ދެކުނުގެ ކަނޑުގެ ސަރަހައްދަކީ ކޮބައިކަން މިހާތަނަށް އައިރު ދިވެހި ސިފައިންނަށް ނޭނގޭކަމަށް ވިދާޅުވެ ޗީފް އޮފް ޑިފެންސް ފޯސް މޭޖަރ ޖެނެރަލް އަހްމަދު ޝަމާލު ދެއްކެވި ވާހަކަތަކަށް ސިފައިން ގޭގައި 17 އަހަރު ވަންދެން ޚިދުމަތް ކުރައްވާފައިވާ އަހުމަދު ފަޔާޒު އަލީ ރިޒާ ރައްދުދެއްވައިފި އެވެ. 

އޭނާ މިފަދައިން ވިދާޅުވެފައިވަނީ ފޯޅަވަހި މައްސަލައާއި ގުޅިގެން ސަރުކާރުން އަމަލުކޮށްފައިވަނީ ރަނގަޅަށް ނޫންކަން ބަޔާންކުރުމަށް ކަމާގުޅުންހުރި ގިނަ ފަރާތްތަކެއް ގުޅިގެން ކުރިއަށް ގެންދިޔަ ނޫސްވެރިންގެ ބައްދަލުވުމުގައި ވާހަކަދައްކަވަމުން ނެވެ. 

އޭނާ ވިދާޅުވީ ދިވެހިރާއްޖޭގެ ކަނޑުގެ ސަރަހައްދަކީ ކޮބައިކަން ދިވެހި ސިފައިންނަށް އެއްވެސް އިރެއްގައި އޮޅިފައި ނޯންނާނެ ކަމަށެވެ. ދިވެހި އަސްކަރިއްޔާއިން އަބަދުވެސް ގެންދިޔައީ ދިވެހިރާއްޖޭގެ ސަހަރައްދު ޚާއްސަ އިޤްތިޞާދީ ކަނޑުގެ ސަރަހައްދުގެ ގޮތުގައި ޤާނޫނުގައި ބަޔާންކުރާ 200 ނޮޓިލަކް މޭލުގެ ސަރަހައްދު ބަލަހައްޓަމުންކަމަށް އޭނާ ވިދާޅުވި އެވެ. 

Advertisement

ފަޔާޒުގެ ވާހަކައިގައި ވަނީ ދިވެހިރާއްޖޭގެ އެކްސްކުލޫސިވް އިކޮނޮމިކް ޒޯނުގެ ގޮތުގައި ކަނޑައަޅާފައިވާ 200 ނޮޓިކަލް މޭލު ދިވެހި ސިފައިން ބަލަހައްޓަމުން އައިސްފައިވާކަން ހާމަކޮށްދިނުމަށް ބައެއް މިސާލުތައްވެސް ވިދާޅުވެފަ އެވެ. 

ފަޔާޒު ވިދާޅުވީ ދިވެހިރާއްޖޭގެ ދެކުނުން 150 މޭލު ބޭރުން ޤަވައިދާއި ޚިލާފަށް މަސް ބާނަމުން ދިޔަ ބޯޓުފަހަރުތައް 2017 ވަނަ އަހަރު ވެސް ހުއްޓުވާފައިވާ ކަމަށެވެ. މިއީ މިއަދުވެސް ލިޔެކިޔުންތައް ކޯޓްސްގާޑުގެ ރިޕޯޓުތަކުގައި ފެންނަން ހުންނާނެކަމަށް އޭނާ ވިދާޅުވި އެވެ. 

އެކަންކަން ފާހަގަކުރައްވާ ފަޔާޒު ވިދާޅުވީ ސިފައިންނަށް ކަނޑުގެ ސަރަހައްދު އޮތީ ނޭނގިކަމަށް ބުނެ ސިފައިންގެ ބޭކަލުންލައްވާ ހަދާފައިވާ ބޮޑެތި ދޮގުތަކެއް ކަމަށެވެ. އަދި އެ މޭރުމުން ސިފައިން ލައްވާ ވާހަކަ ދެކުވީ ނުފޫޒު ފޯރުވައިގެންކަމަށް ބެލެވޭކަމަށް އޭނާ ވިދާޅުވި އެވެ.