކަމުގައި މޯލްޑިވިއަން ޑިމޮކްރެޓިކް ޕާޓީ (އެމްޑީޕީ) އޮތުމަކީ އިންތިހާއަށް ހިތާމަކުރައްވާ ކަމެއް ކަމަށް އެސްޓީއޯގެ ކުރީގެ މެނޭޖިން ޑިރެކްޓަރު ހުސެއިން އަމްރު ވިދާޅުވެއްޖެ އެވެ. 

ޗާގޮސް މައްސަލައާއި ގުޅިގެން ކުރީގެ ބަންޑާރަ ނައިބުންނާއި، ކުރީގެ ވަޒީރުންނާއި، ޤައުމީ ދިފާއީ ބާރުގައި ހަރަކާތްތެރިވި ފަރާތްތަކާއި ސިޔާސީ ޕާޓީތައް ގުޅިގެން އިއްޔެ ވަނީ ވަރަށް ޚާއްސަ ޕްރެސް ކޮންފަރެންސްއެއް ބާއްވާފަ އެވެ. މި ޕްރެސް ކޮންފަރެންސްގައި އަމްރު ތަމްސީލު ކުރެއްވީ އެމްޑީޕީގެ ރައީސް މުޙައްމަދު ނަޝީދު އުފައްދަވާފައިވާ "ފިކުރެއްގެ ދިރުން: ގޮތްޕެވެ. 

އަމުރު ވާހަކަފައްޓަވަމުން ވަނީ ރާއްޖޭގެ ކަނޑުގެ ސަރަހައްދުން ބައެއް މޮރިޝަސްއަށް ލިބިގެން ދިއުމަކީ ރާއްޖޭގެ މަސްވެރިކަމަށް ގެއްލުންވާނެ ކަމެއް ނޫންކަމަށް ސަރުކާރުން ބުނަމުންދާ ވާހަކައަށް ރައްދުދެއްވާފަ އެވެ. 

Advertisement

އަމްރު ވިދާޅުވީ މޮރިޝަސްއަކީ ކަނޑުގެ ސަރަހައްދުން ދާ އަޅައިގެން މަސްވެރިކަން ކުރުމަށް ލައިސެންސް ދޫކުރާ ޤައުމެއް ކަމަށެވެ. މޮރިޝަސްގައި ބަންދުކުރާ ދަޅުމަސް ޔޫރަޕަށް އެކްސްޕޯޓު ކުރާއިރު ޑިއުޓީވެސް ނުނަގާއިރު، ރާއްޖޭގެ ކަނޑުގެ ސަރަހައްދުން ބައެއް އެމީހުންނަށް ލިބިގެން ދިއުމަކީ މަސްވެރިކަމުގެ ސިނާއަކަށް އޮތް ވަރަށް ބޮޑު ގޮންޖެހުމެއްކަމަށް އަމްރު ވިދާޅުވި އެވެ. 

އޭގެ އިތުރުން އަމްރުގެ ވާހަކައިގައި ވަނީ ޗާގޮސް އާއި ދިވެހިރާއްޖެއާއި ދެމެދު އޮތް ފުށުއަރާކަމަށް ބުނާ ސަރަހައްދަށް ދިވެހިން މާސް ބާނަން ނުދާކަމަށް ބުނެ ސަރުކާރުން ދައްކަމުންދާ ވާހަކަތަކަށްވެސް ރައްދުދެއްވާފަ އެވެ. 

އެގޮތުން އަމްރު ވިދާޅުވީ މީގެކުރިން ރިޔާ ދޯނިފަހަރުގައި ދިވެހިން މަސްބާނަން ގޮސް އުޅުނީ އަދި މާ ކައިރި ސަރަހައްދުތަކަށް ކަމަށެވެ. އެހެން ނަމަވެސް މަސްވެރިކަމުގެ ސިނާއަތަށް އަންނަމުން މިދާ ކުރިއެރުންތަކާއެކު ދިވެހި މަސްދޯނިތައް އަޕްގްރޭޑް ކުރެވިފައިވާ ކަމަށާއި، މިހާރު މަސް ދެ ހަފްތާ ވަންދެންވެސް މަސްވެރިން ކަނޑުމަތީގައި ހޭދަކުރާ ކަމަށެވެ. 

އެހެންކަމުން ކަނޑުގެ ސަރަހައްދުން ބޮޑުބައެއް ލިބިގެން ދިއުމަކީ ޔަގީނުން ވެސް މަސްވެރިކަމުގެ ސިނާއަތަށް ލިބިގެންދާނެ ވަރަށް ބޮޑު ކުރިއެރުމަކަށް ވާނެކަމަށް އަމްރު ވިދާޅުވި އެވެ. 

އެކަންކަން ފާހަގަކުރައްވާ އަމްރު ވިދާޅުވީ އެ ގައުމެއްގ ސަރަހައްދުން އިންޗިއެއްވެސް ދޫކޮށްލުމަކީ އެއްވެސް ޤައުމަކުން ކުރާނެކަމެއް ނޫން ކަމަށެވެ. މިހާރުވެސް ދުނިޔޭގެ ގައުމުތަކުން އެ ގައުމަކަށް ލިބެންޖެހޭ ސަރަހައްދު ހިމާޔަތްކުރުމަށް ހަނގުރާމަތައް ކުރަމުންދާކަމަށް އޭނާ ވިދާޅުވި އެވެ. 

އަމްރު އިތުރަށް ވިދާޅުވީ ރާއްޖޭގެ ކަނޑުގެ ސަރަހައްދުން ބައެއް ގެއްލިގެން ދިޔައިރު ވެރިކަމުގައި އޮތީ އެމްޑީޕީ ސަރުކާރަކަށް ވީތީ އިންތިހާއަށް ހިތާމަކުރައްވާ ކަމަށެވެ.

ސަރުކާރުން ފޯޅަވަހި މައްސަަލައިގައި އަމަލުކޮށްފައިވާ ގޮތާއި ގުޅިގެން ޕާޓީގެ ރައީސް މުޙައްމަދު ނަޝީދުގެ ކަންބޮޑުވުންތައްވެސް އިންތިހާއަށް އޮތްކަމަށް އޭނާ ވިދާޅުވި އެވެ. އަދި ވިދާޅުވީ މި މައްސަލައިގައި އެހެން ޕާޓީތަކާއި ގުޅިގެން މަސައްކަތްޕުޅު ކުރެއްވުމަށް ނަޝީދުވެސް ހުންނެވީ ތައްޔާރަށް ކަމަށެވެ.