ދެކުނުގެ ކަނޑުގެ ސަރަހައްދަކީ ކޮބައިކަން މިހާތަނަށް އައިރު ދިވެހި ސިފައިންނަށް ނޭނގޭކަމަށް ވިދާޅުވެ ޗީފް އޮފް ޑިފެންސް ފޯސް މޭޖަރ ޖެނެރަލް އަހްމަދު ޝަމާލު ދެއްކެވި ވާހަކަތަކަށް ސިފައިން ގޭގައި 17 އަހަރު ވަންދެން ޚިދުމަތް ކުރައްވާފައިވާ އަހުމަދު ފަޔާޒު އަލީ ރިޒާ ރައްދުދެއްވައިފި އެވެ.
އޭނާ މިފަދައިން ވިދާޅުވެފައިވަނީ ފޯޅަވަހި މައްސަލައާއި ގުޅިގެން ސަރުކާރުން އަމަލުކޮށްފައިވަނީ ރަނގަޅަށް ނޫންކަން ބަޔާންކުރުމަށް ކަމާގުޅުންހުރި ގިނަ ފަރާތްތަކެއް ގުޅިގެން ކުރިއަށް ގެންދިޔަ ނޫސްވެރިންގެ ބައްދަލުވުމުގައި ވާހަކަދައްކަވަމުން ނެވެ.
އޭނާ ވިދާޅުވީ ދިވެހިރާއްޖޭގެ ކަނޑުގެ ސަރަހައްދަކީ ކޮބައިކަން ދިވެހި ސިފައިންނަށް އެއްވެސް އިރެއްގައި އޮޅިފައި ނޯންނާނެ ކަމަށެވެ. ދިވެހި އަސްކަރިއްޔާއިން އަބަދުވެސް ގެންދިޔައީ ދިވެހިރާއްޖޭގެ ސަހަރައްދު ޚާއްސަ އިޤްތިޞާދީ ކަނޑުގެ ސަރަހައްދުގެ ގޮތުގައި ޤާނޫނުގައި ބަޔާންކުރާ 200 ނޮޓިލަކް މޭލުގެ ސަރަހައްދު ބަލަހައްޓަމުންކަމަށް އޭނާ ވިދާޅުވި އެވެ.
ފަޔާޒުގެ ވާހަކައިގައި ވަނީ ދިވެހިރާއްޖޭގެ އެކްސްކުލޫސިވް އިކޮނޮމިކް ޒޯނުގެ ގޮތުގައި ކަނޑައަޅާފައިވާ 200 ނޮޓިކަލް މޭލު ދިވެހި ސިފައިން ބަލަހައްޓަމުން އައިސްފައިވާކަން ހާމަކޮށްދިނުމަށް ބައެއް މިސާލުތައްވެސް ވިދާޅުވެފަ އެވެ.
"2009 ހިސާބުގައި ސްރީލަންކާގެ ތަމަޅަ މި ހަނގުރާމަ ނިމިގެން ދިޔައިރު، އަޅުގަނޑުމެން ކޯސްޓުގާޑުން ނިކުމެ 100 އެތައް މޭލެއްގެ ބޭރުން ތަމަޓައިން އާމަރީތައް ފައްތާލީ. މީ 200 މޭލު ނެތީމަތޯ އަޅުގަނޑުމެންނަށް؟ 200 މޭލިގައި އަޅުގަނޑުމެންގެ ޤާނޫނީ ބާރު ނެތީމަ ތޯ؟ އެހެންވީމަ މި ހެންހުރި ބޮޑެތި ކަންތައްތައް އޮޅުވާލަނީ؟ "
ރިޓަޔާޑް ކާނަލް އަހުމަދު ފަޔާޒު
ފަޔާޒު ވިދާޅުވީ ދިވެހިރާއްޖޭގެ ދެކުނުން 150 މޭލު ބޭރުން ޤަވައިދާއި ޚިލާފަށް މަސް ބާނަމުން ދިޔަ ބޯޓުފަހަރުތައް 2017 ވަނަ އަހަރު ވެސް ހުއްޓުވާފައިވާ ކަމަށެވެ. މިއީ މިއަދުވެސް ލިޔެކިޔުންތައް ކޯޓްސްގާޑުގެ ރިޕޯޓުތަކުގައި ފެންނަން ހުންނާނެކަމަށް އޭނާ ވިދާޅުވި އެވެ.
"ދެކުނުގައި ކޯސްޓުގާޑުން 2017 ގައި ވެސް 2018 ގައި ވެސް ހުންނާނެ މަސްބޯޓު ހިފަހައްޓާފަ 150 މޭލުން. 100 މޭލުން. މި އޮޅުވައެއް ނުލެވޭނެ. މިއަދުވެސް ކޯސްޓު ގާޑުގެ ރިކޯޑުގައި ހުންނާނެ، ލޮގުކޮށްފަ ހުންނާނީ. މި ނައްތަލައެއް ނުލެވޭނެ. އޭގެން ނައްތާލައިފިއްޔާ ޕްރޮސެކިއުޓާ ޖެނެރަލްގެ އޮފީހުގައިވެސް ހުންނާނެ، އަދި އޭޖީ އޮފީހުގައިވެސް ހުންނާނެ. ބޭރުމީހުން ވީނަ އެ އެއްޗެހި ނައްތަލައެއް ނުލެވޭނެ، ފޮރިން އެފެއާސްގަވެސް ހުންނާނެ"
ރިޓަޔާޑް ކާނަލް އަހުމަދު ފަޔާޒު
އެކަންކަން ފާހަގަކުރައްވާ ފަޔާޒު ވިދާޅުވީ ސިފައިންނަށް ކަނޑުގެ ސަރަހައްދު އޮތީ ނޭނގިކަމަށް ބުނެ ސިފައިންގެ ބޭކަލުންލައްވާ ހަދާފައިވާ ބޮޑެތި ދޮގުތަކެއް ކަމަށެވެ. އަދި އެ މޭރުމުން ސިފައިން ލައްވާ ވާހަކަ ދެކުވީ ނުފޫޒު ފޯރުވައިގެންކަމަށް ބެލެވޭކަމަށް އޭނާ ވިދާޅުވި އެވެ.
Advertisement
This content is created and paid for by advertisers and does not involve Voice Journalists
